محمد فؤاد يتصدر التريند بعد واقعة مستشفى عين شمس التخصصي.. نشطاء مواقع التواصل: تشبه حادث وفاة الممثل تامر ضيائي.. ومطلوب قانون يحمي الطبيب وأهل المريض
![أزمة الفنان محمد](images/no.jpg)
محمد فؤاد، لا تزال أزمة الفنان محمد فؤاد في واقعة تعديه على طبيب بمستشفى عين شمس التخصصي تلقي بظلالها، حيث أحدثت الواقعة جدلًا واسعًا بين نشطاء مواقع التواصل الاجتماعي، البعض يرى أن تعدي محمد فؤاد على الطبيب غير مبرر، في حين أكد آخرون أن واقعة شقيق محمد فؤاد تشبه واقعة الفنان تامر ضيائي، التي توفي على إثرها.
واقعة تعدي محمد فؤاد تتصدر التريند
واقعة محمد فؤاد والتعدي على الطبيب تصدرت مواقع التواصل الاجتماعي، واحتلت موقع الصدارة بمؤشر البحث الأكثر شهرة "جوجل"، حيث اختلفت ردود الأفعال حول الواقعة، فالبعض يرى أن تعدي محمد فؤاد علي طبيب الطوارئ بالمستشفى خوفًا على حياة شقيقه، في حين رأى شهود العيان أن الطبيب قام بعمل كافة الإجراءات لشقيق الفنان، ولم يكن يستحق هذا التعدي من الفنان.
![](/Upload/libfiles/511/7/3.jpg)
وظهر محمد فؤاد في الفيديو المنتشر على وسائل التواصل الاجتماعي وهو يشتبك مع طبيب الطوارئ بالمستشفى ويحاول عدد من الأشخاص التدخل بينهما لإنهاء المشادة التي المرضى.
شادي شامل يتعاطف مع محمد فؤاد
وعلق الفنان شادي شامل على الواقعة فقال: "الفيديو ده جالي من تليفون صديقي الفنان محمد فؤاد الشخصي بواسطة صديقنا المشترك الأستاذ أحمد أيوب، اللي كان حاضر الواقعة، على فكرة أنا متعاطف مع محمد فؤاد أولًا أخوه عنده جلطة في القلب كان بيستفسر من الدكتور عن الحالة ومش بيرد عليه والدكتور في منتهي الاستفزاز"
وتابع شادي شامل "تاني حاجه الدكتور كان في منتهي قله الذوق وتطاول علي محمد فؤاد بالضرب الأول وخطف موبايله ونده الامن عشان يطلعو فؤاد من المستشفى. القصه دي بشهاده الشهود وما تنسوش قصه الممثل تامر ضيائي شبه نفس قصة فؤاد..."
شعود العيان: محمد فؤاد اعتدى على الطبيب
وروى أحد شهود العيان تفاصيل واقعة تعدي محمد فؤاد على طبيب بمستشفى عين شمس التخصصي، وتحريره محضرًا ضد المطرب بقسم شرطة الوايلي، بعد نشوب مشادة كلامية بينهما داخل المستشفى.
![](/Upload/libfiles/511/7/672.png)
حيث قال شاهد العيان أحمد دسوقي "الناس داخلة تشتم في الدكتور والمستشفي ومحدش فاهم حاجة، النجم محمد فؤاد اخوة دخل عندنا الطواري واتعملو رسم قلب وكل دة ماخدش دقائق معدودة، والدكتور اللي انتو شايفينو دة كان من كتر استعجاله كان بيبلغ الاستشاري وبيحضر لو القسطرة وبيكلم ٤ أو ٥ من ضمنهم محمد فؤاد، في الوقت ده دخل شخص عايز يفضل يعيد تاني الكلام فقال له خلي حد من تبعك يبلغك، أنا مش هعيد الكلام لكل شخص.. يقوم النجم بقي يعمل اي سب... لينا كلنا وشتايم لينا كلنا واضرب وكسر في الكل.. ربنا يرحمنا والله اتهزقنا واتشتمنا بـ أهلينا ومش هنعرف ناخد حقنا..."
مطلوب قانون يحمي الطبيب وأهل المريض
البلوجر مهند تيد شموزبي قال " ليه كل يومين يطلع ڤيديو اهانة للأطباء في مصر... أنا فاكر ٣ حالات اعتداء منها الممرضة الحامل اللي اتضربت وخسرت طفلها والطبيبة التي تعرضت للتنمر من المحافظ علشان بتأدي شغلها... ليه مفيش اقتراح قانون رادع يحاسب اي حد يعتدي على اي حد من الطاقم الطبي وفي المقابل قانون يضمن حق أهل المرضى مستحيل اي طبيب يتهاون في شغله لأنه خايف يتعاقب ويغنيهم عن التطاول بالسب والاعتداء؟ ليه العبث؟"
![](/Upload/libfiles/511/7/673.png)
أما البلوجر والمحامي عمرو الشهاوي فقال: " واقعة المطرب محمد فؤاد: ١- أول حد ممكن يسأل هو أمن المستشفي الذي سمح بدخول كمية البشر دي. ٢- اللي ظاهر في الفيديوهات القصيرة، واحد في حاله هستيريه عشان أخوه داخل المستشفى في جلطه، وطبيب في منتهي الاحترام منطقش بكلمه. ٣- محدش سمع أو فهم من الطرفين أو الشهود أيه اللي حصل بالضبط عشان الامور توصل لكدا. ٤- أنا مسمعتش محمد فؤاد في أي فيديو بيقول "انت متعرفش انا مين" زي ما الكل بيشير بوستات وبينسب له ذلك. ٥- اللي بيعتب علي اللي حصل منفصل عن الواقع وميعرفش الناس سلوكياتها ايه مع بعض في الشارع وفي أي مكان. ٦- أنا مش بدافع ولا بقدم تبريرات لحد، طالما فيه بلاغ من الطبيب فلازم نسكت شويه لحد ما جهات التحقيق تصدر قرارها في الواقعة.. ارحمونا... وكفايه"
محمد فؤاد مذعور على شقيقه اعذروه
وقالت البلوجر والإعلامية مروة صبري: "اللى حصل مع المطرب محمد فؤاد في مستشفى "عين شمس التخصصى" اسمه قله ضمير وقلة تقدير للحالة الراجل داخل بأخوه عنده جلطه وخايف ومرعوب عليه وعايز يلحقه بسرعه... الدكتور يقوله استنى وميردش عليه ويقول طلع الشخص ده بره (على محمد فؤاد)، الراجل داخل مستشفى في حاله هيستيريا بسبب خوفه ورعبه على أخوه، ومهما حصل منه المفروض أن الدكتور يتحمل حالته، لأنه ببساطه مذعور على حاله أخوه، اللى ممكن يروح منه في لحظه.. احساس صعب زى اللى هو كان فيه"
الاعتداء على الطاقم الطبي بالضرب
ويروي أحد شهود عيان الواقعة قائلًا: "المطرب محمد فؤاد كان في المستشفى مع أخوه اللي كان عنده جلطة، وطلبوا بسرعة يشوفوا الدكتور. لما الدكتور قال إن الحالة محتاجة قسطرة وبدأ يكتب الجواب المطلوب، فؤاد اتكلم معاه بطريقة مش لطيفة، وحصلت بينهم مشادة ومد إيدى، الفنان قال للدكتور "أنت مش عارف أنا مين"، وبعد كده حصل اعتداء على الطاقم الطبي بالضرب والسب."
![](/Upload/libfiles/511/7/676.png)
وتابع شاهد العيان قائلًا: "من ناحية تانية، مدير أعمال محمد فؤاد قال إن لما راحوا مستشفى عين شمس ودخلوا الطوارئ، التقرير وضح إن أخوه محتاج لدعامتين. لكن الدكتور بص لفؤاد من فوق لتحت وسأله "الحالة إيه؟" ومردش عليه. محمد فؤاد سأله هنعمل ايه في أخويا؟ الدكتور رد وقال "هاتوا الأمن وطلعوا البني آدم ده برة". ومن هنا بدأت المشكلة بينهم، دلوقتي الموضوع اتحول للجهات المختصة بعد ما اتحرر محضر، والكل مستني يشوف مين اللي كان غلطان في الموقف ده."
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.