كنباوي وكنباوية.. حلقة رقم (129).. القبض على بلطجي الإخوان !
كنباوية تزغرد فرحا بالقبض على
البلتاجي وتدخل مطبخها مسرعة وهي تنده على كنباوي
كنباوية: يا كنباوي والنبي تعالي ساعدني شوية عايزة اخلص بسرعه
أنا بعمل اكلنا واكل الندر
كنباوي: ندر ايه يا كنباوية ؟ انتي نادرة ندر ؟
كنباوية: أيوة يا كنباوي، انت نسيت ؟ مش أنا كنت نادره اني اعمل
فته ولحمه ورز وافرقهم على الغلابه لما يتقبض على البلتاجي وادي البلتاجي اتقبض
عليه يبقي اللي عليا أنا اني اوفي الندر
كنباوي: أنا كنت فاكر أن ندرك رز بلبن
كنباوية: ما هو أنا حعمل كمان رز بلبن حفرقه مع الندر خلي
الغلابة تاكل وتنبسط
كنباوي: وإن شاء الله كده اشتريتي كام كيلولحمة ؟
كنباوية: 10 كيلو لحمة ب700 جنيه ده غير الرز واللبن
كنباوي: ياخراب بيتك يا كنباوي 700 جني لحمة و100 جنيه لبن وسكر
و50 جنيه رز ده غير لوازم الأكل من سمنه وخلافه يعني يقف عليا ندرك ب 1000 جنيه
اخدت أنا ايه من المجنون ده اللي اسمه البلتاجي غير الخسارة ؟
كنباوية: الخسارة دي قريبه ونقدر نعوضها لكن خسارتنا في وجوده
حر طليق وتحريضه للإخوان بالقتل والتظاهر ما كناش حنقدر نعوضها ابدا فيه خسارات
مقدور عليها يا كنباوي وأمرها هين لكن أي خسارة في البلد بتبقي صعب تعويضها ربنا
يخليك لينا وتعيش وتجيب وربنا يفتحها ويعوض عليك وده في الأول وفي الآخر خير ورايح
للي يستاهلوه من الغلابة
كنباوي: ما شي ياستي كله يهون فدا نصرة مصر وفدا سعادة الغلابه
وانبساط حضرتك
كنباوية: ربنا يخليك ليا ياكنبتي
كنباوي: ويخليكي ليا يالكنباوية، قولي انتي عيزاني أساعدك في
ايه؟
كنباوية: اغسل اللحمه وقطعها عقبال ما انقي أنا الرز بتاع الفته
وبتاع الرز بلبن
كنباوي: غالي والطلب رخيص انتي يعني جيتي في جمل ؟ إنتي تأمري
بس قوليلي اتقبض على البلتاجي ازاي ؟
كنباوية: بالجلابية اتقبض عليه بالجلابية كان عامل زي مجازيب
السيده والحسين ودقنه منبته ما كانش لحق يحلقها وبيقولوا أنه زعل اوي أنه اتقبض
عليه في الوضع ده والمنظر ده منظر مش شيك خالص
كنباوي: واتقبض عليه في أي داهيه ؟
كنباوية: بيقولوا في أبو النمرس جيزه اللي حصلت فيها مدبحة الشيعه
الشهر اللي فات
كنباوي: يعني كان قاعد كل ده في الجيزة من ساعة فض اعتصام رابعة
؟
كنباوية: لا يا كنباوي ده لسه كان رايح الجيزة امبارح بس وكان
طول الوقت اللي فات قاعد في مدينه نصر قرب رابعة العدويه
كنباوي: لئيم وكهين وحاوي وتعبان ربنا رحمنا من شره وحيله ده
كان طالع على قناه الجزيرة يستدر عطف الناس بالكدب الكداب المنافق السافل اللي
تاجر بموت بنته واستعطف الناس بموتها هوكده فاضل مين تاني من الجوقه دي يا كنباوية
؟
كنباوية: فاضل الدهل اللي اسمه عصام العريان وجوز العقارب محمود
غزلان ومحمود عزت ويبقي كده البلد نضفت من القرف اللي كان معشش فيها زي العنكبوت
وتقريبا لو حصل كده يبقي الإخوان شوكتهم انكسرت وحيلهم اتهد وخلصنا منهم
كنباوي: طيب يا كنباوية اوعي تندري ندر مع كل واحد يتقبض عليه
علسشان أنا بيتي ما يتخربش وبعدين احنا جاي لنا حتة عيل ومحتاجين مصاريف كتيره
للولاده وللسبوع والاكل والغذا وهدوم البيبي والعقيقه وخلافه يعني لازم نمسك ايدنا
شوية
كنباوية: حاضر يا كنباوي ما تخافش ربنا حيسترها معانا علشان
الخير اللي بنعمله وبعدين العيال بتيجي برزقها
كنباوي: والله ما أنا عارف هي بتيجي برزقها ولا بغلبها
ومصاريفها ؟
كنباوية: ياراجل ما تقولش كده ربك ما بينساش عبيده وبعدين مش
انت اللي كنت عاوز عيال ؟
كنباوي: ايوه أنا اللي عاوز وبستنا يوم ما يجي بفارغ الصبر
كنباوية: خلاص بقي ما تشتكيش واستحمل
كنباوي: أنا مش بشتكي بس أنا بتدبر الأمور علشان ما نحتاجش لحد
كنباوية: إن شاء الله مش حنحتاج لحد وربك حيسترها معانا وبعدين
أنا عامله جمعية حقبضها قبل الولاده بشهر واهه حتنفعنا جمعية كبيره ب5000 جنيه
كنباوي: اهو انتي كده طمنتيني طول عمرك واعيه ومدبره وشيلاني في
أزماتي
كنباوية: هو احنا لينا غير بعض
كنباوي: ربنا ما يحرمنا من بعض يلا ياستي اديني غسلت اللحمه
وقطعتهالك أي خدمه تاني ؟
كنباوية: تسلملي يا كنباوي سيبني بقي اكمل الاكل واقعد تابع
برامج ونشرات التليفزيون عقبال ما اخلص اكل وعلي فكره أنا عملالك صينيه رقاق
باللحمه المفرومه وكمان دكر بط في الفرن غير الفته واللحمه أي خدمه يا أبو عيالي
ياغالي
كنباوي: تسلميلي يا كنباوية وتسلملي ايديكي وعمايل ايديكي والف
مبروك على القبض على البلتاجي
كنباوية: الله يبارك فيك يا كنباوي !
