حرب الأفيون!
للسياسة دائمًا وجه قبيح ومقيت مبيظهرش إلا ساعة اللزوم.. وحرب الأفيون هي أشهر نموذج للحروب القذرة التي تكشف الوجه القبيح للدول التي تنادي بالتحضر والتمدين..
حرب الأفيون أشهر حرب قامت عشان المزاج والكيف، تخيل أنت حرب تقوم ما بين دولتين عشان دولة منهما رافضة إن الأفيون يدخل أراضيها والتانية رأسها وألف سيف إنها تصدر لها الأفيون وش كدا.. شفت بجاحة أكتر من كدا.
الدولتان هما الصين وبريطانيا.. الصين صاحبة تاريخ من الحضارة والثقافة ممتد لآلاف السنين حكمها إمبراطور كان شايف إنه لازم يقفل على دولته منعًا لدخول الثقافة الغربية والفكر الغربي والمنتجات الغربية كمان، يعني تشتري مني آه أشتري أنا منك لأ.. وفلوسك كمان تكون حاضرة خد البضايع اللي أنت عايزها من توابل وحرير وغيره لكن «توته على كبوته» تبعت الفضة أو الدهب تاخد بضايعك لكن تقولي نبادل بضايع والكلام دا ميكلش معانا ودا اللي خرب بيت بريطانيا وخلى الميزان التجاري يميل لناحية الصين وهما مش لاقين حل أو فكرة يخترقوا بيها الصين دي لحد ما تقريبا واحد حشاش اقترح عليهم إن هما يصدروا ليهم الأفيون ويأخدوا بالأفيون بضاعة من عندهم وكدا نحل مشكلتين هنوفر الفضة والدهب ونقضي على الإنسان الصيني بالحشيش والأفيون..
عجبتهم فكرة الحشاش دا وبدءوا في تنفيذها وبعتوا الأفيون في الخباثة كدا لحد ما غرقوا بيه السوق الصيني وفي يوم لاحظ الإمبراطور إن الشعب الصيني تقريبا ماشي بيطوح وبيغني «أنا شارب سيجارة بني حاسس إن دماغي بتاكلني» واكتشف إن السر هو في الأفيون اللي بتصدره بريطانيا للصين راح واخد موقف حاسم من دا كله ومنع تهريب الأفيون وفتش السفن البريطانية وقوم الدينا على تصدير الأفيون راحت بريطانيا محركة أسطولها وجيشها وراحت لحد الصين وقامت حرب عشان إزاي الصين تمنع الأفيون وتصديره ليها ولا شغل بتوع الباطنية يعني إحنا هنصدر الأفيون غصب عنك ولو مش عجبك بنعلن الحرب عليك الإمبراطور بعد حرب استمرت سنتين وتقريبا خسر كل حاجة راح مستسلم لشروط بريطانيا وأول شرط إن الأفيون هيخش الصين علني يعني زي أحمد السقا في الجزيرة وهو بيقول للظابط بضاعتي هتخش من الزراعي ومش ههربها من الصحراوي تاني ومش هتتفتش.
ووافق الإمبراطوار على الاتفاقية دي.. راحت فرنسا طمعت وقالت فيها لأخفيها أنا كمان عايزة أصدر ليكم الأفيون علني يا أما أجيب جيشي وأجي
راح الإمبراطوار قاله وعلى إيه هات يا حبيبي الأفيون اللي أنت عايزه.. طبعا أمريكا مسكتتش وقالت اشمعنى أنا دا الأفيون بتاعي مية مية لا تقولي بريطانيا ولا فرنسا دا المزاج بتاعي آخر آلسطة وهيخش علني نعمل اتفاقية ولا أجيب الجيش راحوا عملوا اتفاقية وبقت الصين أكبر غرزة في العالم.
حرب الكيماوي اللي عايزة تعملها أمريكا على سوريا مش عارف ليه شكلها كدا من الحروب القذرة اللي شبه حرب الأفيون دي يعني خلصت على العراق وقلتلها أطلعي بالنووي لدمرك ومن غير ما تسمع الرد دمرتها ولا طلع في نووي ولا يحزنون ودلوقتي ادورت على سوريا وقالت لها اطلعي بالكيماوي اللي مخبياه يا حلوة ولا أضرب.. شكله هيضرب وشكله برده مش هيلاقي كيماوي !
