محمد صبحي: وضع الفن دلوقت لا يليق بمكانة مصر والعظماء قاعدين في بيوتهم (فيديو)
محمد صبحي، قال الفنان محمد صبحي: "لما قلت إني ما أقبلش كفنان إن الفنان ياخد 40 و50 مليون والمعلم بياخد أقل من 2000 جنيه، مش معناه إني مستكتر على حد الملايين لأ والله بس أنا ببص على معلم في ظروف ما يقدرش يعيش فيها براتب أقل من 10 آلاف جنيه فالمفروض إن الفنان لا يبالغ في أجره وهو يقدم فنًّا هابطًا".
سر رفض محمد صبحي المشاركة في المسلسلات
وأضاف خلال لقائه ببرنامج "نظرة" الذي يقدمه الإعلامي حمدي رزق بقناة "صدى البلد": "أنا كمحمد صبحي بشتغل بفلوسي مش بعمل مسلسلات في القنوات لأن قد تكون مش مستحبة ولكن بشتغل بفلوسي في المسرح".
محمد صبحي يكشف مفاجأة صادمة عن شباك تذاكر السينما
وتابع محمد صبحي: "مين اللي قال إن الفنان بيطلب أجر على قد موهبته دلوقتِ ولا شباك التذاكر بتاعه، اللي بيقطع تذاكر دلوقتِ وبيملأ السينمات لو ما كانش شيء تافه مش هيخشه ودي أرقام".
وأكمل: "الفن جزء أصيل فيه الترفيه ولكن ترفيه منزوع منه الفكر والرسالة مش هيفيد بحاجة، شغل أعمال أنا عملتها واقفل الصورة واسمع بس الصوت هتلاقي ناس بتصرخ، بتكلم عن قضية أمريكا في ماما أمريكا، بتكلم عن وجهة نظر عن قضية سياسية عليا في تخاريف وكارمن وسكة السلامة".
انفعال محمد صبحي بسبب حال الفن في مصر
وانفعل محمد صبحي: "فيه ناس تقول لك أصل الفن ترفيه وتفاهة وكفاية المتعة أن المشاهد بيضحك لأ المشاهد ما بيضحكش، وعيب لما تقول إن قدراتك كلها علشان تضحك تبقى قليل الأدب لأ أنت تضحك بمستوى أنت طالب تحققه في مجتمعك، وكل المفكرين اللي عملوا أعمال زي نجيب محفوظ وإحسان عبد القدوس وسينما كنا بنضحك في السينما وتصرخ كمان".
وتابع: "وضع الفن دلوقتِ لا يليق بمكانة مصر، هل أنت يهمك الإعلام في مصر ولا يهمك إعلام مصر خارج مصر؟ يهمك الاتنين يعني لازم كمان يهمك إن الإعلام يصل للعالم كله، يصل مشوه ولا يصل ان اللي يستقبله يثق فيه ويسمعه؟، يثقف فيه وعنده رسالة والفن كذلك".
الفارق بين الفن في مصر منذ 40 عاما والآن
وواصل: "أنت بتعمل أعمال هتسافر برة وهتلف العالم وناس كتير هتشوفها هو ده اللي كان بيحصل في مصر حوالي 30 إلى 40 سنة، كان الفنان اللي في الوطن العربي إذا ما دخلش مصر وقدم فنه عمره ما يبقى نجم، عايزين نحافظ على دي ونقدم فن يفيد ويرفع قيمة الإنسان، أنت عارف كيف تكتب الكوميديا لإن لها أصول، لازم المؤلف يرجع تاني".
محمد صبحي يفضح حال الإنتاج الفني في مصر
وأكد منفعلا:"احنا مبقاش عندنا دلوقتِ أسامة أنور عكاشة ولا يوسف إدريس ولا نجيب محفوظ ولا العظماء، علشان أنت كبلد مقعد العظماء والمحترمين واللي بيفهموا وبيكتبوا واثبتوا جدارتهم ونجوم سواء ممثلين أو مؤلفين أو مخرجين قاعدين في بيوتهم ليه علشان دمهم تقيل، أنا راجل مبخافش وبنتقد وضع سائد كل الناس بتتكلم عليه في السوشيال ميديا، بقول دوروا على الناس دول وقولوا لهم تعالوا من فضلكم اشتغلوا إنما بنت تطلع في التيك توك بتقول كلام سافل ومنحط بتشتغل في 3 و4 مسلسلات، فيه شركة إنتاج في مصر هي عايزة التريند والكاميرات ما بتروحش غير للتفاهات زي خناقة طلاق، إنما فلان ده عالم تخرج من جامعة عين شمس وعمل اختراع محدش يعبره ولا يبص له".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية
