حماقي: تركي الشيخ راعي الفن العربي وأنا وأنغام أصحاب من زمان وكنا بنلعب مع بعض
![الفنان محمد حماقي،](images/no.jpg)
قال المطرب محمد حماقي:" أنا وأنغام أصحاب من زمان وكنا جيران وبنلعب مع بعض، بس هي بدأت الغناء من بدري، وهي إنسانة راقية جدا وصوت حساس وبيحس قبل ما يغني وعندها تكنيك قوي جدا في الغناء".
دعم تركي ال الشيخ
وأضاف خلال لقائه ببرنامج "الحكاية" الذي يقدمه الإعلامي عمرو أديب بقناة "ام بي سي مصر":"تركي ال الشيخ راعي الفن العربي الفترة اللي فاتت، والتكنولوجيا بتطور ولازم نستخدمها بشكل صحيح وده اللى بيحصل على المسرح في حفلات موسم الرياض".
البوم محمد حماقي الجديد
وتابع:"انا شغال علي ألبوم للصيف وحضرنا منه 4 أغاني وهنكمل بعد رمضان، وعلي الصيف يكون فيه ألبوم جديد".
حال الموسيقى
ولفت:"شايف المزيكا في وضع طبيعي أن دايما فيه حدوث تطور والجيد بيكمل واللى مش جيد الناس مش بتديله الفرصة انه يكمل، وحصل بعد وفاة عبد الحليم حافظ فجوة واللى الناس محبتهوش مكملش، ولكن الوضع الحالي صحي".
وضع الأهلي والزمالك
من جانب اَخر أشار :"كان عندي أمل الأهلي والزمالك يوصلوا للدور التاني في دوري أبطال أفريقيا بس للأسف اتغلب من شباب بلوزداد، وصن داونز لو كان خسر الأهلي كان هيبقى برة، وعمرنا ما كنا بننحط في الوضع ده".
في حديث سابق، كشف المطرب محمد حماقي العديد من المفاجآت عن حياته الخاصة وبداياته الفنية، وسر عشقه لكرة القدم وأسباب عدم استكمال مشواره الرياضي، وبداياته الفنية مع عمرو دياب ومصطفى قمر وهشام عباس، وما قاله كلاهما عنه".
واوضح محمد حماقي، في لقائه ببرنامج "صاحبة السعادة"، تقديم الفنانة إسعاد يونس المذاع على فضائية "dmc"، أسباب انفصاله عن زوجته وعدم الإعلان عن ذلك لوسائل الإعلام، ومفاجآت كثيرة ترصدها "فيتو"، فى هذا التقرير.
وقال الفنان محمد حماقي: "أول التسعينات كنت مشهور في الوسط من غير ما أغني، وبدلا من أن أكون مدرس موسيقى انطلقت لعالم الغناء في 1996 مع طارق مدكور، واقتنع بيا جدا لما سمعني وقال لى خليك معايا بقى لحد لما نجهزك، وكنت عملت باند مع أصحابي في الكلية ونغني ببلاش في أي رحلة أو أي فرح تبع أي واحد اصحابي".
وتابع: “عشت مع طارق مدكور في الأستوديو، وهو بيعمل أغاني لعمرو دياب ومصطفى قمر وهشام عباس، وكل أغنية يعملها أخش اعملها واسجلها وأعيش.. وفي الوقت ده بقيت انا ومصطفى قمر صحاب في ألبوم ”لمن يهمه الأمر"، وبقينا اصحاب وكان عنده حفلة في مهرجان بالأردن، وقال لى ممكن تطلع معايا الحفلة دي؟ فقلت له ماشي بس انا معنديش باسبور، والمهم عملته، وطلعت حضرت معاه وكنت مبهور بالجمهور الحفلة، وبعدين سرحت علي المسرح لحد لما قربت من الجمهور والمنظر كان رهيب فواحد من الفرقة قال لى انت في يوم من الأيام هتيجي وهتبقى نجم".
وأكمل محمد حماقي: "مصطفى قمر بعد الحفلة قال لى خليك معايا وبقيت عامل زي الأسفنجة من اللايف والتدريب، وكانت تجربة حلوة اتعلمت منها بدون تأثير مباشر، وبقيت اتعلم من الصح والغلط بدون ما أتعور، ودي مرحلة أنا فخور بيها لأنها ورتني ازاي اتعامل مع الفرقة والتكنيك الصح في الغناء وازاي اتعامل مع الجمهور".
وأضاف: "هشام عباس يقول لي صوتك حلو ونبقى أصحاب، وعمرو دياب يقول لي نبقى أصحاب ومصطفى قمر كذلك، فاستفدت جدا من كل واحد".
وتابع محمد حماقي: "أنا من الباند للأستوديو للايف مع مصطفى قمر وحفلات قاعات القوات المسلحة، والألبوم الأول ليا قعدت أحضر فيه 3 سنين من 2000 ونزل 2003، عمري ما يئست ولكن تعبت وزعقت.
وأشار:"كان ليا زمان رغبة العب كورة في الأهلي والبس 12 زي طاهر أبو زيد اللى كنت بحبه وبعدين مجتش الفرصة وده اللى حصلي مع المزيكا ولكن تمسكت بالفرصة، وكان فيه مراحل إحباط بايخة".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.