تامر حسين يفتح النار على عمرو مصطفى: أذاني كتير وفقدت الرغبة في عتابه (فيديو)
عمرو مصطفى، قال الشاعر الغنائي تامر حسين: "عمرو مصطفى شخص عزيز عليَّ جدًّا، ويعلم أني استحملت وصبرت وجيت على نفسي كتير وحتى لم أعاتبه لأني مر عليَّ وقت فقدت الرغبة في عتابه".
مشكلة عمرو مصطفى
وأضاف خلال لقائه ببرنامج "حبر سري" الذي تقدمه الاعلامية أسما ابراهيم بقناة "القاهرة والناس": "عمرو مصطفى ما بيبقاش مدرك الأذى النفسي وكان فيه حق مش من حقه بأكتر من شكل وكنت بقول بحكم العشرة وإنه قدمني ووقف جنبي في بداياتي بس هو تقريبًا اللي اختار النهاية بيني وبينه في الشغل، ليَّ عنده 13 أغنية موجودة هو ما بينزلهمش، وكان فيه مكالمة ما بينا من سنتين آخر حاجة عملناها أغنية هيعيش يفتكرني، وبعدين كانت فيه مكالمة كانت الفيصل وقرر إنه يفرض شروط ما عجبتنيش وفيها تلكيكة وقال لي لو هتشتغل معايا أنا كعمرو مصطفى ما تشتغلش مع حد غيري".
وتابع: "أنا بشتغل مع عمرو مصطفى من 2004 إلى 2010 وتقريبًا كنت بشتغل معاه لوحده، وفي 2010 قال لي شق طريقك واعمل صحاب في المزيكا فبدأت ألجأ لأحمد حسين وإسلام زكي ومحمد النادي، وعملنا أهم أغاني عمرو دياب فيها نجاحات كبيرة حتى 2019، وفي 2020 لقيته بيقول لي يا تشتغل معايا بس لوحدي يا مش هنشتغل فحسيت إنه مجحف وكان فيه جزء تاني أنا ما حبتهوش وحسيت وقتها إن فيه حاجة اتشرخت بيني وبينه لما قال لي أنا اللي بنجحك".
واستطرد: "علاقتنا مهنيًّا انتهت بسبب شروطه لأني أنا مش تابع ومش بحب التبعية وياما حطني كصديق في مواقف صعبة جدًّا ونصفته هو واخترته هو، وكان فيه 10 أغاني كان طالبهم مع عمرو دياب وطلع بعد لما أخدهم ونصفته وقتها وقال لأ دا خد الأغاني لعمرو دياب ودا ما حصلش ومعظمهم ما نزلوش لحد دلوقتِ، ومنهم أغنية شيرين عبد الوهاب العمر ملامحه بتتغير".
أذى عمرو مصطفى لتامر حسين وسبب الخلاف
وأشار: "لما عمرو مصطفى زعل معايا في 2019 وبدأ يبقى فيه خلاف أعطى الأغنية لأكتر من شاعر علشان يشيل كلامي ويحط كلام ناس تانيين وجرب مرة واتنين، وحاول يجرب أغنية العمر ملامحه بتتغير، بكلام تاني وما نجحش، وبعدين لما الأغنية نزلت لشيرين في إعلان اليوم دا قلت له لو أنت بترزق أو بتنجح أنا مش عايز أنجح ومفيش مشاكل بس أهم حاجة نحافظ على العلاقة الإنسانية واحنا إخوات".
أضاف: "بقالنا كتير ما اتكلمناش بس هو مش صافي ليَّ وأنا كمان شايل منه بسبب تقصيره في الحقوق، وهو ظلمني وقصر في حقوق كتير ليَّ وأنا سامحته فأنا قررت إن العلاقة الإنسانية تفضل لإني بحبه على المستوى الشخصي، هو دايمًا بيحاول يقلل من نجاحي فربنا ينصرني أكتر ويكرمني من غيره، أنا ما بعرفش أعاتبه لأني مش هعرف آخد معاه لا حق ولا باطل وفقدت الرغبة في عتابه لأنه أذاني كتير وعمل حاجات كتير تضايق ما تتنسيش، أنا كنت من أصحابه المخلصين اللي بيردوا غيبته والكل في الوسط الفني يشهد على كدا وأتمنى يرجع تاني يكسر الدنيا والعشرة الغالية فوق راسي".
حقيقة الخلاف مع تامر عاشور
وكشف تامر حسين، حقيقة خلافه مع المطرب تامر عاشور، قائلًا: "كان عندي مشكلة في التنازلات حصل بس سوء تفاهم والشركة المنتجة في توصيل المعلومة ونزلت أخبار إن تامر حسين مش هيضيف لتامر عاشور فبناءً عليه استثنى أغنيتي الوحيدة من الألبوم فأنا أخدت الخبر إسكرين وبعت له وقلت له أنا مكتوب عليَّ كدا فقعدنا نضحك أنا وهو، وأنا بحب صوته وإحساسه وصديق عزيز على قلبي ومفيش أحسن منه ومبسوط إنه أخد حقه الفترة الأخيرة وعنده جماهيرية كبيرة".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ،أسعار العملات ، أخبار الرياضة ، أخبار مصر، أخبار الاقتصاد، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
