محمد أبو داود: عادل إمام كان بيستفزني وهو عارف إني مدب ومش بجامل (فيديو)
عادل امام، قال الفنان محمد أبو داود: "الزعيم عادل إمام دايمًا بيورطني في الأعمال الفنية معاه، واشتغلت معاه مسرحية بودي جارد لمدة 10 سنوات بدلًا من الفنان الراحل مصطفى متولي، وكانت لحظة فارقة".
كواليس وفاة مصطفى متولي ومسرحية بودي جارد
وأضاف خلال لقائه ببرنامج "كلمة أخيرة" الذي تقدمه الإعلامية لميس الحديدي بقناة "أون إي": "عادل إمام ورطني معاه في مسرحية بودي جارد بعد وفاة مصطفى متولي، وكنت وقتها عضو مجلس نقابة المهن التمثيلية في عهد النقيب الفنان يوسف شعبان، ولما عرفت خبر وفاة مصطفى متولي قمت جريت أنا وأشرف زكي وأحمد عبد الوارث على البيت بتاع مصطفى وقعدنا ولقيت الإستاذ عادل إمام والاستاذ عصام إمام، وقتها رتبنا مراسم الجنازة والعزاء وكان عندي يومها تصوير وحدة ولازم أروح نادي النقابة علشان مراجعة الجهاز المركزي للمحاسبات ومش عايز أسيب أشرف عبد الغفور وكيل النقابة وقتها لوحده".
وتابع: "صلينا الجنازة وقلت لأشرف زكي أنا همشي واعتذر لي مش هقدر أطلع المدافن، وأنا في النادي لقيت أشرف زكي بيكلمني وبيقول عادل إمام بيسأل عليك قلت له قل له تاه قال لي لأ خد فكلمني الزعيم وقال لي أنت عندك مسرح قلت له لأ، فقال لي عايزك تفتح بكرة مسرحية بودي جارد، فاستغربت وقلت له أنا ازاي؟ أنا لا اتفرجت على المسرحية، فكان رد الزعيم لأ دا إنقاذ موقف ولازم تفتح المسرحية، وحسيت وكإني بعمل لمصطفى متولي خدمة".
أزمة مسرحية بودي جارد
وأكمل: "عادل امام قال لي بالليل هتلاقي المساعد بيعمل لك البروفة، كنت ماضي مسلسل جديد مع مطيع زايد وإخراج إبراهيم الشقنقيري، فاعتذرت عن المسلسل، رُحت المسرح ما لقتش فيه نص ومفيش مساعدين، ودماغي ساحت بس عرفت عدد المشاهد لدور محامي وبيقول مرافعة في الآخر طويلة، وطلعت عدد البدل بالقمصان ودماغي وجعتني ورُحت نايم، تاني يوم كلمني أستاذ عادل امام قال لي أنت فين قلت له في البيت، قال لي أنا مستنيك في المسرح الساعة 8".
حزن فريق عمل مسرحية بودي جارد ونصيحة عادل امام
ولفت: "دخلت مسرحية بودي جارد كل الممثلين يشوفوني مكان مصطفى متولي يعيطوا، قلت لهم ساعدوني ما حدش ساعد المسرح كله منهار بسبب وفاة مصطفى، قلت لهم يا جماعة شيلوني وساعدوني، الوحيد اللي ساعدني عادل إمام بس أنا كمان فادني الإخراج إني ببص في عينه وأبقى حاسس إنه هنا هيخلص وهنا هيقول، فجالي في الاستراحة وقال لي أنا متشكر ومش هنسى لك الجميل ده أبدًا، ومبوظتلوش الدور ولا الإفيهات، بس رُحت البيت السكر عندي ارتفع وأنا عندي السكر أصلًا".
كواليس العمل مع عادل إمام في أفلامه
وأشار: "اشتغلت مع عادل إمام قبل المسرح وعملت معاه أول فيلم مثلته في حياتي، وأنا لسه متخرج وهو أمهات في المنفى، وبعدين عملت غريب في بيتي مع سعاد حسني ونور الشريف، وبعدين لما التقى به إلا لما طلبني في فيلم الارهابي، وهو دايمًا كان يورطني زي ما ورطني في فيلم مرجان أحمد مرجان، وقتها كنت بعمل مسلسل بطولتي مع محمد صبحي، رجل غني فقير جدًّا، كلمني وقتها الزعيم عادل إمام وقال لي أنا عايزك تيجي تخرج لي مشهد لهاملت، ولما رُحت المسرح قرأت المشهد ما عجبنيش جاء عادل إمام قال لي قريت قلت آه وحش، قال لي أنا عايزك كمخرج تقول لي كلمتين مكلكعين من بتوع المخرجين المعقدين، قلت له خلاص أنا هقول وأنت امشي معايا، ومشهد لقد وقعنا في الفخ دا اختراعي".
وأردف: "خلصنا المشهد لقيته بيقول لي هتروح تجيب لنا بدلة علشان في الكواليس تكون موجود، فدايمًا يورطني هو بيحبني بس عارف إن أنا في أوقات عندي الأنا وأبقى معتز بنفسي فكان يقعد في حاجات يستفزني ولو اختلفنا في وجهات النظر وأحتد والبتاع سهل أوي يقول لسمير خفاجة مشي الواد دا، عمره ما حصل لما كان يبقى فيه مشكلة في الفرقة ما يسألش حد غيري، كان عارف إني لا بقرَّع ولا بجامل ومدب".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، القسم الثاني، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
