نهى العمروسي عن أزمة ابنتها نازلي بقضية الفيرمونت: أنا غلطت في تربيتها (فيديو)

كشفت الفنانة نهى العمروسي، تفاصيل جديدة في أزمة ابنتها نازلي، في القضية المعروفة إعلاميًّا بـ"قضية الفيرمونت".
 

انهيار نهى العمروسي

وقالت نهى العمروسي خلال لقائها ببرنامج "في اَي بي" الذي تقدمه الإعلامية أميرة بدر بقناة "هي": "أول لما عرفت بأزمة بنتي نازلي كنت منهارة وربنا ما يحكم على أي حد، وتعاملت مع الأزمة بحب غير مشروط".

خطأ نهى العمروسي مع ابنتها نازلي 

وأضافت نهى العمروسي: "أنا غلطت في تربية بنتي وما كانش عندي وعي كأم، وما كنتش ناضجة كنت صغيرة وباباها مات والحكاية كانت كبيرة عليَّ أوي لإني كنت متدلعة أكتر منها في بيت العائلة، هي شافت مآسي أكتر بوفاة أبوها وجدها وجدتها".

مشكلة نهى العمروسي مع ابنتها نازلي

وتابعت: "ما قلتش لبنتي إزاي أبوها مات بطريقة واعية وكان لازم أستشير طبيب نفسي، وأهتم بيها أكتر من كده، وكان ممكن ما أتجوزش بعد باباها وأكيد دا جرحها، وكنت واخدة المواضيع ببساطة لكن لما كبرت غلَّطت نفسي".

مشكلة نازلي ابنة نهى العمروسي وزواجها السري

وأكملت: "نازلي بنتي لما كبرت شوية قعدت فترة ما صاحبتنيش علشان كانت زعلانة مني علشان أنا ما كنتش موافقة على واحد كانت بتحبه الولد اللي كان مصاحبها، وبعدين اتجوزته في السر، وأنا وقتها ما كنتش أعرف ولما عرفت اتصدمت واتوجع قلبي عليها، لإني كنت شايفة إن العلاقة دي من الأول غلط، وما كنتش متخيلة القبح خالص بس من الأول ما كنتش مستريحة للولد ده والقلب أذكى، وما كنتش متخيلة موضوع بنتي يبقى بالقبح دا".
 

العلاج النفسي لابنة نهى العمروسي ونظرة الإبراشي

ولفتت: "ناس كتير وقفت جنبي في أزمة بنتي نازلي، أصحابي القريبين وعائلتي والمحامي طارق العوضي وكان له دور كبير في القضية وعمل كل شيء وجاب لها الدكتور نبيل القط الاستشاري النفسي وقف جنبها وكشف عليها، وفي الأزمة ما كنتش فايقة مين اللي ضربني في ضهري، وربنا اللي عالم قضيت الـ5 شهور في القضية إزاي والإعلامي الراحل وائل الإبراشي قعد معايا ساعتين وقال لي كل اللي هيحصل في الحكاية وكان عنده رؤية ثاقبة في القصة وقال لي كل حاجة حصلت".

ناهد السباعي: رانيا يوسف نجمة الإغراء الأولى واللي عايز يتجوزني زي ما أنا أهلا وسهلا

ناهد السباعي: أتواصل مع الأموات ودايما بكلم ربنا وطلبت منه أنجح في التمثيل (فيديو)

أزمة نازلي ابنة نهى العمروسي

وأكدت: "بنتي نازلي بعد لما خرجت من السجن خلصت من الكابوس اللى كان بيهددها في حياتها، وبيخوفها، وما بقاش فيه تواصل، وهي قبلها بسنة مكنتش بتتواصل معاه، وكانت سايباه، واتحطت كبش فداء علشان يلغوا حاجة مكان حاجة ولكن ربنا نجاها وربنا ما بيسيبش الناس المظلومة والحق بيبان في الآخر، وبكل تأكيد بنتي اتظلمت في القصة كلها وما كانش ليها يد في القضية واتظلمت في العلاقة من بدايتها".
 

الحالة النفسية لنازلي ابنة نهى العمروسي

وأشارت: "علاقتي ببنتي نازلي دلوقتِ زي الفل وقريبين من بعض ونفسيا اتصالحنا والجروح اللي جواه بنسبة كبيرة خفت بس روحها متعورة وما عاتبتهاش لإن اللي حصل حصل".

تهديد بالقتل

ولفتت: "كنت حاسة إن بنتي عايزة تقول لي حاجة بس خايفة، وفيه حد مخوفها وبيهددها لحد هتموتي أو تتفضحي، بنتي اتعرضت للتهديد بالموت لو ما نزلتش واتجوزت الشخص اللي اتجوزها سري، وبطلت خوف لحد لما اتقبض عليها، كان مخوفها لحد إنه كان بيهددها بالموت وما أعتقدش أنه حبها، وهي في الآخر اتحررت بعد ما الوحش بان واتقبض عليها، وكانت صدمة كبيرة ليَّ وربنا ما يحكم على أي أم أنها تتخبط وبنتها يحصلها زي ما حصلت لبنتي، بس ربنا اداني القوة إني أقف لـ5 شهور".

علاج نفسي لابنة نهى العمروسي

ولفتت: "بنتي بتتعالج نفسيًّا وماشية مع دكتور لحد دلوقتِ، ونفسي تبقى سعيدة قبل ما تتجوز ولو حد دخل حياتها تاني مش هوافق عليها إلا لما قلبي يستريح له واتأكد إنه نضيف من ناحيته، نازلي ما بتشتغلش لحد دلوقتِ، وهي في تحسن ومش عايزة تاخد أدوية".

نقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.