ابني كسفني، حنان تكشف عن موقف محرج بعد مواجهتها بعلاقتها بـ سامح الصريطي
سامح الصريطي وحنان، قالت الفنانة حنان: "لما زارنا الفنان سامح الصريطي في البيت بعد لما عزمته علي الغداء، هشام ابني سألني وقال لي هو كان جاي ليه؟ هو عايز يتجوزك؟ فأنا اتخضيت أوي وقلت له: هو كلمك؟ وكانت أول مرة في حياتي أتكسف اتكلم مع ولادي، فقلت له: لأ مش عايز يتجوزني. بس هو بعد كده عرف ووافق على زواجنا".
خوف ابنة حنان من زواجها من سامح الصريطي
وتابعت خلال لقائها ببرنامج “صاحبة السعادة”: "أميرة بنتي لما رُحت قلت لها أونكل سامح طلب يتجوزني فضلت مبلمة وقالت لي: يعني أنتِ موافقة؟ وكنت عاملة لها مليون حساب ومحرجة فقلت لها: بفكر؟ فاتاخدت جدًّا وقلقتني فقالت لي: يا ماما أنتِ شايفة إن ليها لازمة؟ فقلت لها الحياة والوحدة مش لذيذة وأنتِ في ألمانيا دايما. فقالت لي: “خلينا نشوف”، ولما سامح طلب يشوف أميرة وعزمنا في البيت في وجود بناته ابتهال وآية، لما قعدت معاه لقيتها موافقة وقالت لي: “هو كويس بس خايفة تروحي مني”، فقلت لها “مفيش حاجة تخليني أروح منك”، وأميرة طبيبة ومخطوبة وخطيبها كان موجود، أميرة متعلقة بيَّ تعلق غير عادي وأحيانًا بتعاملني ملكية خاصة ليها، لكن تاني يوم جت قالت لي أنا فكرت ومش هلاقي أحسن من أونكل سامح لإنه دماغك ومش عايزة أظلمك ولا أضايقك وبعدين حضنتها وعيطت وبعدين قلت لها: “مش هاعمل حاجة غير موافقتك أنت وهشام”، وأصلًا أنا كنت عايشة لوحدي وهشام لوحده وأميرة بنتي بين ألمانيا وباباها".
إعلان خبر الزواج بسامح الصريطي
وتابعت حنان: "انا قلت موضوع جوازي لأولادي وقرايبي والناس اللي تهمني، وقوانين الزواج في السن ده بتفرق كتير، وقعدت 10 سنين زوجي متوفي، والحياة كانت قاسية لأقصى درجة ومكنتش عارفة أتأقلم إني أعيش لوحدي في فيلا كبيرة وقررت آخد بيت صغير جنب ولادي، وبعد 5 سنين بدأت اتأقلم وبعد كده ارتحت مع الوحدة بس كان ينقصني الدماغ اللي تسليني وأخرج وأسهر معاها، كنت حاطة لنفسي قيود مش عارفة اطلع منها، كانت شروطي مع سامح إن كل واحد في بيته وهو هاودني في الأول بس بعد كده رفض، كان الونس إني ألاقى حد اتناقش معاه ويبقى فيه وقت لينا، ونحس مع بعض بالونس، الواحد لما بيكبر بيكون خلاص خد خندق صعب جدا يخرج منه ومسألة صعبة أنه يغير الوضع لإن مصدقنا إننا وقفنا هنا وارتحنا، فكانت وجهة نظر أن العلاقة طول ما هي خفيفة وحتى قلت له لا تقولي مشاكلك ولا أقولك مشاكلي فقال لي هو ده ينفع وبصراحة انا تعبته جدا في الأول وهاودني".
سر حب حنان لسامح الصريطي
ولفتت:" أكتر حاجة حبتها في سامح الصريطي فاجئني أنه لو قلت له حاجة مش هينام إلا لما يعملها ويقولي تعالي علشان نخلصها، وهو كريم لدرجة كبيرة وعطوف جدا، ودي صفات مكنتش شايفاها في الأول ولكن لما عاشرته لقيت الصفات دي متوفرة فيه، والميزة اللي عجبتني فيه انه كان بيحتويني الي أقصى درجة ولما دوست فيه كان بيحتملني، وانا حبيته بسرعة أوي، والحب العقلاني أفضل واحسن بكتير من حب الشباب، والحياة مع الحب العقلاني هو اللي بيستمر، وهو كان متفهم لظروفي النفسية والخضة اللي كانت متغلبة عليَّ بسبب دخولي في زواج مكنتش اتخيله".
وأشارت:"عمري ما حبيت حد في الأول وما عِشتش حالة اني اقول لنفسي حبي ده وعيشي مع ده الا مع سامح الصريطي وبقيت احبه اكتر بعد لما اتجوزنا، لإنه بيعمل كل اللي كنت بحلم به ومش متخيلة انه ممكن يكون علي ارض الواقع بيحصل".
نسمة هادئة وزوجة صالحة
وعلق سامح الصريطي:"كنت حريص علي اني احمي قرار زواجي من حنان واتجنب كل اللي يعطل القرار ويفسده، اللهم ارزقني بمن تعنيني علي ذكرك وشكرك وحسن عبادتك وحنان كانت الإنسانة دي ولقيت الإنسانة اللي بدعي ربنا طول عمري إن ألاقيها، واحنا بنعين وبنشجع بعض، وهي بتقدم خير كبير دون أن يعلم أحد وبقينا نشترك في الخير ده مع بعض، وهي اسم على مسمى ونسمة هادئة، وقمة سعادتي إني اشوفها سعيدة وبتضحك ومبسوطة وده قمة الحب".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الأدبية والفنية.
