بعد خضوعه لثلاث عمليات جراحية.. باسم يوسف: يا أنا يا الحسد!

فاجأ الإعلامي باسم يوسف جمهوره ومتابعيه بصوره صادمة لها وهو على كرسي متحرك وحاملًا بإحدي أيده عكازًا وذلك عقب أن خضع لإجراء جراحي..

الإعلامي باسم يوسف

ونشر باسم الصور عبر حسابه الشخصي بموقع “فيسبوك” كاشفًا عن تفاصيل الإجراء الجراحي وقال على طريقته بشكل ساخر: تالت عملية غضروف في تلات سنين.كورة، باسكت، كورة، ركبة يمين، ركبة شمال.. خليني في الجيم أحسن”.

مُشيرًا إلى أن مواعيد حفلات المسرحية ستقام فى موعدها دون تأجيل.. وتبدأ بجامعة بونج ايلاند في نيويورك ( 28سبتمبر) وفي بورتسموث ميسو هامبشير( 29 و30سبتمبر) وتابع بأنه سيواجه جمهوره على المسرح بواسطة العكاز.

وكتب باسم فى منشور آخر: انا عايز اشكر كل الناس اللي بعتت وكتبت كلام لطيف جدا عشان العملية. لكن فيه حاجة لفتت نظري في التعليقات على البوست اللي فات. كتيييير قوي شايفين ان ده بسبب اني بانزل صور الجيم والرياضة وكده ان ده سببه الحسد. وان عشان نزلت صورة من كام يوم فالعملية دي كانت نتيجة الحسد. 

وتابع قائلًا: هو انا اسف اني احبطكم بس غضروف الركبة مقطوع بسبب ماتش كورة من سنتين وعشت بيه عادي ولما الالم زاد وما بقتش عارف اجري العملية تم تحديد ميعادها من تلات شهور واخترت النهاردة لاني عندي عشر ايام مافيش فيهم سفر فمالهاش علاقة. لكن سيبكم مني ومن مشاكلي التافهة. انا عايز اناقش موضوع الحسد ده. ماشي يا جماعة مذكور في القران وعلى عيننا وراسنا. لكن برضة مش ده دين عقل ودين اقرأ وفيه مخ ربنا انعم علينا بيه؟ لو الموضوع كده، ليه مش بنحسد اسرائيل عشان نحرر القدس ؟ ليه ما حسدناش امريكا وروسيا وهما بيتدخلوا في الشرق الاوسط ؟ ليه الحسد مش بينفع مع رونالدو جورجينا وهما راكبين احلى عربيات وبيلبسوا احسن لبس وقاعدين في احسن قصور ورونالدو عنده فوق ال ٦٠٠ مليون متابع على انستاجرام. ليه الحسد يسيب ده وييجي علينا احنا ؟ جالي ردود لطيفة قوي: اصل دول مش مسلمين. طب الطغاة والظلمة اللي عندنا مش مسلمين ؟ رد تاني: اصل الحسد ما ينفعش مع الدول (و الله قالوا كده). طب ما نحسد نتنياهو ؟ او نلف على كل واحد من القادة بتوعهم ونحسدهم. ياللا كل واحد ينام ع الجنب اللي يريحه. على العموم انا نازل الجيم بكرة وبالعكاز ويانا يا الحسد بقى.

ومؤخرًا..  كشف الإعلامي باسم يوسف، عن تزييف متعمد للتاريخ تتبناه شبكة نتفليكس خاصة بعد طرحها التريلر الخاص لفيلمها الوثائقي الجديد، الذي يدور حول الملكة البطلمية كليوباترا السابعة آخر حكام البطالمة لمصر.

وقال باسم على صفحته بـ "فيس بوك" مرفقا بمقطع فيديو للمداخلة: "مداخلتي مع بيرز مورجان في موضوع فيلم كليوباترا على نتفليكس، أنا انتهزت الفرصة واتكلمت عن  التزييف المتعمد للتاريخ من ناس زي كيفن هارت أو حركة الأفروسنترزم أو ادعاءات ناس زي ستيفن سبيلبرج أن اليهود بنوا الأهرامات".

وأضاف: "اتكلمت عن إزاي واحدة زي  جال جادو تمثل دور كليوباترا مع مساندتها الحكومة الإسرائيلية وأن دي إهانة  أكبر بكتير من لون بشرة ممثلة".

وتابع: "أنا اتكلمت أيضا عن كل ده مع احترامي الحضارة الأفريقية العظيمة في غرب أفريقيا، في الآخر إحنا كلنا أخوات ومن القارة دي لكن تزييف التاريخ مشكلة كبيرة".

واستطرد في تويتة أخرى: "ناس من غرب أفريقيا وجنسيات تانية متفقين مع وجهة النظر اللي أنا طرحتها. مهم جدا لما ندافع عن وجهة النظر أو تاريخنا اننا نعمل ده بأدب واحترام للحضارات التانية. ما يصحش أبدا أننا واحنا بندافع عن تاريخنا أننا نهين أو نقلل من عرقيات أو حضارات أخرى عشان كده أنا أصريت أني أتكلم باحترام عن حضارات غرب أفريقيا لأن الناس دي مش أعداءنا وحيحترمونا لما نحترم تاريخهم.  وكمان مهم أننا نتكلم عن التزوير الممنهج من أيام الستينيات لدرجة أن في ناس مصدقة موضوع أن اليهود بنوا الأهرامات وده كلام تاريخيا مش صح ".

وكان أختتم حديثه بــ: "مهم أننا ما ننجرش بحوار أبيض وأسود ده لأن ده حوار أمريكاني صرف بين البيض والسود هناك ومش المفروض نتجر في حتة عنصرية. بالعكس أنا قلت إنها إهانة أكبر بكتير أنهم يجيبوا واحدة زي جال جادو جندية إسرائيلية سابقة ومؤيدة لقمع حكومتها للفلسطينيين أنها تمثل دور كليوباترا. مش المفروض نتحمق أن كليوباترا كانت بيضا أو سودا أو يونانية أو إفريقية، المفروض ناخذ الكلام في حتة الناس  تحترمك فيها وتقف معاك من غير ما تنفرهم. الحوار في الوسائل الاعلامية الغربية لازم يكون بحساب ومدروس ولازم تفهم جمهورك وتشوف مين". 

نقدم لكم من خلال موقع (فيتو)، تغطية ورصد مستمر علي مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.