التوقيت الصيفي يثير جدلًا واسعًا.. تحذيرات من اختلال الساعة البيولوجية ومواعيد الامتحانات
التوقيت الصيفي، تصدر التوقيت الصيفي أو تغيير الساعة تريند مصر على مواقع التواصل الاجتماعي، ومؤشر البحث الأكثر شهرة "جوجل"، حيث يتم تفعيل التوقيت الصيفي مع نهاية اليوم الخميس، وبداية فجر يوم الجمعة.
التوقيت الصيفي يثير جدلًا واسعًا
أثار التوقيت الصيفي، الذي يتم تفعيله اليوم بتأخير الساعة، أثار حالة من الجدال الواسع والارتباك بين نشطاء مواقع التواصل الاجتماعي، فالبعض يتساءل عن التوقيت الفعلي لتغيير الساعة، والبعض الأخر يحذر من عدم ضبط الساعة وخاصة مع موسم الامتحانات، فيما تخوف آخرون من عدم القدرة على ضبط الساعة البيولوجية لجسم الإنسان بسبب تغيير الساعة.
البداية كانت بتعليق محمد طه الذي قال: "الحسنة الوحيدة اللي في تغيير الساعه لـ #التوقيت_الصيفى النهاردة هي إنها هترجعلنا ذكريات قبل ٢٠١١ أول الألفينات... أيام ما كانت الدنيا غير دلوقتي وكانت الحياة ليها معني، أيام يستحيل هينساها اللي أدرك معناها وعاشها"
ودر أهلاوي 1907 قاال: " كنا ارتحنا من مسلسل تغيير الوقت ولخبطة فى حياتنا"
موعد تغيير الساعة للتوقيت الصيفي
أما تامر فقال: "دايما تغيير الساعة بيبقي في آخر يوم الخميس علشان يبقي التنفيذ يوم جمعة وإجازة ومحدش يتلخبط زي ما كان بيحصل زمان"
وقال أحمد سعد: "أنا طول عمري بتضايق من يوم تغيير الساعة ده علشان بنتقلب في ساعة وماحدش يقولي ماهي بتتردلك مع التغيير للتوقيت الشتوي!"
أما جيمي راجي فتساءل عن جدوي تغيير الساعة قائلًا: "دلوقتي أنا عايز حد يفهمني بقى تغيير الساعة دة هيتم بداية من امتى بالضبط يوم الجمعة.. يعني لما تيجي الساعة كم هتتغير وتبقى كم؟ أنا عندي معاد الساعة 9 الصبح ولحد دلوقتي معرفش هيبقى 9 أنهي"
وعبرت رحمة أشرف عن عدم فهمها للتوقيت الصيفي قائلة: "أنا مش فاهمة حرف في تغيير الساعه دا"
ورد أحمد أمين قائلًا: "اللي مش فاهم يعمل أيه في موضوع التوقيت الصيفي دا.. النهاردة (الخميس) بالليل أول ما الساعة تيجي 12 منتصف الليل، هتظبط ساعتك تخليها الساعة 1 مباشرةً.. يعني هتزود ساعة على التوقيت الحالي.. واللي عنده كمبيوتر أو موبايل يتأكد من عمل آخر التحديثات عشان ضبط الوقت التلقائي يفعل التوقيت الصيفي تلقائيًا، يا إما يدخل يظبطه يدويًا بإنه يفعل أوبشن الـ Daylight savings time ويتأكد إن الساعة زادت ساعة، أو يظبط هو التوقيت يدويًا لو مفيش الأوبشن دا. CAIRO = GMT+3".
مخاوف تغيير الساعة البيولوجية
أما محمد حمدي فعبر عن مخاوفة قائلًا: "مع احترامي للهدف الاقتصادي.. بس تغيير الساعة بكره هيبهدل ساعتنا البيولوجية اللي هي طالعه مضروبة بالنار اصلا من رمضان والعيد"
وتساءلت ميار إبراهيم "بحاول أفهم أيه فايدة حوار تغيير الساعة دا ومش فاهمة"
وعبرت سارة أسامة عن تخوفها من تغيير الساعة فقالت: "يارب أنا هلاقيها من تظبيط مواعيد نومى بعد رمضان ولا من تغيير الساعة" .
وقالت سما عزام: "موعد تغيير الساعة في مصر إلى التوقيت الصيفي، أو تغيير التوقيت الصيفي فى مصر 2023 مع اقتراب فصل الصيف، يتجه الانتباه في العديد من الدول إلى تغيير التوقيت المتبع للاستفادة من ساعات النهار الطويلة وتقليل استهلاك الطاقة."
أما وجد الفقي فقالت: "هو فيه توفير فعلا بس هى لخبطة بيولوجية ولخبطة تانية علشان يوم تغيير الساعة" وقالت باسم طه: "المفروض يعني إن تطبيق #التوقيت_الصيفي هدفه توفير الطاقة لكن معظم الناس بتغير المواعيد بتاعتها علشان تتفادى تغيير الساعة يبقى أيه لازمته التغيير أصلا؟!"
تنبيه التوقيت الصيفي والامتحانات
ونبه حامد الراوي على أهمية تغيير الساعة قائلًا: "#التوقيت_الصيفي تحذير لكل ولي أمر طفله عنده امتحانات من يوم السبت القادم أو شخص مسافر غدا ولكل الناس لازم تغير توقيت الساعة اليوم بعد منتصف الليل بالتوقيت الجديد #قدم_الساعة_60_دقيقة"
وعلق أحمد أبو زيد قائلًا: "النهارده الخميس توقيت جديد يعني إيه التوقيت الصيفي..!! النهارده الخميس بالليل أول ما الساعة تيجي 12 بالظبط هتلف على كل الساعات اللي عندك تعدلها تخليها 1 وده معناه إنك لو متعود تصحى للشغل الساعة 7 الصبح فكده انت كأنك تصحى 6... بدل ما شروق الشمس الساعة 5.30 هيبقى 6.30 بدل ما الظهر بيأذن الساعة 12 هيأذن 1 وهكذا نزود ساعه في باقي للصلوات والأعمال بالنيات وانا لكل امرأ ما نوي.."
وأضاف أبو زيد "الساعة 6 الصبح هتبقى الدنيا لسه ضلمة (لإنها اصلا خمسه بس متنكره والساعة 8 بالليل هتبقى الدنيا لسه نور (لإنها أصلا سبعة) وكمان شهرين العشا هتأذن الساعة 9 ونص بالليل.. ودي حاجه كانت بتحصل من سنين بس نسيناها مين فاكرها! الساعة البيولوجية لجسمك هتبقى في ذمة الله أول أسبوع وهتبقى صاحي الصبح لشغلك أو دراستك متلخبط مين فينا بيشعر باللخبطه دي غير الموظف المنضبط.. ولو متعود تنام بدري مش هتعرف وغصب عنك هتسهر لأن الليل بيليل متأخر جدا في التوقيت الصيفي.. الخبر الحلو إنك على آخر الصيف هتكون اتعودت... والخبر الوحش إنك بمجرد ما تتعود هيرجعوا التوقيت الشتوي تاني حاول تتأقلم مع الساعة الجديدة".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
