رامي جمال عن معاناته بسبب البهاق: واحد ما رضيش يسلم علي وآخر بعد ما سلم غسل إيده (فيديو)
رامي جمال، قال المطرب والملحن رامي جمال: "مرة يقولوا لي عني بيعمل تريند بالبهاق ومرة تانية بالطلاق، وكل دا كلام ملهوش أساس من الصحة".
حقيقة تريند البهاق والطلاق
وأضاف خلال لقائه ببرنامج "حبر سري" الذي تقدمه الاعلامية أسما إبراهيم بقناة "القاهرة والناس": "أنا إزاي ممكن أفكر وأنا بتكلم عن ابتلاء في التريند، البهاق عندي من 6 سنين وأعلنت بعد سنة بالظبط لما بقى كتير في وشي، وعلاقة دا بالغناء إن الفنان دايمًا مظهر وفن".
قصة معاناة رامي جمال
وتابع: "قابلت ناس مش كويسة لما جالي البهاق وفيه حد مرة مد إيده وما سلمش عليَّ بسبب البهاق، وواحد تاني بعد لما سلم عليَّ فضل يغسل إيده على الشاطئ وسأل مراتي هو دا معدي، أنا ما أحبطتش من شوية، فمراتي قالت لي احنا نقوم نمشي علشان دا قلة ذوق واليوم دا أنا اتضايقت مش علشاني لكن علشان مراتي لإلأنها أحرجت لي".
رضا ربنا على رامي جمال بعد إصابته بالبهاق
وأكمل رامي جمال: "بعد لما اتكلمت عن إصابتي بالبهاق ربنا راضاني بكمية حب مش طبيعية علشان مش متخطط لها، لما نيجي نخطط لضحك على الناس بنتكشف، والقبول شرطه المصداقية، وأنا واحد بقول أنا ماشي من الغناء وسواء حد رحب بيَّ أو ما رحبش أو لأ مش هيفرق أنا قعدت فترة كل يوم دموعي بتنزل بالليل لإني مش مصدق إن دا حصل، ومستني حد يقول لي هو أنت عملت حاجة ما تعتزل يا عم، والابتلاء ربنا خلاه سبب لحب".
كواليس طلاق رامي جمال لزوجته
ولفت: "مراتي ناريمان مش حاجة هتستخدم في حياتي غير إنها تبقى سعيدة ومش هتستخدم لتريند أو تجارة أو أي حاجة ليها علاقة بمشاعر غير حقيقية، اللي حصل مشكلة عادية تحصل بين الأزواج بس كان خلاص الصبر زيرو، مليانين وولاد الناس دايمًا مشاكلهم مش خيانة ولا غدر بتبقى عادية بس لما يبقى الصبر نفد وزيرو واللي حوالينا مش بيهدوا الموضوع بينتهي".
وتابع: "فعلًا اللي حوالينا كانوا بيقولوا لنا كفاية وأنت فايتك كتير وانفصل عنها فكنت مشحون على الآخر ودا كان سبب الانفصال لمدة يوم بس رجعنا لبعض، وأنا ربنا رزقني بحماتي لو بنتها قالت لها إنها زعلانة هتقول لها ما تشتكيش علشان أنا بحب رامي، أنا أفكتر في شكل الحياة بعد مراتي ما اتخيلتهاش وما أعتقدش إني أفصل عنها، هي حبت تعاقبني ونوع من العقاب غير المدروس وهي كانت متضايقة وعايزة تعرفني إنها خلاص ما بقتش بتاعتي بس أنا عذرتها بس لازم دايمًا البيوت أسرار لا حلوها ولا مرها يطلع وأنا مش عايزها تقول عليَّ مثالي على السوشيال ميديا لكن يكفي إنها تكون حباني".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ،أسعار العملات ، أخبار الرياضة ، أخبار مصر، أخبار الاقتصاد، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
