بعد الإعلان عن فيلمه الجديد، الجمهور يرد على سامح حسين بـ "عندنا شغل مش فاضيين"

أعلن الفنان سامح حسين مساء أمس عن موعد عرض فيلمه الجديد “استنساخ” والذي من المقرر عرضه في 9 من شهر أبريل الجاري.

وكانت ردود فعل الجمهور بعد الإعلان عن العمل الجديد للفنان سامح حسين ساخرة، وذلك برفع “هشتاج” بجملة “عندنا شغل مش فاضيين”، وجاء ذلك تباعًا لتصريحات نجم “قطايف” أثناء عرضه أمام الرئيس عبد الفتاح السيسي، باحتفالية عيد الفطر المبارك، حيث قال خلال العرض: "إحنا أفراحنا وأعيادنا كتير أوي، بس مش ضروري ناخد كل الأعياد دي إجازات، إحنا ورانا شغل كتير أوي".

وبرغم توضيح الفنان أنه لم يقصد خلال كلمته إلغاء الأجازة نهائيًا إلا أن ذلك لم يرضي الجمهور على الإطلاق واستمر الهجوم الشرس على سامح حسين بسبب عرضه “قطايف” الذي سبق وجذب باتجاهه العديد من الإشادات والحب من المشاهدين.

سامح حسين يوضح حقيقة مطالبته بإلغاء الإجازات في العيد

وكتب سامح حسين في منشور له عبر صفحته على فيسبوك: “جمهوري الحبيب.. كل سنة وأنتم طيبين وبخير.. بناء على طلبكم؛ والناس اللي طلبت تفسير لموضوع إني بطالب بإلغاء الأجازات في الأعياد؛ الكلام ده طبعا غير حقيقي بالمرة.. أنا زيكم بحب الأجازة وبحب زيكم اشتغل بإخلاص زي كل واحد في مجاله.”

وأضاف: “الأجازة دي نعمة من ربنا نشحن من خلالها قوتنا لمواصلة مشوار الحياة.. كل الموضوع إني تمنيت إن أعياد مصر وأفراحها تزيد وتكتر وساعتها مش لازم ناخد الأعياد الجديدة دي كلها أجازة؛ لكني لم أقصد أبدا إلغاء الإجازات الرسمية؛ وعلى فكرة احنا بنحب الأجازة علشان بنشتغل؛ أي حد جرب قلة الشغل مش هيحب الأجازة.. الشغل نعمة ربنا يديمها علينا ويعين كل واحد على حاله ويكرمنا جميعا ويرزقنا الخير.. يارب حياتكم تكون كلها أعياد وفرحة.”

مؤلف "قطايف" يدافع عن سامح حسين بعد أزمة إلغاء الإجازات

دافع عبد الرحمن هيبة الشهير بـ"دافنشي" كاتب ومؤلف برنامج "قطايف"، عن الفنان سامح حسين بعد الهجوم الذي تعرض له بعد تصريحاته بشأن إلغاء الإجازات في الأعياد.

وقال عبد الرحمن هيبة الشهير “دافنشي”: "كان نفسي ما أتكلمش في الموضوع دا تاني بس مش عارف أسكت وأنا شايف الناس بتهاجم سامح حسين هجوم شرس خالي من العقل والحكمة والمنطق، هجوم تحس إنه انتقامي أكتر منه أي شيء تاني".

وأضاف: "أنا واثق إن معظم اللي بيهاجموا الراجل لا سمعوا الكلمة اللي قالها في العيد، ولا كلفوا خاطرهم يسمعوها، هو مانشيت مجتزأ نشره كام موقع إخباري عشان الريتش والترافيك (سامح حسين يطالب بتقليل الإجازات) وكلنا بنعمل شير وكل واحد بيحط تعليقه.

وتابع: "طب إيه رأيك لو أنا قلت لك إن فيه آيتين في القرآن ربنا بيأمرنا فيهم إننا ما نصليش، وبيحذرنا من الصلاة ؟ "لا تقربوا الصلاة"، "فويل للمصلين“، مش تمشي برضو؟ ما دام احنا ممكن نقتطع أي كلام من سياقه ونحاسب صاحبه عليه”.

واستطرد: “قد كدا الهجوم على الناس واغتيالهم معنويًّا شيء سهل وما يستحقش مننا نتعب شوية ونفكر؟ نشوف الصورة كاملة؟ قد كدا احنا ناس متقلبين الهوى وما عندناش مبدأ ثابت نقدر نتبناه لمدة شهر واحد؟”.

 وتساءل متعجبًا: “سامح حسين مين اللي مش حاسس بالناس الشقيانة وعايز يلغي إجازاتهم؟ انتو فاكرين سامح دا مولود في الجونة؟”.

وواصل: "سامح حسين اشتغل نقاش وعامل في مصنع وفواعلي شال طوب ورمل، يعني ناس كتير أوي من اللي بتهاجمه بحجة إنه مش حاسس بيهم ما تعبوش ربع ما تعب في حياته.. ارجع للقائه مع عمرو الليثي واسمع حكايته عن والدته اللي كانت بتروح لقرايبهم تاخد بواقي الأكل وتقولهم عشان عندي فراخ، وفي الواقع كانت بتاخد الأكل دا لولادها (على حد تعبير سامح كنا احنا الفراخ) وما اتكسفش يقول دا قدام الدنيا كلها بعد ما بقى نجم صف أول".

ولفت: "سامح دا يا جماعة أطيب بني آدم وأنقى بني آدم ممكن تعرفه في حياتك.. شبهنا كلنا مش جاي من بعيد زي ما انتو فاهمين.. سامح حسين أنا أعرفه من سنة ونص، وأعرف عنه إنه طول الوقت ماشي على وضوء.. سامح حسين اللي أعرفه لما بيسمع الأذان بيسيب اللي في إيده فورًا ويصلي في أي مكان".

وأضاف: "أنا سافرت معاه طنطا في شهر رمضان، كنا بنحضر حفلة، وصلنا المطعم بعد أذان المغرب بحوالي نص ساعة، احنا قعدنا على الأكل وسامح راح على المصلية، اتكسفنا ورُحنا وراه صلينا المغرب.. بعد الفطار المطعم كله اتقلب عليه عشان يتصور معاه، ما كسفش واحد، وتقبل الكل بصدر رحب.. وقوات الداخلية دخلتنا قسم الشرطة من كتر الناس اللي كانت بتتدافع عشان تتصور معاه، وهو بيقابل الكل بابتسامة، وما بيحرجش حد، ونزل من العربية أكتر من مرة عشان ناس طلبت تتصور معاه".

وواصل “دافنشي” في دفاعه: "سامح حسين أنا دخلت بيته، وقام بنفسه عملي الشاي، وهو بالنسبة لي نجم كبير بشوفه وبحبه من وأنا في إعدادي..  سامح حسين من أول ما البرنامج بتاعنا نجح وهو في كل مكالمة بيني وبينه بيوصيني وصية الأخ الكبير لأخوه الصغير، ويقول لي اوعَ تنسَ فضل ربنا علينا، اوعَ الشيطان يضحك عليك.. لا عمره قال أنا جامد، ولا أنا رقم واحد، مع إنه فعلًا كان رقم واحد وما زال، بس دايمًا بينسب الفضل لله".

وتابع: "هو دا يا جماعة سامح حسين اللي أنا أعرفه مش اللي أنتو بتتكلموا عنه، وأقسم بالله أنا ما عارف هو هيتضايق مني عشان كتبت الكلام دا ولَّا لأ، ومش بعيد أشيل البوست دا بعد شوية، بس أنا غيران عليه ومش قادر أشوف كل الهجوم دا على واحد من أطيب وأنضف الناس اللي ممكن تشوفهم في حياتك.. وكل دا علشان إيه، علشان قال (ربنا يكتر أعيادنا وأفراحنا بس مش لازم ناخدهم كلهم إجازات ورانا شغل كتير).

وكأن المفروض لما ربنا يستجيب لدعوته ويكتر أفراحنا ناخد السنة كلها إجازة عشان يبقى سامح مش متحامل على الناس وحاسس بيهم."
 

واختتم قائلا: "أقول لكم حاجة أخيرة بقى؟ تعرفوا تعليق سامح على كل الشتايم اللي بتتوجه له من امبارح إيه؟ ضحك وقال لي جملة واحدة (دي حسنات ما تعبتش فيها) يا جماعة حسن الظن في الناس من حسن الظن في الله.. وواحد من السلف الصالح قال (لو رأيت أخي ولحيته تقطر خمرًا لقلت سُكبت عليه) يا ريت نخف اندفاع شوية ونفكر بعقلنا.. ودا آخر شيء هكتبه عن الموضوع دا".

فيلم استنساخ 

ويشارك في بطولة الفيلم هبة مجدي، التي ظهرت في البرومو الدعائي وهي ترتدي الحجاب، والفيلم من تأليف وإخراج عبدالرحمن محمد.

تدور أحداث فيلم استنساخ في إطار من الإثارة والتشويق، حيث يستعرض التأثيرات الحديثة للتكنولوجيا والذكاء الاصطناعي، بالإضافة إلى دور نظارات الواقع الافتراضي VR في إعادة تشكيل المفاهيم التقليدية.

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوداث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.