السيسي: المصريين قادرين يتحملوا مآسي وتعب وبنقول لربنا يا كريم اعطف علينا
السيسي، قال الرئيس عبد الفتاح السيسي:"أقول لوزيري البترول والكهرباء خلوا الناس تبقى عارفة الحكاية الخاصة بأزمة انقطاع الكهرباء لأن من حق الناس إنها تعرف وأحسن حاجة ربنا قالها الصدق وخليك صادق بدون مواءمات سياسية، مفيش حاجة اسمها مواءمات سياسية في ظروف بلد زي بلدنا، فيه حقائق تتقال للناس علشان الناس تشيل معاك الناس مش بسيطة الناس في مصر بقالها سنين طويلة متحملة مآسي وتعب وهما يتحملوا بس قولوا لهم".
أمل مصر الاقتصادي
وتابع خلال مؤتمر حكاية وطن: "نسأل الله سبحانه وتعالى أنه يوفقنا ويجعل في الـ110 حفر بئر استكشافي من الغاز اللي وزير البترول أشار ليهم، فرج لينا وده الأمل اللي بنطلب من ربنا يساعدنا به وده اللي مش محسوب خالص".
دعاء الرئيس السيسي
وأكمل الرئيس السيسي خلال كلمته: "بنقول لربنا يا كريم يا غني اعطف علينا".
في نفس المؤتمر، قال الرئيس عبد الفتاح السيسي: "المهندس طارق الملا دايمًا يتخانق مع الدكتور محمد شاكر علشان فيه ما بينهم رباط، والدكتور مصطفى مدبولي رئيس الوزراء يخلص".
أزمة محطات الاسالة بعد 2011 ومشكلة حالة الفوضى
وأضاف خلال مؤتمر حكاية وطن: "مهما أنتجنا من بترول فالإنتاج يتراجع ولو توقفت الاستكشاف سيكون له تأثير في القطاع وأيضًا على الكهربا، وعلى لما تستعين الثقة وتطمئن الشركات إنها تشتغل تاني الموضوع بياخد وقت، نتيجة عدم الاستقرار توقف إنتاج البترول والاقتصاد بالتالي خرب والكهرباء بدأت تتقطع بالتالي تخرب الدولة، عشرات المليارات الدولارات كانت قضايا تحكيم ضد الدولة متمثلة في قطاع البترول بسبب حالة عدم الاستقرار بعد 2011، ومحطات الإسالة توقفت في 2011 بسبب المظاهرات اللي كانت اللي بتحصل في المنطقة دي والأشرار كانوا بيخلوا الناس تعمل مظاهرات والدنيا تقف والمحطة متشتغلش والشركة الأجنبية تنسحب ويعملوا علينا قضية بمليار دولار واحنا في حالة لكل دولار، اهل الشر كانوا يتعمدون توقف محطات الإسالة في 2011، الحكاية اللي احنا بنحكيها أنا لما توقفت الشركات عن الاستثمار تراجع الإنتاج وبالتالي حدثت مشكلة وقود في مصر ودا اضطرينا إننا نشتريه من برا بالدولار وخلصنا الاحتياطي النقدي الأجنبي بتاعنا، الناس لازم تعرف ان كل خطوة بتتعمل بيكون لها فعل ولكل رد فعل والناس لما تتخانق في الشقة الشقة بتتبهدل احنا مش بنتكلم في الدولة، اللعبة اللي بتتلعب معانا دلوقتي إزاي نخربها، ولما كنا بنتفاوض بالنسبة لحقل ظهر وعدت المستثمر إني أحل له أي مشكلة وأخلص له أي إجراءات علشان الحقل ينتج بعد سنة لإنه لما دخل رحمنا من الاستيراد وكمان احنا كان عندنا اتفاق مع الأردن لازم نوفي بالتزاماتنا علشان محدش يرفع علينا قضية في التحكيم الدولي، أي مشروع بنعمله بسرعة علشان اللي احنا فقدناه في 50 سنة كتير أوي ولازم نشتغل بالمعدلات اللي احنا فيها دي 20 او 30 سنة ".
وتابع السيسي: "العلاقة بين الاستقرار والظروف الاقتصادية عميقة واصيلة، علشان كده بحذر المصريين قد لا تعود بلدنا مرة تانية ونخش في حالة عدم الاسقرار لـ40 سنة مع أي دعوات للفوضى مجددًا".
ولفت: "رجعت معدلات الاستكشاف عن الغاز الفترة الأخيرة بشكل طبيعي بعد أزمة كورونا والحرب الروسية الأوكرانية".
رخص سعر الكهرباء
وأشار: "الكهربا كانت بتتقطع لإن طارق الملا مش قادر يعطي وزير الكهرباء الوقود والغاز بنفس الأسعار، لازم يخلى باله من الغاز لإنه مطالب يوفر بنزين وسولار للعربيات، طيب مين يستحمل احنا، يتصرفوا ازاي، اكتر من كده سلف، هنتصرف منين؟ احنا عندنا انتاج بناخده كله وكمان إنتاج الشريك والشريك عايز فلوسه بالدولار بينما الكهربا بتحصل فلوسها بالجنيه، فيه 17 مليون مشترك بياخدوا الطاقة بأقل من ربع ثمنها، وفيه حد بيدي حاجة بربع ثمنها في بلد زي مصر، وزير البترول عايز الفلوس علشان الشريك والدكتور محمد شاكر مش معاه لإنه بيعطي الخدمة بربع ثمنها، وعلشان كده مهم نوعى ونفهم الناس الحكاية صح انا مش بعاتب لكن بدردش معاكم، ايام المهندس شريف إسماعيل كان عندنا احتياطي بوتاجاز لـ8 أيام، وبعدين اتعمل مستودعات بوتاجاز علشان يبقى عندنا احتياطي لمدة 60 يوما ومخزون يكفى احتياج الناس، والحاجات دي مبتتعملش إلا إذا كانت البلد قاعدة تشتغل وتنفذ خطتها بجدارة".
السبب وراء أزمة انقطاع الكهرباء
ولفت: "لما الكهربا تتقطع لازم نطلع نقول الحقيقة للناس، متخافش دكتور شاكر اطلع وقول، بعد لما كنا بنقل دعمنا تراجع بسبب تغير سعر الصرف زاد الدعم تاني للمواطنين، وزير الكهرباء بياخد متر الغاز بـ3 دولار بينما وزير البترول بيبعه في السوق الأجنبي بـ12 دولار وفي السوق المحلي بـ8 دولار".
رسالة السيسي للمصريين
وتابع: "اسمعوا يا مصريين اوعوا تداروا وشكم مني، ده بلدنا بتاعتنا كلنا، الغلبان اللى ماشي في الشارع له اللي ليا وعليه اللي عليا، كل مواطن له حقوق وعليها واجبات للنهوض بالدولة وتحمل الظروف، ممكن يحصل أزمة في عدم توافر الوقود في المحطات ووقتها نمسك في الحكومة بسبب أزمة الدولار، طيب هنعمل إيه؟".
سرقات الكهرباء
وأكمل:"علشان خاطر عيون بلدنا لازم بلدنا كلها تقف كده علشان تسدد سلفها وديونها، طارق الملا عايز فلوسه من الدكتور شاكر بالدولار والدكتور شاكر مش معاه، والدكتور شاكر بيبعت لي مليون حادثة سرقة كهربا كل شهر ومش بتقل، طيب الكهربا اللي بتدفع ربع تمنها الناس مش عايزة تدفعها، فالدكتور شاكر مش عايز يدفع لوزير البترول ووزير البترول يحرم عليه ما يدهوش الغاز والوقود فالكهربا تتقطع فالناس تشتكي وتقولوا الحكومة نايمة، ويطلع الدكتور شاكر يقول لو أعطوني غاز مش هيحصل قطع في الكهرباء طيب نجيبلك منين وانت مش قادر تدفع للبترول، دي الحكاية الحقيقة اللي حكيتها وأسيبلكم الحكم".
ونقدم لكم من خلال موقع (فيتو) ، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
