جماهير الكرة يكشفون سر هزيمة مصر أمام تونس، والغضب يسيطر على النشطاء بعد الخسارة
مباراة مصر وتونس، أثار هزيمة منتخب مصر أمام تونس، في المباراة الودية، التي أقيمت بين الفريقين أمس الثلاثاء، غضب جماهير الكرة المصرية، وخاصة أن المنتخب لقى أول هزيمة له بقيادة مدربه روي فيتوريا.
سر هزيمة المنتخب في مباراة مصر وتونس
أصداء مباراة مصر وتونس ألقت بظلالها القاتمة على جماهير الكرة المصرية، وأرجع الجماهير خسارة منتخب مصر لتمسك الأهلي بعدم مشاركة لاعبيه الأربعة، في الوقت الذي أصر قائد منتخب تونس على مشاركة اللاعب علي معلول، في حين أكد آخرون أن سبب الهزيمة يرجع لعدم وجود الجماهير في الاستاد.
حالة الغضب من هزيمة المنتخب في مباراة مصر وتونس عبر عنها محمد سالم فقال: "زمان ماتش تونس ومصر كان يتقفل فيه الاستاد بالجمهور، ارجعوا لماتش مصر وتونس الأولمبي، مش الفريق الأول حتى فى أوليمبياد ٢٠٠٠ أو ٢٠٠٤، ارجع كده لماتشات مصر مع السنغال والمغرب والجزائر فى تصفيات كأس العالم ٢٠٠٢ وشوف المهزلة الموجودة حاليا ستادات خاوية على عروشها... ولا تجمعات غير بتاعة المهرجانات فى الساحل علشان دول مفيش منهم قلق مطربين المهرجانات اللى بيحضرلهم ٥٠ ألف..."
أما سعيد عياد ففسر هزيمة مصر أمام تونس قائلًا: "منتخب مصر وتونس بيلعبوا ماتش ودي بس طبعا ده بيفرق في تصنيف المنتخبات وهيساهم في أفضلية وصولهم لكأس العالم؛ الاهلي ليه خمس لاعيبه في المنتخب المصري ولاعب في المنتخب التونسي النادي ده قرر يسحب لاعيبته من المنتخب المصري وساب لاعب المنتخب التونسي عشان مقدرش يسحبه لأن فيه اتحاد تونسي مش بيرضخ للتخاذل... وهدفه الأول والأخير مصلحة بلاده فقط على حساب اي شيء؛ دي مش أول مرة تحصل".
لاعبو الأهلي وسر هزيمة المنتخب أمام تونس
وعلق عياد قائلًا: "المنظومة الرياضية عندنا تؤيد ناديا على حساب المنتخب ما بالك بقي بالمنافسة مع باقي الأندية"نفس النادي كان السبب في عدم صعودنا لكأس العالم اللي فات، بسبب ان مدرب المنتخب ملعبش ماتشات وديه كفايه عشان يريح لاعيبه الأهلي واكيد كلكم فاكرين.. الكورة في مصر سمعتها بقت في الحضيض والمسرحية الهزلية لسه مكملة عشان عندنا وشوش على الساحة عمرها ما فكرت في المصلحة العامة لكن بتفكر بس ازاي ارضي جمهور حتي لو علي حساب المنتخب الوطني.. انت داخل دولته... وليس مصر..."
أما أحمد سليم فرد قائلًا: " في ناس كتير بترجع سبب الهزيمة إمبارح لعدم وجود لاعيبة الأهلي! يذكر أن آخر ماتش بين مصر وتونس في البطولة العربية خسر المنتخب المصري بهدف عمرو السوليه لاعب الأهلي في مرمي منتخب مصر مرتديا شارة الكابتن في ال+90"
أسباب هزيمة منتخب مصر أمام تونس
وأرجع أحمد الشريف هزيمة مصر أمام تونس لعدة أسباب، فقال: "ياجماعه تعليقا على ماتش مصر وتونس في كذا نقطه أولها كويس انك خسرت في ماتش ودي علشان تعرف نواقصك ايه فاتضح انك ماعندكش مدافعين صح غير عبد المنعم وأحمد حجازي ربنا يشفيه والونش ربنا يشفيه الباقي لايستحقوا تمثيل المنتخب وده فشل من المدرب أنه ماشافش حد جديد أو لأن دي قماشه اللاعيبه للاسف ودي كارثة".
وأضاف الشريف "ثانيا الباكات حقيقي مافيش بدائل لا باك يمين او شمال باستثناء فتوح وعمر كمال ويمكن محمد هاني لكن بصراحه الباقي مافيش ودي كمان ثغره من المدرب أو دي قماشة اللاعيبه فدي كارثه كمان.. ثالثا: حراسه المرمى واللي كنا مميزين فيها أن لو الشناوي غاب مستوى الحراس اللي بعده زي ابو جبل أو محمد صبحي واقع جدا بقالهم فتره فهل مافيش خيارات ثانيه خاصه أن المركز ده كان عندنا فيه حراس مميزين كثير ودي كمان كارثه بصراحه اغلب الأهداف اللي دخلت فيها بسبب سوء تمركز او قله إمكانيات حارس المرمى والدفاع للاسف وده محتاج شغل كبير من المدرب قبل كاس افريقيا"
وتابع أحمد الشريف: "اخيرا الاتحاد الافريقي ليه يحط ماتش سوبر بعد 3 ايام من توقف دولي وخارج القاره يعني كان ممكن يرحلها يومين ليه التعنت خاصة الماتش ده المفروض كان أول سبتمبر قبل التوقف فده ضر لمصلحة المنتخب والاهلي وخلق مشكلة بين الأهلي واتحاد الكوره وكلا كان على حق لكن مثلا المنتخبات الثانية اللي عندها لاعيبه زي جنوب افريقيا أو مالي أو تونس مش مجبر أنه يرجع اللاعيبه زي مامدرب المنتخب سمح للاعبيه الاهلي انا لو من مسؤولي الاهلي أعلن انسحابي من الدوري الافريقي اللي هيسبب ضغط للفريق وصدامات أخرى مع المنتخب".
سر بقاء علي معلول في مباراة مصر وتونس
أما هاني عبد العاطي فقال: " كلنا شفنا ماتش مصر وتونس...وشفنا على معلول بيلعب وبعد الماتش سافر على السعودية يحصل بعثة الاهلى فى ماتش السوبر الافريقى...السؤال بقى...ليه الاهلى مرفضش لعب معلول مع تونس وطلب انه ينضم للفريق لمصلحة النادى؟...ليه سحب ال ٤ لاعيبة وسافروا بعد ماتش اثيوبيا مش المفروض كانوا يلعبوا زى معلول ويسافروا سوا على السعودية للسوبر؟ وليه جمهور الاهلى والنادى نفسه اعترض على إراحة صلاح ماتش إثيوبيا مع أنه مش من حقه أنه يعترض؟".
وتابع هاني عبد العاطي قائلًا: "الإجابة واضحة أن الأهلى اقوى من اتحاد الكرة والنادى الاهلى اهم من المنتخب لكن مقدرش على الاتحاد التونسى علشان عندهم المنتخب اهم من الاندية...علشان كدة تونس عندها اتحاد قوى ومنتخب قوى وهو دة الاهم والاندية اللى فى تونس بتمشى بلوائح وقوانين الفيفا والاتحاد القوى ومتقدرش تعترض... ومحدش اهلاوى متحمس يطلع يقوللى اصل المنتخب اتغلب علشان لاعيبة الاهلى ملعبتش او انا كاتب الكلام دة علشان زعلان او لاعيبة الاهلى دول احسن لاعيبة فى المجرة...دة تحليل من ناس مش بتفهم كورة..."
وقال عبد العاطي: "للاسف الكورة انتهت فى مصر ولسه حتنتهى أكتر خصوصا على مستوى المنتخبات... طول ما فى نادى أو أندية متحكمة فى المنظومة الرياضية حتى لو كان نادى ناجح يا سيدى لكن مش المفروض يفرض شروطه على الدولة والاتحاد... على العموم والله احسن ريحتونا يعنى هى جت على الكورة... أنا تاعب نفسى ليه....ما كله بقى محصل بعضه".
وعلق عمرو سالم قائلًا: " سألت مدرب تونس في المؤتمر الصحفي بشكل صريح هل طلب منك إعفاء علي معلول من مواجهة مصر عشان يقدر يلعب ماتش السوبر قالي حصل بالفعل والأهلي كلمني مباشرة ولكن تونس خط أحمر. سألت فيتوريا مدرب منتخبنا عن لاعبي الأهلي وان المنتخب دايما منقوص العدد في معسكراته الماضية جاوبني في ما معنى كلامه " انا مغلوب على أمري ومش مرتاح !.. ده ملخص ماتش مصر وتونس.. عرفتوا ليه احنا اتغلبنا لأن المنتخب عندنا للأسف صوته أضعف من الأندية".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الأدبية والفنية والثقافية.
