هنضرب الودع لـ"درية شرف الدين"

>> أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف

حضرة جناب الوزيرة.. درية شرف الدين.. عايزين طفرة في الإعلام شمال ويمين.. وصوتنا يطلع لفوق ويسمعه التايهين.. ومحتاجين رد يعلن إننا ثايرين.. على كل صوت ضدنا بيضلل السامعين.. إعلامنا هو لسان الشعب والملايين.. وأنتى وزيرة في إعلامنا سنين وسنين.. وعارفة مركبنا كانت فين ورايحة لفين.. ورأينا محتاجين يوصل إلى معارضين.. ومؤيدين.. والدول تعرف لفين رايحين.. وردنا ع الجزيرة وغيرها م التابعين.. نخرس لسانهم ونكشف إنهم خيالين..

إعلامنا مسموع ومرئي صوتنا في الميادين.. ونفسنا نشوف سيادتك إنت والمذيعين.. بتلجموا كل صوت يطلع وفيه تخوين.. والثورة محتاجين صوت عالي قوي وأمين.. واحنا في عالم على الشاشة وفيه تلوين.. واللي تغيب عنه يبقي ضاع مع الضايعين.. ومصر محتاجة صوت عالي صدي ورنين.. شاشة وإذاعة يصحوا العالم النايمين..

وأنت يادرية عارفة فيه لنا حاسدين.. بيزيفوا الحق لأجل يرجعوا الفاسدين.. والشعب صوته في إعلامه وفيه واثقين.. أنا قلت كل اللي عندي والعباد شاهدين.. ورملي قال والودع كل اللي عنده يقين.. فخلي بالك بقي إعلامنا دنيا ودين.. لازم يكون في انتباه وصوته كالبراكين.. يوصل لكل اتجاه ويخرس الشامتين.. ونفسنا نسمعك تاني وزيرتنا.. وتكفرينا بصوت درية شرف الدين.