نجيب ساويرس يرد بشكل قاطع على سؤال مغرض عن حجم استثماراته في إسرائيل

رد رجل الأعمال المهندس نجيب ساويرس، بشكل قاطع، على سؤال مغرض عن حجم استثماراته في إسرائيل أو مع المنتمين لها.

وكتب “ساويرس”، في رده على سؤال متابع له على “تويتر” والذي قال: "ما هو حجم استثماراتك في الكيان الصهيوني أو مع المنتمين إليه"، ليرد رجل الأعمال نجيب ساويرس قائلًا: "Zero صفر".

أسرار في حياة نجيب ساويرس

وكان المهندس نجيب ساويرس كشف خلال حديثه مع الإعلامية نايلة تويني، عن العديد من الجوانب الأسرية والحياتية وكيف بدأ حياته العملية حتى حقق ما حققه من نجاحات، وسر حبه وعشقه للفن ولماذا رفض العمل في السياسة وعدم حبه للقب رجل الأعمال.

الاقتراب من سن الـ 70 عاما

وقال "ساويرس": "أنا مرعوب من فكرة اقتراب عمري من الـ70 عامًا، ولكن ولادي دايمًا يقولوا لي أنت وقفت عند الـ30 ما طلعتش من ناحية شباب القلب، وأنا ما بحبش فكرة تسليم الراية من منطلق إني كبرت، وأنا أحب أتخلى عن لقب رجل الأعمال لإنه أوحش حاجة وأفضل أبقى فنان أو دي جيه، أو أتخلى عن لقب سياسي".
 

سر ابتعاد نجيب ساويرس عن السياسة

وتابع: "أكتر حاجة اكتشفتها في السياسة إنها ما تنفعش مع شخصيتي، وأوحش حاجة فيها إنها عايزة تنازلات عن المبادئ وطالما هتنازل عن المبدأ لأ أبقى بعيد عن السياسة، ومشيت بعيد عن السياسة لإن معدني هيتغير وأتلوث والحمد لله إني مشيت بعيد عنها".

رؤية نجيب ساويرس تجاه المصلحة الوطنية

وأكد: "لو مصلحتي كمصري قبطي تعارضت مع مصلحة مصر هفضل مصلحة مصر حتى لو أنا اتظلمت لو على حساب إن طائفتي تتظلم، بس بلدي تطلع قدام هبقى موافق، عمري ما فكرت أدخل برلمان أو أعمل  حزب، أنا مش شجاع ولكن أنا مؤمن".
 

صديق نجيب ساويرس المسلم

ولفت ساويرس: "معظم أصحابي وأصدقاء العمر مسلمين، واتربيت في بيت أعز صديق ليَّ زي أخويا وكان مسلم، وكنت بصوم رمضان معاه، أنا تركيبتي ما عنديش حتة التحيز الطبقي أو الطائفي".

مشكلة المجتمع الشرقي

وتابع: “المشكلة في مجتمعنا متعلقة بالجهل، ودايمًا بقول بيت شعر ”لو شاء ربك لوحد الأديان"، هو ما شاءش فما تجيش  توجع دماغي وتقول لي ليه دا طلع مسلم، ما حدش اختار دينه، أنا ما اخترتش ديني طلعت لقيت أبويا واخدني على الكنيسة وأنا ما بحبش حد يغير دين حد، وأنا أول ما بصلي بطلب من ربنا يغفر لي ذنب معين عندي مش بقدر أخلص منه.. أيوا عندي ذنب ومفيش حد مننا ما عندهوش ذنوب".
 

سر نجاح عائلة نجيب ساويرس

وأشار المهندس نجيب ساويرس: "احنا لو كنت أنا واخواتي ما نجحناش كان هيبقى وضع غريب أوي لإن المعطيات اللي أعطيت لينا من ربنا المفروض تنجح، أولها نشأنا في أسرة مترابطة متماسكة متدينة وأمي نجحت إنها تحط في الـ3 أولاد محبة الله ومخافة الله علشان ما نعملش حاجة غلط تزعله، وكانت تاخدنا واحنا صغيرين في حي الزبالين تمشينا وسط الزبالة والفقراء والناس قاعدة والدبان، وكان يوم الجمعة الوحيد اللي إجازة عندنا المفترض تودينا فيه نادي الجزيرة، ولكن كانت رسالتها علشان لما تكبروا ما تنسوش الناس دي، وبعدين تودينا الكنيسة ونصلي فدخلت الحتة الدينية فينا، صحيح أنا أقل واحد بصلي في الكنيسة وما بصومش بس ملتزم".

روشتة نجيب ساويرس للنجاح

وتابع: "والدي من الأول دخلنا مدرسة ألماني لإنه كان معتقد إنهم متقدمين والمدرسة دي كانت لها فضل كبير جدًّا في التعليم وأخدنا تعليم غير طبيعي واللي شكل شخصيتي الفلسفة الألمانية كلها وكنا بناخد فلسفة، وأقول للشباب لازم تبقوا عندكم ثقة بنفسكم، وما تعتقدش إنك ذكاء بس لإن الذكاء وحده ما ينجحش فلا بدَّ من العمل الشديد والمذاكرة الشديدة والعمل لساعات طويلة والشقاء، ومش من أول ما الدنيا تتعقد في وشك تقول جربت.. أنا شخصيًّا بقعد أنحت في الخرسانة لحد لما أحفرها وأعدي، وعلشان كدا لازم يبقى فيه مثابرة وصبر وبعدين التعليم الكويس".

وقال رجل الأعمال المهندس نجيب ساويرس: "لو عملت فيلم سينمائي هعمله عن والدي، ودي الحاجة الوحيدة اللي ممكن أعملها.. إنما مش بحب فكرة ألمع نفسي، وعنوانه يبقى ماي لايف ماي رولز".

 ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ،الدوري المصري، كأس مصر , دوري القسم الثاني, دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.