رضوى الشربيني: مش ندمانة على جوازي وطليقي راجل محترم (فيديو)

قالت الإعلامية رضوى الشربيني: "أنا مش معقدة من الرجالة، أنا جيت في الدنيا بسبب راجل اللي هو أبويا وضهري وسندي في الدنيا، وأبو بناتي وطليقي راجل محترم، إزاي أكون معقدة من الرجالة".
 

مشكلة رضوى الشربيني مع أشباه الرجال

وأضافت خلال لقائها ببرنامج "أنا والقناع" الذي تقدمه الإعلامية إيمان أبو طالب بقناة "الحياة": "أنا عدوة أشباه الرجال، والكائن اللي بيضرب مراته كل يومين تلاتة علقة سخنة ما ينفعش يتقال عليه راجل، الشخص اللي بيشغل مراته بالسخرة ويخليها تصرف عليه ما ينفعش نقول عليه راجل". 

رضوى الشربيني تصف الرجل اللعوب

وتابعت: "الشخص اللي بيعشم كل البنات بالجواز ويضحك عليهم كلهم وما يتجوزش ولا واحدة فيهم ما ينفعش نقول عليه راجل، والشخص اللي اتجوز واحدة وما حصلش نصيب وبقى بيجرجرها على المحاكم علشان تشحت حقها ما ينفعش نقول عليه راجل". 

زيجة رضوى الشربيني

واستطردت رضوى الشربيني :"أنا حبيت واتجوزت وجوازتي كانت عن حب وما أقدرش أتجوز حد مش عن حب، لكن لما كبرت أدركت إنه كان إعجاب شديد جدًّا بس ساعتها كنت بقول إنه حب طبعًا".
 

هل ندمت رضوى الشربيني على زيجتها

وتابعت: "مش ندمانة على جوازي رغم الطلاق، ولو رجع بيَّ الزمن هتجوز نفس الجوازة، لإن الجواز أثمر عن أحلى حاجة في حياتي وهمَّا بناتي، دا أنا أتوجع كل يوم علشان يبقى عندي بناتي".
 

بكاء رضوى الشربيني

في نفس اللقاء، بكت الإعلامية رضوى الشربيني، على الهواء بسبب انتقاد الناس لها ووصفها بأنها بلا مشاعر، قائلة: "أنا لسه بعرف أعيط أوي عكس ما كل الجمهور فاهم، كل الناس واخدين عني صورة المرأة الحديدية اللي بلا مشاعر وبلا شعور ودا مش صح".

تغير حياة رضوى الشربيني بعد وفاة والدتها

وتابعت خلال لقائها ببرنامج "أنا والقناع" الذي تقدمه الإعلامية إيمان أبو طالب بقناة "سي بي سي": "بعد لما أمي توفيت الحياة اختلفت خالص بالنسبة لي، بقيت أعيط أوي، قبلها ما كنتش بعيط زي بعد لما ماتت".

دعاء والدة رضوى الشربيني

وأضافت: "أمي كانت دايمًا تقول لي تعالي هنا بوسي إيدي علشان أدعي لك، دعوتي شايلة عنك بلاوي وفعلًا دعوتها كانت شايلة عني بلاوي".

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو،أسعار العملات، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطال، الدوري المصري، دوري أبطال أوروبا،دوري أبطال أفريقيا ، دوري أبطال آسيا ، والأحداث الهامة والسياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.