نجيب ساويرس: أشجع الأهلي أمام زد وأرفض رئاسة الأحمر.. لا أفكر في خوض تجربة سياسية جديدة.. وهذه أسباب توقف الجونة السينمائي
كشف رجل الأعمال المهندس نجيب ساويرس، في مداخلة هاتفية مع الكاتب الصحفي سيد علي ببرنامج “حضرة المواطن” المذاع على قناة “الحدث اليوم”، موقفه في عدد من القضايا والملفات من بينها أزمة تقنية الذكاء الاصطناعي، وخوض تجربة سياسية وحزبية جديدة، وحسم الجدل بشأن اسباب توقف مهرجان الجونة السينمائي الدولي، موضحًا سر دفاعه عن خصخصة الأندية، وسبب رفضه الترشح لرئاسة النادي الأهلي، وكاشفا مدى عشقه للنادي الأهلي، وكواليس زيارته للزعيم عادل امام.
نجيب ساويرس: أنا عندي نادٍ واحد هو زد
وقال نجيب ساويرس: "أنا عندي نادي واحد هو زد وسميح ساويرس عنده نادي الجونة وكل واحد مستقل أنا مش عندي ناديين".
وأضاف:"إحنا مبسوطين بالتجربة بتاعت الأندية لإننا بنربي النشء وبنستثمر فيهم بدلا ما نضيع وقت ونشتري لاعيبة كبيرة وكمان بنبعدهم عن التدخين والمخدرات".
نجيب ساويرس يعلق على خصخصة الأندية في مصر
وعن خصخصة الأندية في مصر، علق نجيب ساويرس:"عندنا مشكلة كبيرة جدا في مصر في هذه المسألة بنبتدع سيستم خاص بنا بعيد كل البعد عن العالم، الأندية في العالم كله خاصة ومطروحة في البورصة والجماهير بتشتري أسهم وهناك جمعية عمومية بتراقب مجلس الإدارة، ولكن في مصر يقولك الأندية ملك الدولة ولما أقولهم خصخصة يشتموا فيا وكإني بقولهم بيع الأندية وكإنها قناة السويس".
نجيب ساويرس: أشجع الأهلي أمام زد
وأكد: "لما الأهلي هيلاعب زد هشجع الأهلي لإني أنا أهلاوي من صغري، طبعا هشجع الأهلي أمام زد أنا عندي ذكريات وتاريخ من أيام رفعت الفناجيلي وصالح سليم".
موقف نجيب ساويرس من رئاسة النادي الأهلي
وأوضح “ساويرس”: "مش هترشح لرئاسة النادي الأهلي لأنها شغلانة عايزة تفرغ كامل وأنا مش فاضي وكمان فيه تدخل للدولة في الأندية وأنا مينفعش أنفذ تعليمات".
ساويرس: منظومة الأندية في مصر كلها غلط
ولفت: "منظومة الأندية في مصر كلها غلط لأنها مش متخصخصة، لازم النادي يتم طرحه في البورصة والجماهير تشتري أسهم في النادي وده يمثل أكبر استثمار ودعم لأي نادي شعبي".
نجيب ساويرس يكشف أسباب توقف مهرجان الجونة السينمائي
وأكد: "السبب وراء توقف مهرجان الجونة السينمائي إن كان فيه مضايقات ونقد إعلامي غير مبرر، مينفعش أعمل خير ويقعدوا يشتموا، سابوا السياحة كسبت قد ايه والسيناريو والأفلام المعروضة والشخصيات العالمية اللي حضرت ومسكوا في الفساتين ودي هيافة".
وأضاف: "فيه تأشيرات خاصة بشخصيات عالمية مبتخلصش وده من الأسباب اللي كانت سبب في توقف مهرجان الجونة السينمائي".
سر عودة مهرجان الجونة
وأكد المهندس نجيب ساويرس:"رجعت مهرجان الجونة السينمائي علشان حسيت إن الناس عايزة فرح والمهرجان عنوانه صناعة الفرح".
ساويرس وعادل إمام.. تاريخ كبير من المحبة والصداقة
وقال: "زرت الزعيم عادل إمام لأن هناك حالة عشق بيني وبينه وتاريخ كبير من المحبة والصداقة، وتقديرا لذلك شرفنا بالحضور في مهرجان الجونة السينمائي".
ذكريات عادل إمام في مهرجان الجونة
وأضاف: "عادل إمام في سنه ميقدرش يسافر الجونة تاني واحنا كرمناه في المهرجان وده من الحاجات اللي أسعدتني ومن الذكريات الجميلة اللي الواحد يحب يسترجعها ويشوفها".
الحالة الصحية لعادل إمام
وتابع: "عادل إمام كبر بس هو كويس أوي وبيضحك ويهزر وأول لما شافني خدني بالأحضان وربنا يديله الصحة ويبعد عنه الناس الوحشة".
ساويرس يعلق على أزمة الذكاء الاصطناعي
واستبعد رجل الأعمال المهندس نجيب ساويرس، فكرة أن يحل الذكاء الاصطناعي محل البشر، ويأخذ مكانهم، قائلًا: "تقنية الذكاء الاصطناعي مش ممكن تنجح في أنها تاخد مطرح الإنسان لإن معندهاش عاطفة ولا ابتكار ولا روح".
ساويرس يكشف خطر الذكاء الاصطناعي
وأوضح: "تقنية الذكاء الاصطناعي قد تؤدي في النهاية إلى فقدان الكثير من فرص العمل ولو اتحطت في يد الإجرام هتساعد الإجرام والإرهاب وده الخطر اللى فيها لإنه سهل استخدامها، لو وقعت في إيد شريرة هتمثل خطر وده خوفي الشديد".
موقف نجيب ساويرس من خوض تجارب سياسية أو حزبية جديدة
وفي سياق آخر أكد نجيب ساويرس أنه لا يفكر في خوض أي تجربة حزبية أو سياسية جديدة، قائلًا: "تجربة سيئة ومعنديش رغبة لكده مفيش تنافس حقيقي ولا منافسة حقيقية في الانتخابات".
تعليق طريف من نجيب ساويرس على سؤال هتدبح في عيد الأضحى
مازح الكاتب الصحفي سيد علي، رجل الأعمال المهندس نجيب ساويرس، على الهواء، قائلا: "هتدبح معانا في عيد الأضحى".
ورد نجيب ساويرس:"كل سنة والمصريين طيبين وعيد أضحى مبارك".
وتابع نجيب ساويرس: "أنا بدبح كده كده علشان العين، وأنا بتاع اللحمة، وأُفضل اللحمة على السمك".
----------------------------------------------------------
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
