شاب أسمر "جاى" من أقصى الصعيد

شاب أسمر جاي من أقصى الصعيد...
في إيده اليمين ورق التجنيد... وفي إيده الشمال جبنة وسميط
جاي منين ورايح فين يا ولد....
معرفش بيجولوا رايح سينا اللي جنب العريش
وأول ما وصل قال تمام يا فندم زي ما علموه في مركز التدريب.... واستلم السلاح ووقف انتباه من حديد
وجفت جنب زميلي في الخدمة لجيت على وشه الدموع... جولتله ما تسترجل ياد ولا انت اشتجت للرجوع
جالي يا دفعة الداخل هنا مفقود... جولتله يا فرج الله احنا هنحارب اليهود
جاللي لو كان اليهود كنت خدت السلاح ورمحت رمح وموقفتش إلا في تل أبيب... لكن دول ناس لا يفرق معاهم عدو ولا حبيب
بصتله وضحكت وقبل ما يرد كانت الرصاصه داخله بين عنيه
مات معرفش مات ليه
وهو بيموت افتكر أبوه وهو بيقوله اوعاك يا ولد تموت جبان
ها يابوي... ولدك مات راجل وممتش هربان
بس قبل ما اغمض عنيا كان نفسي اسألك سؤال
هو أنا مت ليه يا بوي وعلشان إيه وهل بموتي نصروا الإسلام ؟