صفقة إمام عاشور للأهلي تثير حفيظة جماهير الزمالك، وتشابك المشجعين لاقتراب التوقيع، والحكاية الكاملة لأقوى صفقات الشياطين الحمر
إمام عاشور أهلاوي، تصدر اسم إمام عاشور تريند مصر على مواقع التواصل الاجتماعي، ومؤشر البحث الأكثر شهرة "جوجل"، بعد أنباء عن اقتراب توقيع إمام عاشور للنادي الأهلي، في الصفقات الجديدة للأهلي، ودشن نشطاء مواقع التواصل الاجتماعي هاشتاج "إمام عاشور أهلاوي".
هاشتاج إمام عاشور أهلاوي يثير الجدل
هاشتاج "إمام عاشور أهلاوي"، الذي دشنه النشطاء فتح باب كبير للجدل والاشتباك بين جماهير قطبي الكرة المصرية الأهلي والزمالك، حيث عبر جماهير الزمالك عن رفضهم لتوقيع إمام عاشور للنادي الأهلي، بينما أشاد بعض جماهير الأهلي بالصفقة، لكن البعض الآخر فضل التراجع عنها.
بدأت مشادات جماهير الأهلي والزمالك، فور إعلان حارس مرمى الأهلي السابق، أحمد شوبير، عبر صفحته بالفيس بوك؛ اقتراب توقيع إمام عاشور للأهلي قائلًا: "إمام عاشور أهلاوي"، وردد النشطاء أن شوبير يعلنها ويؤكد الموضوع اتحسم.
تأكيدات أحمد شوبير لقيت ردود أفعال وصدى واسع بين نشطاء مواقع التواصل الاجتماعي، حيث قال مستر بين "#إمام_عاشور أهلاوي..."
أكبر فترات توهج إمام عاشور
وقال محمد علاء: "من حوالي سنة.. كانت أكبر فترات توهج "إمام عاشور" في مسيرته.. وكان وقتها هو لاعب الوسط الأول والأبرز في مصر، في عز تألقه.. قولت إنها موهبة كبرى.. ربنا يكفيها شر دماغها.. وقتها كلت من الردود والتعليقات ما يكفي لسد حواجز الضوء من الشمس كلها تعليقات دفاعية عنه بإنه ملتزم وناضج وماشي جنب الحيط.. لكن شخصيًا بالنسبة لي كان الوضع مختلف من لحظة معينة.. اللحظة اللي سجل فيها هدف في طلائع الجيش من 35 ياردة وظهر بعدها في فيديو انستجرام يشاور على عضلته الأمامية وبيقول "لما أسجل تاني هشاور للجمهور على رجلي زي كريستيانو"
وتابع محمد علاء قائلًا: "اللحظة الفارقة دي عرفتني العقلية اللي بنتعامل معاها هنا... رغم انها في نفس الوقت موهبة صارخة ومتطورة لحدود تجعلك تطمع في المزيد منها، إمام وقت موضوع الاحتراف اتصدم صدمة عمره.. الاحتراف بعد الكثير من الصراخ (عايز أحترف) مع شوية بهارات من ضغوطات الوكيل (عشان تبقى مو صلاح) بس في المقابل.. صدمة العمر كانت أن الاحتراف مش كام جول من 30 ياردة وكام لاعب هتراوغه هتلاقي الجحافل والحشود حواليك بيصقفوا لك، وفي كشافين من ريال مدريد وبرشلونة قاعدين في المقصورة منبهرين وبيقولوا بالاسباني (من هذا الولد اللي مجاش منه اتنين) الاحتراف طلع حاجة تانية طلع التزام وانضباط... صدمة العمر ان كل التغليفة دي كمان في النهاية مش هتاخد قصادها نفس الـ15 مليون جنيه اللي كنت هتطلبهم في تجديد الزمالك واللي هما عقد فئة أولى في اندية القطبين وبيراميدز"
إمام عاشور وطريق الاحتراف
وقال "إن راتب اللاعب في أوروبا في الدوريات الـClass B قد لا يتعدى 400 ألف دولار سنويًا.. المفاجأة أن نجم الأهلي والزمالك راتبه يوصل 15 16 مليون جنيه، فطبيعي بعد ما تحس إن الاحتراف وقتها ليس ما توقعته وإن "محمد صلاح" ده جبل عشان يستحمل كل ده عشان يبقى أسطورة.. ساعتها هتختار الطريق السهل وتقول (بلدي أولى بيا)... 6 شهور بس جعلته يكتشف أن الاحتراف مش لعب عيال والطريق فيه مش وردي.. ليڤيل عشان تقطف ثماره لازم تتعب وتعاني"
ورد المختلط قائلًا: "إمام عاشور لو هيوقع للأهلي صراعه هيكون مع جمهور الزمالك لا رئيس نادي ولا أعضاء ولا غيره.. هيفقد شعبية كبيرة كانت بتدعمه في وقت وجوده مع الزمالك، وبعض من جماهير الأهلي مش متقبله وضع إمام لانتقاله للأهلي بعد كم الإهانات والسباب اللي اتعرض ليها الأهلي من إمام عاشور، وأنا هنا بقول مش معظم جمهور الأهلي بيفكر بالطريقه دي، لا ده كمان الأغلبية مش هيبصوا للكلام ده خالص... هما بيفكروا ازاي يوقعوا الزمالك حتى لو كان على حساب كرامتهم..."
مصلحة النادي الأهلي وصفقة إمام عاشور
أما سوما المنشاوي فعلقت على اقتراب توقيع إمام عاشور لأهلي قائلة: "ما اتكلمتش في موضوع إمام عاشور غير لما الدوشة تخلص ونتأكد من انتقاله للنادي بالفعل بما أن البعض رافض وجوده والبعض الآخر موافق ومبسوط الاتنين دول محدش يختلف أن اللي كلاهما بيحبو الأهلي بس كل واحد له وجهة نظر أو ماشي وراء السياق وخلاص، قصة اللاعب خلاص بقي أمر واقع وبقى اسمه لاعب النادي الأهلي فبلاش تجيبو اسكرينات قديمة للبيدجات الأهلاوية وهما بيشتمو فيه لان ده بيحطنا في صوره وحشه قدام نفسنا وان مبادئنا بتتجزء فبتالي مفيش اي اختيار امامك حتي لو انت بتكرهه غير انك هتشجعه لو اتألق في النادي واثبت كفائته انا من الناس علي المستوي الشخصي عمري مش فاهمه ليه الاداره اصرت عليه، بس طالما شايفين ان فيها مصلحة النادي الأهلي أنا مع أي حاجه هتفيد النادي..."
وقال ممدوح رشاد عفيفي: "بعد حسام وإبراهيم حسن مافيش أى اندهاش من انتقال لاعب للفريق المنافس خلاص، حتى رضا عبد العال كانت صدمة وعزل كبير لكن فضل الاندهاش والرفض فى تكرار الأمر بعدها. حسام وإبراهيم كانت الناهية مابعد الاستحالة حصل، فمانقولش إمام عاشور ولا غيرة الفلوس بتحكم"
إمام عاشور يتألق في الأهلي
وردت ملك وجيه قائلة: " إمام عاشور هاينفجر في الأهلي وهايعمل نسخة أقوى خط وسط متكامل حصل في تاريخ مصر"
وعلق جو فادي فقال: "إمام عاشور لو راح الأهلى هيكون صفقة ممتازة معرفش هو شخصيًا هيتكيف ازاى مع ده نفسيًا لانه بعيد عن الإعلام لا يتوافق مع الأهلى والأهلاوية.. التراس زمالك حرفيًا بس تظل صفقة ممتازة فنيًا الحقيقة رغم ان مركزه فى الأهلى مليان لعيبة ممتازة بس الخطيب مركز... بزيادة"
وقال حمدي سمير: "جمال حمزة لما راح الأهلي فضلت ٣ أيام مش باكل ولا بروح الكلية ولا بطلع من البيت جمال كان شطب كرة بس اللي فرق معايا تعليم الأهلي علينا في كابتن من كباتن الفرق.. إمام عاشور بقي هو أحسن لاعب في مصر فأنا لحد دلوقتي في حالة إنكار تام أن الصفقة دي هتم وهيتعلم علينا فيها بالشكل دا.. إمام دا حالة مختلفة تماما تماما دا ابن مدرجات الزمالك الجمهور كان بيغني اللي يغور يغور عندنا إمام عاشور. إمام نفسه دلوقتي الي هيروح للمنافس"
إمام عاشور يحقق أحلامه في الأهلي
وعبر محمد مجدي عن حزنه فقال: "هقولها وأنا بكامل قوايا العقلية لو إمام عاشور مضى رسمي هعتزل تشجيع النادي الأهلي"
أما الأهلي العالمي فقال: "#إمام عاشور مرحبًا بك في النادي الذي سيحقق جميع أحلامك".... إمام عاشور أهلاوي. أعلن الإعلامي عمر ربيع ياسين عن توقيع النادي الأهلي للاعب إمام عاشور، النجم السابق للزمالك. وأفضت منشورات ربيع على فيسبوك إلى أن الإعلان الرسمي سيتم بعد المباراة المقبلة"
ورد فرجاني زيدان فقال "والله عيب يعني إمام عاشور كان طالع الدنمارك ممر عشان يروح الأهلي بجد والله انا حزين مش عشان إمام عاشور لا والله بالنسبه ليا انا لاعيب عادي أقسم بالله أنا حزين عشان خاطر لاعب زي ده ضحك على رئيس نادي الزمالك وعلى مجلس اداره بالكامل إلا إذا هم باعوه وهم عارفين ان هو ممر وهيروح الاهلي عشان كده باعوه طيب مصطفى محمد، أيام اللجنه المؤقته طلع بره وشرط في بند العقد لو مصطفى محمد رجع مصر ما يلعبش إلا في نادي الزمالك طيب ليه البند ده ما اتعملش مع إمام عاشور من رئيس نادي الزمالك ساعه البيع بجد والله انا حزين حسبنا الله ونعم الوكيل"
إمام عاشور واعتذار رمضان صبحي
وعلق منصور مصطفى قائلًا: "الكورة دلوقتي كلها بقت بيزنس وطالما لاعب هينفعني يبقي خلاص نركن المبادئ على جنب، أولا موهبة إمام عاشور محدش يقدر يختلف عليها وأنا واحد من الناس كنت بقول رأيي فيه وإنه لاعب عالي لما كان في الزمالك ولكن طالما فكرت تجيبه الأهلي وقبلت إعتذاره عن الغلط في صالح سليم والأهلي ورموزه وجماهيره يبقي نقبل برضو إعتذار الكابتن التاريخي للأهلي حسام عاشور ولا رمضان صبحي ولا من قبله الحارس التاريخي الحضري وغيرهم من اللي غلطوا مع الأهلي وياما إعتذروا عن اللي عملوه مع الأهلي ولا حسام حسن اللي إعتذر وكان مستعد إنه يدرب الأهلي بدون شروط..."
ورد وليد عواد قائلًا: "الوضع مختلف لان دول من ابناء النادي زي رمضان وحسام عاشور، لكن امام كان في نادي منافس هو يتقبل اعتذاره هما لا وبعدين حسام حسن عادي اتفبل اعتذاره وراح تكريم النادي الاهلي..."
وقال حسام الدين حمدي: "عارف اكتر حاجه عاجباني في صفقه امام عاشور للاهلي انها مصالح للزمالك المصلحه الأولي انها هتخلصنا من السمسار اللي في النادي والوكلاء اللي بيطفشو النجوم، والجمهور مش هيرحمهم بعد الصفقه دي، المصلحه الثانيه انك هتعرف يعني ايه مفيش حاجه اسمها انتماء واي لاعب هيقعد يبوس في التيشرت... والله العظيم أنا بتمني أن الصفقه دي تتم للاهلي"
تفاصيل صفقة إمام عاشور في الأهلي
الجدير بالذكر أن النادي الأهلي يستعد لإعلان انضمام إمام عاشور، لاعب الزمالك السابق وميتلاند الدنماركي الحالي، إلى فريق الأهلي، بعد الاتفاق على كافة التفاصيل المالية الخاصة بالصفقة، وذلك خلال صفقات الميركاتو الصيفي للنادي الأهلي.
ويذكر أن صفقة إمام عاشور تكلف الأهلي حوالي 3 ملايين و250 ألف دولار، يتم تسديدها على أكثر من قسط، ويكون القسط الأول 2 مليون دولار وباقي المبلغ على أقساط أخرى، حسبما أكد مصدر لـ"فيتو".
ومن المنتظر أن يظهر إمام عاشور في فيديو خاص عبر منصات النادي الأهلي الرسمية في وقت قريب، للإعلان عن إنضامة للنادي، في أولى صفقات الأهلي الصيفية، والتي اعتبرها الخبراء أنها صفقة قوية.
ونقدم لكم من خلال موقع (فيتو)، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري القسم الثاني , دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
