حكايات المصريين مع نتيجة الثانوية العامة.. محمود دخل طب بمجموع 73%.. أحمد يبحث عن حلمه الضائع.. نهال حرمها المجموع من طب وحققت حلمها بالصيدلة.. و70% فتحت باب الشهرة لدولت
![تجارب في نتيجة الثانوية](images/no.jpg)
الثانوية العامة، مع ظهور نتيجة الثانوية العامة كل عام يفرح بعض الطلاب لتحقيق حلمهم، في حين يصاب آخرين بحالة من خيبة الأمل، لعدم تحقيق الحلم المرجو بابتعادهم عن الكلية التي كانوا يتمنونها بسبب المجموع.
النجاحات والإخفاقات تجارب مع نتيجة الثانوية العامة
مع النجاحات والإخفاقات بسبب نتيجية الثانوية العامة، تظهر تجارب أخرى لطلاب خاضوا تجربة الثانوية العامة، لكنهم لم يحصلوا آنذاك على المجموع الذي كانوا يحلمون به، وابتعدوا عن الكلية التي رغبوها، لكنهم اكتشفوا من خلال تجاربهم أن الحلم الحقيقي ليس في مجموع الثانوية العامة، لكن بالتمسك بحلم النجاح في الحياة، والرضا بما قسم الله للوصول إلى النجاح.
![](/Upload/libfiles/509/9/811.jpg)
حكى الطالب محمود مرسي عن تجربة مع نتيجته في الثانوية فقال: "بمناسبة نتيجة ثانوية عامة... انا جبت 73.5 ودخلت كلية طب (طب أسيوط الأهلية)، هتقولي ازاي هقولك كرم ربنا، لو حد قالي يوم النتيجة إنك هتخش كلية طب هقولوا مستحيل، انت بتقول إيه، ولكن مفيش حاجة مستحيلة علي ربنا. لو ربنا شاف فيك السعي والرغبة الحقيقة هيراضيك، وأيًا كانت الطريقة أو الاختبار".
أحمد يبحث عن حلمه الضائع
وتابع الطالب محمود مرسي تجربته "أهم شيء النية الصادقة والسعي، مش مجرد عايز الحاجة دي علشان تقول أنا قوى ولا علشان تتكبر على الناس أكيد مهما سعيت وانت نيتك فاسدة مش هتلاقي(إنما الأعمال بالنيات)، الخلاصة.. أرضي وحسن نيتك واسعي في الآخر ربنا يراضيك ويعطيك ما تريد، وخليك فاكر (مفيش حاجة مستحيلة على ربنا) بالمناسبة أنا داخل ثالثة طب".
![](/Upload/libfiles/509/9/428.jpeg)
أما الطالب أحمد عويس فيحكي تجربته مع نتيجة الثانوية العامة، حيث يقول: "لما بشوف فيديوهات الناس الفرحانة بنتيجتها ثانوية عامة بيجيلي شعور إني اتحرمت من اللحظة دي، رغم إني كنت أستحقها وعملت كل حاجة عشانها ولكن لم أعش الجزء بتاع النهاية السعيدة، ضايع من قصة الثانوية العامة بتاعتي تعب وسهر بس من غير نهاية سعيدة، في الآخر فصل القصة الضايع هفضل مفتقده لآخر عمري تقريبًا ومش هعرف اتعافى مهما حاولت الحمدالله علي كل حال".
حلم نهال ضاع في الطب ووجدته في الصيدلة
أما الناشطة نهال فتحكي عن تجربتها في الثانوية العامة قائلة: "أنا مخلصة كلية صيدلة من 3 سنين وكنت جايبة 97% وكل سنة بتظهر نتيجة الثانوية العامة بفتكر إني مفرحتش بنتيجتي، لكن لو رجع بيا الزمن تاني هختار إني أجيب نفس المجموع وأدخل صيدلة وخاص كمان وأوصل للي وصلتله دلوقتي، وقتها لما مجموعي مجابش غير طب بيطري كنت حاسة إني لم أصل لحلمي، تعب ومجهود ربنا وحده كان يعلم بيه ضاع في الأرض، ما هو أصلا مش فارقة طالما أي حاجة غير الطب".
![](/Upload/libfiles/509/6/702.jpg)
وتابعت نهال سرد حكايتها "لما دخلت جامعة خاصة (اللي بيقولوا عليهم بينجحوا بفلوسهم) كنت بقول يارب ما الحكمة مما يحدث، ولم أكتشف الحكمة غير بعد ما اتخرجت تقريبًا"
المهارات أهم من نتيجة الثانوية العامة
وقال الناشط فوزي أبو الحسن: "بعيدًا عن المجموع إنك خلصت ثانوية عامة هذا إنجاز في حد ذاته، سنة وخلصت وثانوية عامة ليست كل شيء، أمامك انجازات كثير أخرى في حياتك أهم، وبناءا على تجربتي وتجارب بشوفها في غيري سأقول لكم نصيحتين.. إذا مجموعك جيد لا تتغر في نفسك، وتترك نفسك في الكلية لأن في سوق العمل مابيقولكش انت جبت كام في ثانوي، واستغل الثقة التي أخذتها أنها تدفعك للأفضل"
![](/Upload/libfiles/509/8/431.jpg)
وقال الناشط فوي أبو الحسن "وإذا مجموعك مش كويس حاول تثبت نفسك في فترة الجامعة وتتفوق في مجالك ولو مجالك ليس له سوق شوف مجال كويس محتواه متاح أونلاين، وغالبا كل شيء الآن متاح اونلاين، وحاول تثبت نفسك فيه، ماحدش بيقولك وانت رايح تشتغل جبت كام في ثانوي بيسألك عن المهارات اللي تقدر تقدمها في مجالك"
نانا حصلت على 68% وتحول حلمها للأفضل
أما الطالبة نانا عبيد فحكت عن تجربتها قائلة: "بمناسبة نتيجة الثانوية العامة هحكي تجربتي مع هذا اليوم ويوم نتيجة التنسيق. للأمانة مجهودي طول السنة كان مخليني مقتنعة أن على الأقل يكون مجموعى فى السبعينات، لكن الحمدلله يعني جبت 68٪ ولما عرفت النتيجة قولت لماما من مكاني أنا جبت كذا ومعرفش ايه برود الأعصاب دة بجد... أدركت بعدها وكانت حالتي النفسية مش أحسن حاجة، ودخلت فى دوامة التنسيق، اللي يعرفني كان عارف ان حلمي كان آداب جغرافيا وكنت متمسكة بالقسم دة جدًا، لكن مش فاهمة أيه حصل ووضع كلية تربية أمامي وفكرت فيها رغم أنها مكنتش على بالي نهائي، وفعلا جاتلي تربية ابتدائي قسم دراسات اجتماعية."
![](/Upload/libfiles/509/0/464.jpg)
وتابعت نانا تجربتها "أول ترم فى الجامعة كنت بحاول أحول لأداب انتساب، لكن الأبواب كلها قفلت فى وشي بجد، وأهملت أول ترم شوية، مش عايزة اقولكم وقت نتيجة الترم الأول لقيتني رسبت في مادة الجغرافيا، كانت صدمة بالنسبالي لأن هذه مادتي المفضلة وتساءل "ازاي دة حصل"، وهذه كانت نقطة التحول التي حدثت فى الجامعة، بدأت أركز على دراستي، وأصبحت متأكدة أنها خاصة بي، وأنا الآن في سنة ثالثة، وبرغم أن الكلية تقيلة، لكن أنا مبسوطة ومرتاحة ولو رجع بيا الزمن هختارها مرة ثانية، والحمدلله مليون مرة إني لم أنجح فى التحويل لآداب بجد، وأيا كان المجموع وأيا كان الكلية اللي هتجيلك خليك راضي وربنا عمره ما هيضيع تعبك نهائي"
إسراء لم تحقق حلمها فاكتشفت الأفضل
وقالت الناشطة إسراء حمادة: " أما عن تجربتي يوم نتيجة ثانوية عامة؛ فالحمدلله ربنا أكرمني، ويمكن محققتش حلمي، لكن المكان اللي أنا فيه دلوقتي أحسن مليون مرة، من اللي كنت بتمناه وبطلبه من ربنا في كل صلاة، أفتكروا دائمًا إن الموضوع مش متعلق برغبتك أنت، الموضوع متعلق بالشئ الذي فيه خير ليك، وصدقني تدابير ربنا أحسن مليون مرة من خططك التي رسمتها في رأسك"
![](/Upload/libfiles/507/9/717.jpg)
وتابعت إسراء حمادة "عاوزة أفكرك إني كان ممكن أدخل الكلية التي تمنيتها كثيرًا جدا وكنت أدعو الله بها كثيرًا، ووقتها واثقة إني لن أكون مرتاحة ولا مبسوطة فيها، وكان ممكن أفشل فيها؛ لأنها ببساطة مش خير ليا؛ ربنا لطيف خبير بعباده، وأكيد مش هيوجع قلوبكم بحاجة فيها شر، ولا هيحرمكم من حاجة فيها خير ليكم، فإن أعطى فَلهُ الحمد وإن منع فَله الحمد ولهُ الحِكمة في ذلك، ارضوا بقضاء ربنا"
دولت حصلت على 70% فحققت شهرتها
كما حكت الناشطة دولت دوللي عن حكايتها في نتيجة الثانوية العامة فقالت: "اليوم كنت في المستشفى وفوجئت بفتاة يحملها أهلها في حالة انهيار تام وعرفت انها حالة ثانوية عامة ودخلت الطواريء ووضع لها محاليل وجلسة تنفس.. إلى متى يحدث هذا لأولادنا هل الضغط من البيت أم من المدرسة أم من المجتمع ككل، كان نفسي اقولها على تجربتي وخفت احبطها لما تعرف ان في الدنيا مآسي أكبر بكثير من الثانوية العامة، حاولوا تخففوا الضغط على أولادكم، الثانوية العامة مش نهاية العالم"
![](/Upload/libfiles/507/7/59.jpeg)
وتابعت دولت دوللي "انا كنت علمي وحصلت على مجموع ٧٠ ٪ ودخلت حقوق، واشتغلت في مجال المحاماة ثم في المجلس القومي للمرأة، الحمد لله نجحت ومستقرة نفسيا واجتماعيا قبل ما يكون ماديا، العبرة مش بالمجموع ولا بكليات القمة، العبرة بالاجتهاد قدر الاستطاعة وبتوفيق ربنا طبعًا أولا وأخيرًا، والرضا بما كتبه الله، طالما عملت اللي عليك، ستكون راضي وضميرك مستريح وكل واحد بياخد نصيبه"
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والفنية والأدبية.