هنا الزاهد: نفسي أتجوز راجل وما نزلتش دمعة بعد انفصالي عن أحمد فهمي

هنا الزاهد، تحدثت الفنانة هنا الزاهد، لأول مرة عن كواليس انفصالها عن الفنان أحمد فهمي، قائلة: "أنا ست بيت شاطرة، وعمري ما تخيلت إن هيبقى فيه طلاق بعد الزواج، بالنسبة لي إني أمر بتجربة كبيرة ربنا عارف إني معرفش أتحملها جابها لي بالتدريج على 8 شهور علشان ما يبقاش فيه وجع".

كواليس انفصال هنا الزاهد عن أحمد فهمي 

وأضافت هنا الزاهد خلال لقائها ببرنامج “صاحبة السعادة” الذي تقدمه الفنانة إسعاد يونس بقناة "دي إم سي": "اتعملت من تجربة الطلاق دي كتير ولو عاد بيَّ الزمن هدخل التجربة علشان أتعلم منها، وبعد الطلاق حسيت إن الأمر عادي وزيه زي أي حاجة".

وتابعت: "رسمت صورة أن هيبقى فيه عائلة لإني بحب الأطفال بس الواقع كان عكس اللي توقعته واللي كنت بحلم به، بس الحياة مش وردي واتعملت إني مش أي حد الواحد يصدقه ولا يدخله بيته ولا يؤتمن، أنا كنت من الناس اللي بتعامل بحسن نية للأسف، واكتشفت ان الجواز عامة مش راجل وست بس لكن فيه عائلة كمان محيطة".
 

أسوأ فترة في حياة هنا الزاهد

وأكملت هنا الزاهد: "أسوأ فترة في حياتي كانت وقت وفاة والد دينا الشربيني، وإسعاد يونس الوحيدة اللي خدت بالها إني عيني مطفية وقت العزاء".

وأوضحت: "قلت إني بعد الانفصال هتضايق وهبقى غضبانة لكن أنا ما نزلتش دمعة واحدة بعد الطلاق واعتبرته موضوع وانتهى، وعلشان أشفى من القصة بقيت مع عائلتي لإن همَّ اللي بيعطوا الدعم وأمي وإخواتي هما اللي دعموني وقلت أكيد ربنا شايف لي إن ده الخير".

وتابعت:" أنا بصور فيلم فاصل من اللحظات اللذيذة، حصل الطلاق وكان فاضل يومين ودخل ليَّ هشام ماجد وقال لي أنتِ كنت متطلقة وبتصوري عادي فكل اللوكيشن انصدموا وقالوا لي احنا ما حسيناش إن عندك حاجة".

واستطردت: "كنت راضية جدًّا بعد الطلاق واللي تغير فيَّ بعد الطلاق إني كنت ماشية بقلبي أوي دلوقتِ ماشية بعقلي وقلبي، اتقرصت من ناس كتير وما بقيتش على سجيتي مع كل الناس".

وتابعت: "أكن للشخص اللي كان في حياتي معزة وأتمنى له الخير ولو فيه دور حلو جا لي معاه في فيلم ما عنديش مشكلة وهوافق وهو دلوقتِ بقى زميل في الشغل ومش صاحب أوي مش أكتر". في إشارة لطليقها أحمد فهمي.

مواصفات فتى أحلام هنا الزاهد

وعن مواصفات فتى أحلامها، قالت هنا الزاهد: "يكون راجل سند وضهر، بيعمل اي حاجة علشان يرضيني ويشجعني ويفرح لي كل لما أكبر ميغيرش مني، وأحس معاه بالأمان، أنام أصحى محسش إن هيتغدر بيَّ، ولو عملت حاجة وحشة فيه أو اتصرفت غلط يتعامل معايا بحسن نية ويفكر إني بحبه وباقية عليه، أنا مش هتجوز واحد من سني أنا عايزة واحد في الأربعينات".
 

حلم هنا الزاهد تكوين أسرة 

وتابعت:"أنا عايزة أعمل أسرة وأخلف بنت وولد، ممكن اسم البنت لي لي، مش عايزة الفن ياخدني وأجل فكرة الإنجاب".

هنا الزاهد: أمي ضربتني بالقلم في الشارع بسبب قصة حب بالجامعة

هنا الزاهد: تعرضت للتنمر بسبب صوتي التخين وتامر حسني شايفني مغنية

حقيقة ارتباط هنا الزاهد بـ أحمد حاتم

واختتمت: "أنا بحب اشتغل مع تامر حسني وأحمد حاتم ده حبيب قلبي ولما اتطلقت قال لي أنتِ جاية عليَّ بخسارة والشعب بيجوزنا، هو متجوز وأنا عارفة مراته ومفيش الكلام ده طبعًا".

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الأدبية والفنية والثقافية.