زوجة بيومي فؤاد عن علاقتها به: بنعاني منه ومتناقض طول الوقت وشغله أوفر شوية
بيومي فؤاد، قالت أماني سويدان زوجة بيومي فؤاد: "بعاني كتير منه لإن شغله أوفر شوية، احنا مقدرين الطلب عليه وأنه مطلوب بس يا ريت يكون لينا من الحب جانب ويهتم بينا شوية".
مشكلة بيومي فؤاد
وتابعت خلال لقائها ببرنامج “صاحبة السعادة” الذي تقدمه الفنانة إسعاد يونس بقناة “دي إم سي”: "معظم المسؤولية عليَّ وقلقانة علي بيومي فؤاد وصحته وأتابع بالتليفونات، وهو محتاج ياخد نفسه من صحته وحياته وهو شخص عشوائي وأنا العكس أنا منظمة جدًّا وده عامل لي مشكلة من وقت الخطوبة".
قصة حب بيومي فؤاد
ولفتت زوجة بيومي فؤاد: "أنا حبيت المسرح وشُفت بيومي وكان عندي فضول إني أستكشفه وفي مرة من المرات كان بيصلي على المسرح وأنا قاعدة في المدرجات وبعدين سجد في الركعة الثانية وبعدين سجد في قلبي، واتفاجئت واتخضيت ولقيت نفسي بقول أنا بحب الراجل ده أوي، وهو ما كانش يعرف عني حاجة، وبعدين روحت قلت لهم في البيت إن فيه شخص كذا وهيتقدم لي وهو أصلًا ما يعرفش اسمي، وكانوا في انتظاره واتكلمنا أنا هو بعد كده واتعرفنا على بعض وجاء خطبني".
حب من أول نظرة
وتابعت: "أمي قبل ما يجي كانت بتقول مرفوض من قبل ما يجي، لإني كنت صغيرة وعندي 20 سنة، وبعدين لما وصل البيت حبوه من أول نظرة واتجوزت وأنا في سنة تالتة في إجازة نصف السنة".
ولفتت: "بيومي فؤاد لا رومانسي ولا حبيب ولا نحنوح بس هو مش بخيل، هو جوزائي ومتناقض طول الوقت وأحيانًا يبقى حكيم وأحيانًا يبقى موتور ولما عرفت إنه جوزاء لقيت إن التوافق بينا يكاد يكون منعدم"، ليعقب بيومي فؤاد: "بحبك أوي يا أماني".
وأشارت: "بعت الدبلة أول لما اتجوزنا علشان الظروف ومرة ما كانش معانا إلا 50 قرش يا هو يروح الشغل بيها يا أروح أنا الكلية فاختارنا أروح الكلية علشان أستلف من عمو فؤاد ونقدر نكمل الشهر".
وتابعت: "بيومي فؤاد شخص محترم وصبور جدًّا ودي حاجة كويسة لإني عصبية شوية، بس هو حنين لدرجة الإفساد وإنه مفسد للأولاد وطول الوقت بتاع هذار بعيدًا عن الجد، بس الحمد لله ولادنا كلهم دمهم خفيف".
زواج بيومي فؤاد
من جانبه لفت بيومي فؤاد: "أنا اتخرجت 1990 وهي خريجة 1998 واتجوزنا قبل ما نتخرج، وهي كانت ممثلة كويسة جدًّا بس ما كملتش وشافتني أيام المسرح".
أرخص تورتة في الخطوبة
وأشار: "أنا ما حبتهاش على طول، لإني كنت مستصغر نفسي على الإرتباط وكان في دماغي إني أعتذر لها رغم إني شايفها حلوة ومؤدبة وبعدين ربنا غير الكلام في لساني وقلت لها قصتي وقصة أهلي وقلت لها أنتِ ساكنة فين علشان آجي أتقدم لك، لإن حسيت إن عندها حب حقيقي ومختلفة عن البنات التانية، ومرة كان عندنا عرض مسرحي المخرج هذر معاه وهي بتسأله فين بيومي فقال لها راح المنصورة يتجوز وقتها انهارت وقالت له طيب ما أنا من المنصورة، أنا بكره تقل البنات وبحب البنت تعبر عن حبها وإنها تحب ولد وتروح تقول له حتى لو الولد خذلها يبقى اتعلمت، وهي حطتني في دماغها أوي بالاحتياطات الجميلة اللي عندها، وكنت فرحان اني قلت لها إني موافق أتجوزها وأطلب إيديها من أهلها، وفي 18 يناير 1996 كنت في بيتهم وجايب لها تورتاية رخيصة جدًّا وهي ميلفيه".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
