تامر حسين: عمرو دياب بيلعب ريست مع حارس العمارة وله مواقف كثيرة فى جبر الخواطر

علق الشاعر والملحن تامر حسين على الأزمة الناشبة بين الهضبة عمرو دياب وأحد معجبيه ويدعى الشاب محمد سعد أسامة، وذلك عقب واقعة صفع الهضبة له على وجهه.

تعليق تامر حسين على أزمة صفع عمرو دياب لمعجب

فى هذا الشأن، قال تامر حسين: “أنا لو مكانك ومش  معاشرِ، ولا أعرف طيبة قلب عمرو دياب ومواقفه الكتيرة فى (جبر خواطر الناس الطيبة البسيطة) من أول العُمال والشقيانين والناس البسيطة، وانحيازه التام  ليهم طول الوقت قدامى والله ومابيرفض لهُمش طلب فى تصوير ولا غير تصوير، وبيكن لهم كُل الاحترام..  لو معرفش عمرو دياب عن قُرب هاقول عمرو دياب إيه الغرور ده؟! وإيه رد الفعل العنيف ده؟! هو هايفترى؟! هو حايدوس ع الخلق؟! طبيعى هاقول كدة وأتبنىّ وجهة النظر دي.. بس أقُسم بالله العظيم لا يهمنى غير شهادتى اللى لوجه الله”. 
 

مضيفًا: فبعيدًا عن رد الفعل اللى حصل نتيجة فعل أو شدة من الجاكيت باينة جدًا جدًا، وبعيدًا عن إن الراجل اتصور مع عمرو دياب تحت لوحده قدامنا، وبعيدًا عن إن أصحاب الفرح نفسهُم مايعرفهوش الراجل الطيب اللى حصل معاه الوقعة دي  مين دعاه أو عزمه ؟ وهو بنى آدم له (كل الاحترام والتقدير)، ولكن هو فعله وتَّر عمرو  دياب كإنسان حد بيشدك حتى ولو بمحبة.. ورد الفعل مش ببرر صحتهُ.. بل هو موقف يتشاف لو انت بتحب عمرو دياب بزاوية ورؤية.. ولو انت عايز تشوف صورة تانية، وتبالغ فيها برؤية تانية.. وده لا يمكن الحجر على أى رأي من الآراء فيه، وللجميع الاحترام والتقدير.. بس ياريت نحُكم بشوية منطق وإنسانية لأن عمرو دياب له مواقف متشافة صوت وصورة محترمة كتير، وله في غير العلن مواقف أطيب وأجمل.. وحقيقى شهادتى مجروحة.. بس والله العظيم قلبه أبيض زى الفُل.. ومُتأكد إنه لو قابل الشاب اللى حصلت معاه الوقعة في ظروف أنسب لا يُمكن كان هايبقى ده رد فعله.. مُستحيل".

أول مرة أشوف عمرو لقيته بيلعب ريست مع “بواب”

واختتم الملحن تامر حسين حديثه قائلا: “ودى شهادة حق لوجه الله وللأمانة لإنى مايرضنيش حد يشوف الراجل ده بصفة مش فيه.. أنا أول مرة أشوف عمرو دياب فى حياتى لقيته بيلعب ريست مع حارس عمارة، كان ساكن فيها حسن الشافعي الموزع، وباشوف إنه رغم حجم شهرته أبسط خلق الله، لا مغرور ولا مُتعجرف، وابن بلد وأصيل، لا يُمكن تختزل مواقف إنسان أيًا كان هو مين في موقف واحد، وتنسى المواقف الكويسة اللى انت تعرفها، واللى ماتعرفهاش،  وشكرا طولت عليكم.. بس دى شهادة حق في رقبتى واجب عليا إنى أوضحها”.

 وبالأمس، فاجأ المطرب عمرو دياب الجمهور برد فعله، في أحد الأفراح الذي أحياها داخل فندق شهير بالقاهرة، عندما صفع شابا حاول التقاط صورة "سيلفي".

ورصدت بعض الكاميرات، لحظة صفع  عمرو دياب، لأحد المعجبين، "بالقلم"، وذلك بسبب طريقة محاولته التقاط صورة تذكارية معه.

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة ، أخبار مصر، أخبار اقتصاد ، أخبار المحافظات، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.