ابنة ممدوح وافي تبكي وتكشف قصة اكتشاف إصابته بالسرطان مع أحمد زكي (فيديو)
![ممدوح وافي وابنتة](images/no.jpg)
ممدوح وافي، كشفت الفنانة ياسمين ممدوح وافي، كواليس من علاقة والدها الفنان الراحل ممدوح وافي بالإمبراطور أحمد زكي.
علاقة أحمد زكي بممدوح وافي
وقالت ياسمين ممدوح وافي خلال لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "والدي وأحمد زكي كانوا قريبين جدا في فترة الدراسة خاصة أنهم كانوا هما الاتنين مغتربين، وقاعدين في شقة واحدة، وأي حد فيهم يحقق نجاح كان التاني يتولى العزومة.. بابا كان حنون وأحمد زكي كان بيقدر الناس الحنينة، ومن يبادله الحب الصادق ويدعمه في كل المواقف".
دعم ممدوح وافي لأحمد زكي
وتابعت: "أحمد زكي مكنش بينسى الكلمة الحلوة، ولما ربنا كرمه وأخد خطوات كبيرة في النجاح بالتمثيل كان عنده إصرار شديد إنه عايز ياخد ممدوح وافي معاه في أي فيلم، وافتكر إن كانت كل مشاكلهم على إنه ازاي متبقاش معايا في الفيلم فبابا يقول له مش دوري، فيتخانقوا وأحمد زكي يقول له هنغير في الورق، فوالدي يقول له كده غلط".
إصابة أحمد زكي وممدوح وافي بالسرطان
ولفتت: "أحمد زكي أصيب بالسرطان وبعدين بابا ممدوح وافي أصيب بالسرطان، والدي اكتشف إصابته بالسرطان بالصدفة".
رحلة مرض أحمد زكي ودلع السرطان
وأشارت باكية: "والدي كان مع أحمد زكي في رحلة مرضه، وكان عنده جملة شهيرة اتعرفت للناس المقربين كان يقول له مش هنسميه سرطان هنسميه سوسو علشان نهينه، وتعالى يا سوسو، روح يا سوسو، فكان بيتغلب على كل حاجة بالضحك".
اكتشاف ممدوح وافي السرطان بالصدفة
وتابعت باكية: "أحمد زكي كان بيعمل تحاليل معينة بيعملها كل فترة، فهو كان بيخاف منها لإنها كانت أشبه بأنه بيدخل تابوت، فوالدي كان بيقول له أنا هفضل جنبك، وهخش جنبك، ومرة عمل معاه نفس الأشعة والتحاليل ومر بكل الخطوات في نفس اليوم، فالدكتور تاني يوم كلمه قال له: أنا عايزك تيجي لي تاني بكرة، وأعاد له تحاليل وفحوصات، بعدها قال له ممدوح: إنت عندك سرطان في البنكرياس وكان سابق أحمد زكي في مرض السرطان، بس علشان متعود على عافية المسرح، ورجله تجيب دم، فيكمل ولو تعب يقول أكيد السكر، ولو أُجهد يقول من الشغل، بس لما عمل فحوصات طبية مع أحمد زكي عرف انه مريض سرطان، ومبطلش شغل وكان بعدها بيروح الشغل، وأخفى على أحمد زكي مرضه بالسرطان لإن كان نفسيته هتدمر، أحمد زكي لما عرف كانت نفسيته صعبة".
وأشارت: "أحمد زكي كان بيقول لي أنا عمك وباباكي، مش صاحبي ده أخويا".
مقبرة أحمد زكي وممدوح وافي
وأكدت: "أحمد زكي طلب من والدي يشتري مقبرة جنبه، وقال له اللى يموت الأول ياخد التاني معاه، والواقعة كانت لما بابا كان بيعمل مسرحية وكان بياخد رأي أحمد زكي في إفيهات، وكانت تحمل إفيه المقبرة يوم الزواج، وقتها سأله صحيح انت هتندفن فين؟! فقال له أنا من الفيوم، وأهل والدتي هنا وأهل والدي هنا، ومش عارف مين اللي هيدفني، وخايف على الولاد لإنهم ماراحوش هناك، فزكي قال له: النقابة نزلت مقابر وتعالى خد جنبي ونبقى جنب بعض".
رد فعل أحمد زكي بعد وفاة ممدوح وافي
وأشارت: "أحمد زكي لما سمع خبر وفاة ممدوح وافي انهار، الله يرحمه، هو كان أصلا قبلها تعبان في المستشفى، وكان ساعتها بيصور فيلم حليم، وكان والدي المفروض يبقى معاه في الفيلم، وقتها اتصل بهاني اخويا وقال له هو مشي قاله له أيوة، فرد زكي أنا وأبوك زي ما عشنا سوا هنموت سوا، وبابا ممدوح اتدفن في مقبرة أحمد زكي أول واحد".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا، دوري أبطال أفريقيا، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.