ياسمين صبري تكشف قصة غريبة في حياتها: الفلوس جات لي بالساهل (فيديو)
ياسمين صبري، قالت الفنانة ياسمين صبري: "ذكر عن الرسول صلى الله عليه وسلم، أنه قال خدوا الجنتين جنة الأرض وجنة الآخرة، ومين قال إن الإنسان القريب من ربنا والطاهر والكويس اللي ما بيأذيش حد يعيش زاهد في الحياة ويقول كله هاخده في الجنة، لأ دي هي جنتين".
سلاسة الحصول على الأموال مع ياسمين صبري
وأضافت خلال لقائها ببرنامج "بيج تايم بودكاست" الذي يقدمه الإعلامي عمرو أديب بقناة "إم بي سي": "الفلوس حلوة وجميلة لما تيجي بسلاسة من غير جري الوحوش من غير ما تبقى هوس وهدف لإن لو بقت هدف وما جتش هيبقى الإنسان محطم وكدا غلط، هي تيجي تمتعني وبأجمل وأنقى الطرق".
تجربة ياسمين صبري مع الأموال
وتابعت ياسمين صبري: "أنا تجربتي الشخصية الفلوس جات لي بسهولة شديدة وبأقل مجهود وده نوع من أنواع الرزق، وعملت نفسي بنفسي، وسعيك إنك ما موتش نفسك، ودا مش معناه إن الإنسان ما يبقاش محترف وما يحترمش نفسه، ولكن المجهود يكون بسيط مش مميت ورزقك كبير".
أسرة ياسمين صبري
واستطردت: "أنا من أسرة متوسطة وجدتي ست ربتني وبداية حياتي كنت في مدارس حكومية بعد كده اتطورت لإن مامتي مستواها اتحسن فكنت بانتقل من مدرسة لمدرسة فعشت مع كل الطبقات، وكنت بنت زي أي بنت مصرية ولا عندي واسطة ولا أي حاجة، وتخرجت من الجامعة أمي قالت لي أنتِ هتصرفي على نفسك وتشتغلي واشتغلت أول وظيفة حقيقية كانت في مكتبة الإسكندرية علاقات عامة، وحاولت أتثبت في المكتبة قالوا لي لأ مفيش مكان فاضطريت أسيب المكتبة لإني عايزة دخل ويبقى عندي عربية كحماية وكنت بنت لازم آخد بالي من نفسي في الشارع بدل من ركوب التاكسي وبعد كده اشتغلت وظيفة تانية في الاتصالات وكان عندي مرتب قدرت منه أجيب عربية بالقسط من خلال البنك وكنت مرزقة".
إعلانات ياسمين صبري ووظيفة الاتصالات
وتابعت: "بعد سنة ونصف من شغلي الاتصالات مشوني ودي كانت أحسن حاجة حصلت لي بالرغم من الصدمة، وحاربت وحاولت بس قالوا لي آسفين وتوكلت على الله وقلت عايزة أبقى مذيعة وأشوف لي حلم جديد وأنا ما عنديش أي واسطة في الميديا وأشوف الممثلين في التليفزيون كإنهم شيء بعيد جدًّا ومفيش أي صلة، جيت أقدم في مسابقة جمال مصر فاتلغت وبعد كدا قالوا لي ادخلي مجال الإعلانات وعملت أول إعلان لشركة سيارات وبنيت حيطان كتير حواليَّ وبعد لما أخلص الإعلان ما أكلمش حد قالوا مغرورة أو انطوائية بس دا كان تحفظ وخطوط ما حدش يتعداها معايا ولا عايزة أعرف حد ولا حد يعرفني، وبعد كده اتطلبت في إعلانات تانية لحد لما بقيت أغلى فتاة إعلانات في مصر خلال شهور لإني كنت أعمل إعلانات معينة بعيدًا عن إعلان الصابون وما شابه".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، القسم الثاني، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
