الشاعر الغنائي نور الدين محمد يكتب قصيدة لشهداء سيناء
كتب الشاعر الغنائي "نور الدين محمد"، صاحب الأغنية الشهيرة "مين هي مصر"، والتي غناها الفنان أحمد جمال في برنامج "أراب أيدول" قصيدة جديدة بعنوان "إحساسك إيه" تأبينًا لروح شهداء الشرطة الذين استشهدوا أمس بسيناء.
وكانت كلمات القصيدة كالتالي:
إحساسك إيه وانت بتقتل.. عسكري متجند إجبارى
ملهوش فِ سياسة ولا نجاسة.. واقف فِ الخدمة ومش دارى
فِ نهار رمضان ماسك مصحف.. وبيقرى فِ سورة الرحمن
بيهون بيه صيامه وعطشه.. بيصبر نفسه بإيمان
سايب فِ بلدهم أحلامه.. سايبب أبوه وأمه وأرض وطين
بالثانية بيحسب أيامه.. وبيحلم يجروا بقى السنتين
إحساسك إيه لما بإيدك.. تنسف أحلامه المسكينة
بتحس ساعتها إنك مؤمن.. وفى قلبك تقوى وسكينة!
بتحس بإيه لما يطرطش.. الدم يغطى الأفارول
بتحس بإيه لما بتسمع.. صرخة قلب أم المقتول
إحساسك إيه لما بتعرف.. إن ابنه لسه مشافهوش
علشان مولود من أسبوع.. وأبوه لسه منزلِّوش
بتحس بإيه لما بتعرف.. إنك بترمل بنوته
كان كل أملها مع عريسها.. تتهنى بأجمل حدوتة
إحساسك إيه لما بتقتل.. وتبرر جرمك بالدين
كده مؤمن إنت ومجاهد.. وإنت بتدبح بنى آدمين
لو فاكر إن دا هيعدى.. وإننا هنخاف مِ الإرهاب
ونطنش على دم الجندى.. وهتهرب من أي حساب
يبقى انتوا غبائكم مستحكم.. مش عارفين المصريين
بكره نعلقكم فِ مشانق.. ونرجعكم للزنازين
