نص اعترافات المتهم بقتل شقيقه وزوجته ببولاق الدكرور (مستند)
داخل أروقة المحاكم وبين دفاتر القضايا، قصص وحكايات أغرب من الخيال، فهذا قتل أبيه، وذاك أزهق روح زوجته، وتلك اشتركت مع عشيقها فى التخلص من زوجها.. ومن بين تلك القصص، جريمة قتل دارات أحداثها فى منطقة بولاق الدكرور بمحافظة الجيزة، فيها أقدم شاب فى العقد الثالث من العمر على قتل شقيقه وزوجته، وسط الشارع وعلى مرأى ومسمع من المارة، واستطاع الهرب من مكان الجريمة واختفى عن العيون بعض الوقت إلى أن نجحت الأجهزة الأمنية بالجيزة فى إلقاء القبض عليه، وأحالته النيابة العامة إلى محكمة الجنايات التى عاقبته بالسجن المؤبد.
أحداث الجريمة بدأت ببلاغ تلقاه رجال الأمن فى الجيزة من أهالي منطقة بولاق الدكرور، بقيام شاب يدعى اسماعيل، بقتل شقيقه وزوجة شقيقه فى الشارع، بأن وجه لهما طعنات نافذة وسط الشارع.. انتقل رجال المباحث إلى مكان البلاغ، وأجروا المعاينات اللازمة واستمعوا إلى شهود العيان، ثم حضر فريق من النيابة العامة والأدلة الجنائية، واتخذوا كافة الإجراءات القانونية تجاه الواقعة
أجمع الشهود على أن القاتل هو شقيق المجني عليه، وبناء على إذن من النيابة العامة تمكن رجال المباحث من إلقاء القبض عليه، وعند مواجهته أقر بارتكاب الجريمة، وأكد أنه قتل شقيقه “محمد"، وزوجته "داليا"، نظرا لوجود خلافات عائلية كبيرة بينه وبينهما، وأنه غير نادم على جريمته ومستعد لأى عقاب.. وبعد أن انتهت النيابة من التحقيق معه أصدرت قرارا بإحالته إلى المحاكمة الجنائية، وجاء فى نص أمر الإحالة أن المتهم "إسماعيل" بدائرة قسم شرطة بولاق الدكرور بمحافظة الجيزة، قتل المجنى عليها (داليا) عمدًا مع سبق الإصرار، بأن عقد العزم وبيت النية على قتلها إثر خلاف مستعر بينهما، وتنفيذًا لما أضمرته نفسه أعد سلاحًا أبيض وتحين فرصته التي ما إن واتته حتى انهال عليها طعنًا بسلاحه، حتى تيقن من إزهاقه لروحها، وقد اقترنت تلك الجناية بجناية أخرى هي أنه في ذات الزمان والمكان:
قتل المجني عليه شقيقه (محمد) عمدًا مع سبق الإصرار بأن عقد العزم وبيت النية علي قتله إثر خلاف مستعر بينهما، وتنفيذًا لما أضمرته نفسه أعد سلاحًا أبيض، وتحين فرصته التي ما إن واتته حتى انهال عليه طعنا بسلاحه حتي تيقن من إزهاقه لروحه.
اعترافات المتهم بقتل شقيقه وزوجته في بولاق الدكرور
جاء نص تحقيقات واعترافات المتهم كالتالي:
"ما هي ظروف نشأتك؟
انا اتربيت في بولاق الدكرور في أسرة مكونة من ابويا عيد.أ وامى زينب.أ وأخين ابراهيم الصغير ومحمد اخويا الكبير وبنتين هبة الكبيرة وشيماء الصغيرة.
م وما هي درجة تعلقك بشقيقك المجنى عليه؟
انا كنت بحبه جدا وكنت متعلق بيه بس بدأنا نبعد عن بعض واحدة واحدة من أول ما هي دخلت بيتنا.
ما هي الدرجات التعليمية التي حصلت عليها؟
ج انا معايا الابتدائية
س وما هي حرفتك ؟
انا شغال مبلط سيراميك نمرة واحد وساعات لما يكون الشغل نايم يشتغل اوبر على موتوسيكل بتاعي وفي العيد الكبير بشتغل جزار علشان اقلب رزقی وعندى العدة بتاعتي.
س وما هي حالتك الاجتماعية؟
انا اعزب وعمری ما خطبت أو اتجوزت ولا قريت فاتحة.
وما الذى حال دون إتمامك لأى زيجة؟
انا من طبعي جامد ومبحبش الستات.
م وما هي صلتك بكل من المجنى عليهما داليا.ج ومحمد.ع ؟
داليا تبقى مرات اخويا محمد وهو اتجوزها من عمر ابنهم عبد الرحمن.
س وما هو عمر سالف الذكر المدعو عبد الرحمن محمد عبد؟
هو عنده تقريبا ١٢ او ١٤ سنة.
وما هو أثر تلك الزيجة عليك؟
انا كنت مبسوط لحد يوم دخلته لدرجة انه فى فرحه مدفعش جنيه، وانا وابراهيم اخونا الصغير اللي شلنا الشيلة كلها، بس هي من يوم ما دخلت بيتنا وخلت حياتنا جحيم
س وهل رزق المجنى عليهما سالفى الذكر بثمة اطفال بخلاف سالف الذكر؟
هما مخلفوش غير مرة واحدة اللى هو عبد الرحمن وفي مرة هي سقطت بعلم محمد اخويا.
س وما هي تفصيلات إجهاض المجنى عليها ؟
ج هي كانت في أول حملها مبعديش ثلاثة شهور تقريبا ومحمد اخويا مكنش عايزها تخلف فراحت سقطت برة في حتة انا معرفش هي فين.
س ومتى حدث ذلك؟
ج من حوالي سنتين
س وكيف نما إلى علمك اجهاض سالفة الذكر؟
ج هي اللي قالتلي بنفسها.
س ولما رغب شقيقك المجنى عليه في التخلص من الجنين ؟
علشان هو كان دخله قليل وعلى اده.
و ما الذي تقصده بعبارة "هي من يوم ما دخلت بيتنا وخلت حياتنا جحيم"؟
هي كانت على طول عاملة مشاكل مع جوزها ومع اختى الصغيرة شيماء.
و ما هي طبيعة تلك الخلافات؟
هي كانت دايما تعمل مشاكل مع اخويا بسبب المصاريف، وانا كنت دايما بتدخل واديها الفلوس اللي عايزاها، وبالنسبة لمشاكلها مع اختى الصغيرة شيماء كانت مشاكل حريم مع بعض لكن مش حاجة كبيرة.
وهل من أى خلافات بينك وبين المجنى عليهما سالفي الذكر؟
هو بالنسبة لاخويا محمد انا كنت شايل منه، لأنه دايما كان بيعامل أبونا وأمنا اسوأ معاملة مع انه بيعامل الغريب أحسن معاملة وكان دايما بيحصل مشاكل ما بينا بسبب إنه كان بيمد ايده عليهم وكمان بدأ يبقى في مشاكل أكثر من ساعة ما اتجوز داليا والمشاكل كمان كترت من بعد ما داليا مراته اتحبست وطلعت من الحبس وانا كنت عايزهم يأجروا شقتهم اللي في بيت العيلة وياخدوا ايجارها يقعدوا بيه في شقة برة بسبب كلام الناس الكثير عن مراته إن مشيها بطال..
اما بالنسبة لداليا انا ليا معاها مشاكل كثير بسبب اول حاجة انها كانت بتعمل مشاكل كثير مع اخويا وكانت بتقويه علينا ولما كنت بحاول الجأ لحد من اهلها سواء أبوها أو امها مكنش في حد عندهم في البيت بيحل معايا وكمان هي كان مشيها بطال وانا عرفت انها بتكلم رجالة على اخويا وكانت بتستغل عدم وجود اخويا وكانت بتنزل بالليل وترجع بعد الفجر
ولما كنت اسألها بتروحى فين كانت بتعمل نفسها تعبانة علشان تتهرب من اسألتى وكنت كل لما اجي اقول لاخويا على اللي بشوفه منها أو اسمعه عنها كان بيمسك فيا، وساعات كان بيوصل الموضوع الضرب ولو امي ادخلت كان بيضربها هي كمان وكمان قبل ما اقتلهم بكام يوم انا واخويا مسكنا في بعض بسبب أن هو مصمم يقعدها في البيت وضربني وضرب امه وانا كمان ضربته وبعدها بشوية النجدة جت وحلت ما بينا ومضونا إقرارات عدم تعرض لبعض وعملوا مذكرة أو انا بصراحة مش فاكر هما عملو ايه او مضونا على ايه بس محدش فينا راح القسم وامي بس هي اللي طلعت على القسم وعملتله محضر.
وما هو وقع وأثر تلك الخلافات على نفسك؟
انا كنت باكل فى نفسى وبغلى من اللى حصل من اخويا محمد من ضربه ليا انا وامي وانه وصلها انها تدخل الاقسام وكمان انا جبت اخرى من اللي بشوفه وبسمعه في الشارع من الناس وتلقيحهم بالكلام وبقيت خلاص مش قابل وجودهم في البيت ولا بقيت طايق نفسى حتى بسببهم وقررت انى لازم اتخلص منهم من البيت بأي طريقة.
وما هو المخطط الذي قررت انتهاجه للتخلص من المجنى عليهما سالفي الذكر؟
انا حاولت الأول انى اتكلم مع ابوها علشان أقنعه انه يفهمها متجيش البيت عندنا وقعدت احاول برضو مع اخويا محمد، حتى عرضت عليه انه يأجر الشقة بتاعته في البيت العيلة وياخد ايجارها يدفع بيصيرة.
س وهل أفلح ذلك المخطط؟
لا هما فضلو بيجو البيت يدخلو ويطلعو قصادي ويستفزوني وهي كانت بتستفزني وتقعد تقولي " انا قاعدة على قلبكم ومش ماشية "
ومتى راودتك فكرة التخلص من المجنى عليهما ؟
انا بدأت افكر فى انهم لازم يمشو من البيت بأي طريقة من أول ما طلعت من الحبس وبدات افكر في قتلهم هما الاثنين قبلها بيوم
وما الذي دعاك إلى التفكير بقتل المجنى عليهما من الاساس؟
طبعا بسبب المشاكل اللي هي عاملاها وبسبب المشاكل اللى انا شايلها من اخويا بسبب انه دائما ينصرها عليا وييجي في صفها ضدي انا وامي وساعات كان بيضربنا وانا كنت خايف امد ايدى عليه لانه كان جسمه ضعيف..
ومتى اختمرت تحديدا نية قتل المجنى عليهما بذهنك ؟
يوم الخميس ٢٠٢٢/٦/٢٢ لقيت ابن أخويا عبد الرحمن بيقولي " هي عمته بتبص لي بصات وحشة ليه هو أنا عملتلها حاجة " فأنا ساعتها حسيت ان الحية اللى اسمها داليا بدأت تبخ سمها في الواد عبد الرحمن هو كمان وهتولع البيت حريقة.
س وما هي الخطة التي وضعتها لقتل المجنى عليهما ؟
انا فكرت انى اقتلهم بالسكينة اللى كانت عندى واستخدمتها اليوم ده.
س وما الذي دعاك الى انتقاء يوم الواقعة لقتل المجنى عليهما؟
أنا كنت مستنى اول فرصة تجيلي ومايكنش عبد الرحمن ابنهم معاهم، علشان ميشفش منظر اللي هيحصل ويوم الجمعة شفتها نازلة لوحدها من البيت ولما لقيتها راجعة هي ومحمد لوحدهم قلت دى الفرصة المناسبة.
وما هي تفصيلات إقرارك؟
يوم الحادث لما لقيتها نازلة وبرضو لقحت بالكلام ولقيت عبده مش معاها نزلت وقعدت في المحل اللي تحت البيت والسكينة كانت موجودة في المحل واول ما لقيتها راجعة هي ومحمد اخويا حاولت اني اقولهم بالعقل ميدخلوش البيت لقيت محمد بدا يضربني بشنطة كانت معاه في ايده فقلت مبدهاش ورحت داخل جايب السكينة من المحل والناس بدأت تتلم ومكنتش شايفهم وسط الناس ورحت داخل العمارة افتكرت انهم طلعوا فوق ولما وصلت فوق وملقتش حد رحت نازل وفي الوقت ده لقيت باب العمارة الحديد مقفول والناس هى اللى قفلته علشان مطلعلهمش فرحت داخل شقتي انا وامي اللي في الدور الأرضى ونطيت من شباك الأوضة على الشارع ولقيت محمد فى وشى اديته ضربة بالسكينة في صدره، فهو حاول يمشى وادائى ضهره رحت مديله ضربة كمان ورحت رايح على داليا واديتها حوالي 5 ضربات في صدرها وبطنها وكتفها الشمال وراحت واقعة فأديتها ٢ ضربات كمان في رجليها الاثنين ورحت رايح على محمد اديته الضربة الثالثة في صدره قدام السوبر ماركت اللي بعدنا بعمارة وبعدها مشيت وخبيت السلاح في جراج من الجراجات والمباحث جت اخدتني".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
