ساخرون.. مناخوليا.. ترندات الزمن الجميل
محمد منير كان بيغني زمان ويقول: أنا بعشق البحر
النهارده الناس بتغني أنا بعشق الترند.. وأجري خلف الترند.. وأهرول نحو الترند.. وأتمنى ركوب الترند
مناخوليا الترندات تسيطر على كل من هم خارج سور سرايتنا الصفراء بشكل مبالغ فيه.. حتى وصل بهم الحال أن أصبح منهم متخصصون في صناعة الترندات.. أما نحن هنا في عنبر العقلاء داخل مستشفى العباسية فنضرب كفا بكف على ما آل إليه حال هؤلاء المجانين ممن هم خارج السور
= لحوم الحمير حلال.. لأ حرام.. لكن لحم الحصان هو اللي حلال وفى بلاد بره يبيعونه بأغلى الأسعار
- ياعم انت بتقول إيه بطل هبد.. لحم الحصان حرام.
= طب تاخد التقيلة؟!
-هات يا عم الشيخ الجهبز الجليل
= الكلب نجس ولحمه حرام شرعا
-يا عم انت بتقول إيه.. دا لحم الكلاب حلال بالتلاتة.. لأن الكلب طاهر.. ولو مش مصدقني شوف تصريحات الشيخ الجنتل مان على قناة آمان يا للالي آمان
هذا هو حال ملايين المخابيل خارج سور سرايتنا.. الذين باتو يتغنون بالترند ويلهثون خلفه ليل نهار مرددين: "يا حلاوة الترند آه.. وحبيبى وانا وياه.. بنسى العالم دا كله.. ومن حُبى بقول الله"
ونحن هنا داخل عنبر العقلاء نتسائل: راح فين زمن الترندات الجميل.. أيام كنا نعيش خارج سور العباسية بين هؤلاء المخابيل؟!
كان الترند عبارة عن: شاروخان يواصل رحلته من قنا للقاهرة سيرًا على الأقدام... العمدة يقوم بنفس الرحلة راكبًا حمار.. فتاة الشرقية تنقذ أسرة مكونة من ستة أفراد من الغرق بمفردها ورجال القرية بيتفرجوا عليها والشباب بتصور الحادثه بالموبايلات.. كشرى التحرير يطرد عامل النظافة ويمنعه من الاكل داخل المحل.. أم جلامبو بتعمل كفته فى أوضة النوم
هى دى ترندات الزمن الجميل اللى جابتنا هنا لنصبح نزلاء فى عنبر العقلاء.. بينما ترندات هذه الايام التى بدأت بأرجل الفراخ اللى كلها جيلاتين وفيتامين وانتهت بلحم الكلاب.. فهذه كفيلة بأن تجعل كل من هم خارج سور سرايتنا مجموعة من المجانين.. ونحمد الله اننا لسنا معهم وإلا كنا اتجننا زيهم تمام وأصابتنا لعنة المناخوليا!
