كنباوي وكنباوية.. حلقة رقم (120) .. لا تصالح!

كنباوية تبكي وهي تشاهد مراسم جنازة شهداء رفح وكنباوي يطيب خاطرها ويشد من أذرها
كنباوي: وحّدي الله يا كنباوية دول شهداء وأحياء عند ربهم يرزقون
كنباوية: وذنبهم إيه يموتوا في عز شبابهم دول في العشرينات من عمرهم وذنب أهاليهم إيه بس يا ربي زمان قلوب أهاليهم مفطورة عليهم منهم لله الإرهابيين اللي لا عندهم ملة ولا دين ولا قلب ولا رحمة اللي عملوا كده منهم لله ربنا ينتقم منهم ونشوف فيهم يوم والله يكون في عون أمهاتهم ويصبرهم على ما بلاهم
كنباوي: ربنا يصبر أهاليهم
كنباوية: لازم الداخلية والجيش ينتقموا لهم ويجيبوا حقهم لازم يا كنباوي
كنباوي: حيحصل يا كنباوية لا الداخلية ولا الجيش حيسكتوا على جريمة بشعة زي دي في حق الإنسانية وفي حق ناس أبرياء مالهمش ذنب غير إن في بلادهم ناس مجانين متخلفين مابيتورعوش عن قتل النفس اللي حرم ربنا قتلها أو إزهاق روحها
كنباوية: أنا نفسي أنط في كرش كل من يقول مصالحه مصالحه مع مين؟ مع ذئاب؟ ملعون أبو اللي يقول مصالحه بعد كل الدم ده أنا واثقة من إن كل اللي بيقول مصالحه عميل وخاين وملعون أبو جمعيات حقوق الإنسان اللي بتنادي بعدم التصعيد والقتل للمتظاهرين خلاص ماعدش ينفع طبطبة خلاص يا كنباوي دول لازم ينضربوا بالجزم ويترموا بالرصاص أنا ماكنتش أعرف إن مصر فيها متخلفين وجهلة وأميين بالشكل ده
كنباوي: أمال إنتي كنتي فاكرة إيه فاكرة إن المتظاهرين دول دكاترة وقناصل؟ دول ناس فاشلة كبيرهم إعدادية أو دبلوم صنايع أو تجارة أو أرزقية أو صنايعية أو بلطجية أو شحاتين
كنباوية: عندك حق التخلف استشرى في البلد دي من زمان ولازم نعيد بناءها من جديد ونبتدي بالتعليم والسماحة والرحمة والرأفة لازم نعلم أولادنا وسطية الإسلام لازم
كنباوي: بس الأول نقضي على الإرهاب ونحط إيدنا على باقي فلول الإخوان ونمسك قياداتهم الفارين
كنباوية: مش معقولة يفضلوا هربانين لحد دلوقتي وإزاي هربوا من اعتصام رابعة والداخلية ماقدرتش تمسكهم أو ترصدهم ومستخبيين فين؟ وطول ما همه بره السجون حتفضل مسيرات الإخوان والناس المدفوعة والمأجورة شغالة كل يوم لأن المحرض حر طليق بيتصل بأعوانه في كل مكان
كنباوي: بكرة يمسكوهم
كنباوية: عقبال ما ييجي بكرة بتاع الداخلية ده تكون خربت مالطا
كنباوي: ما إحنا قولنا يا كنباوية الصبر طيب
كنباوية: فيه حاجات ماينفعش فيها صبر يا كنباوي لازم تطرق فيها على الحديد وهو سخن والبطء فيها بيكون شيء خطير ووبال على البلد
كنباوي: أنا معاكي بس الجهات السيادية كلها شغالة وبعدين إحنا اتفقنا إن دول ديابة يعني واخدين حذرهم بس مسيرهم يغلطوا ويتقبض عليهم ونرتاح من شرهم
كنباوية: نفسي أشوف البلتاجي وهو مقبوض عليه هو وصفوت حجازي وأشفى غليلي فيهم
كنباوي: أنا بقى نفسي أشوف المرشد والعريان لحظة القبض عليهم وكمان عاصم عبد الماجد علشان قلبي يهدى ويرتاح
كنباوية: مصر كلها مستنية القبض على الإرهابيين دول كل يوم يتقبض على واحد من دول حيبقى يوم عيد في مصر
كنباوي: وأي عيد يا كنباوية ده العيد اللي بيشمل فرحة المسلمين والأقباط مع بعض فرحة كل الأطياف الموجودة في مصر بلدنا
كنباوية: مصر بلا إخوان ده حلمي يا كنباوي
كنباوي: حيتحقق حلمك يا كنباوية قريب أوي وحنشوف مصر بلا إخوان
كنباوية: ده حلمي اللي بنام واصحى عليه
كنباوي: السيسي حيحققه بإذن الله
كنباوية: مش السيسي لوحده لازم المصريين كلهم يساعدوه في ده كل مصري عنده معلومة عن الإخوان مايترددش إنه يقدمها للجهات المسئولة والمعنية بمحاربة الإرهاب والقبض على قياديي الإخوان
كنباوي: ده طبيعي كلنا لازم نتكاتف ونساعد قواتنا المسلحة والشرطة في القبض على الإرهابيين دول
كنباوية: مفيش مصري أصيل حيبخل بأي معلومة في صالح مصر
كنباوي: وده المنتظر من شعب مصر
كنباوية: شعب مصر شعب وفي أصيل كريم شجاع حيقف جنب بلده لحد ما تخرج من محنتها بخير وسلام
كنباوي: وده الأمل يا كنباوية ده الأمل!