الجماعة تصرح: العملية في النملية!

بعد نجاح قوات الأمن في إخلاء ميداني رابعة العدوية والنهضة في ساعات قليلة منذ طلوع الشمس وحتى غروبها كان خلاص قضي الأمر و"اتعشت" وكله عنب.

انقسم الناس في الشارع لأقسام كتيرة.. منهم ناس بيتقال عليهم "نايتي وفافي" وهما اللي قعدوا في البيت من الصبح وما راحوش الشغل وعملوها حجة إن فيه فض اعتصام مع إنهم زمان لما كان بيتفض اعتصام محمد محمود مثلا كانوا بيروحوا الشغل عادي في الغاز.

وفيه ناس تانية قرروا ينزلوا يشوفوا فيه إيه ودول بقى قلبهم كان "واكلهم" على المعتصمين هناك.. وأهه خدوا اللي فيه النصيب من الغاز اللي من الواضح إنهم كانوا أدمنوه وما كانوش قادرين على بعاده وأهه رزقهم بشوية حلوين.

وفيه ناس تالتة بقى راحت الشغل عادي وشغلت السذاجة لحد ما قالوا حظر التجول وقعدوا يجروا في الشوارع كأنهم نمل اترش عليه مبيد حشري فجأة وكأن رمضان لسه ما خلصش وهما عايزين يلحقوا الفطار.

وفيه ناس بقى في رابعة العدوية والنهضة ودول كانوا عايشين يوم ما يعلم بيه إلا ربنا..بس إحنا قلنالهم كتير وحذرناهم وهما كانوا بيصدروا الطرشة.. أهه الإيدين الطرشة طالتهم دلوقتي وما حدش فيهم بقى عارف يقول كلمتين على بعض وكانوا قاعدين بقالهم شهر يعملوا وزارات وأحداث ثقافية و"سواقي" ونهر وبحر المعرفة وحركات وبنات على المنصة وفي النهاية اتفضوا في ساعتين..