عارفة عبد الرسول عن صور الإغراء: اللي بيديني مصروف يقطعه (فيديو)

قالت الفنانة عارفة عبد الرسول: "كل لما أطلع في برنامج أو أنزل بوست أو أقول أي تصريح يحصل قلبان، لساني فالت أعمل إيه".

طبيعة عارفة عبد الرسول

وأضافت خلال لقائها ببرنامج "معكم" الذي تقدمه الاعلامية منى الشاذلي بقناة "سي بي سي": "أنا بتكلم بطبيعتي وما بقصدش حاجة خالص، وأفاجأ بإثارة الجدل حولي".
 

صور إغراء عارفة عبد الرسول

وتابعت عارفة عبد الرسول: "مرة قالوا أنا منزلة صور إغراء وطلعت تريند، وما كانش فيه مايوه أصلًا، أنا معنديش مشكلة مع أي حد، واللى بيديني مصروف يقطعه عادي، وما ليش مشكلة مع أي حد".
 

تصريح قوي من عارفة عبد الرسول

وأكملت: "أنا بحب شغلتي ومش منتظرة أي حاجة وأهم شيء عندي في الحياة الشغل، ومش مهم شكلي ولا لبسي، ممكن أوضب نفسي علشان الشغل".

عارفة عبد الرسول: أنا جاية من جيل المايوهات، والبوس في مجالنا عادي (فيديو)

عارفة عبد الرسول تكشف لـ(فيتو) أحدث أعمالها الفنية

وفي تصريحات سابقة علقت الفنانة عارفة عبد الرسول، خلال لقاء تليفزيوني، على صورتها المثيرة للجدل والتي ظهرت فيها مرتدية المايوه.

طبيعة عارفة عبد الرسول وراء ارتداء المايوه

وقالت عارفة عبد الرسول خلال لقائها ببرنامج "كلام الناس" الذي تقدمه الإعلامية ياسمين عز بقناة "إم بي سي مصر": "أنا بطبيعتي إسكندرانية ولازم ننزل البحر كل صيف، ولو عدى صيف وما نزلتش البحر ممكن يجيلي اكتئاب، وصورة المايوه أنا ما كنتش نزلت البحر خالص، وكان عندي شغل كتير فجماعة أصحابي خطفوني وراحوا بيَّ العين السخنة، وكنت فرحانة أوي بالبحر ونزلت الصورة وأنا في منتهى السعادة واللي باين الكتف.
 

الهجوم على عارفة عبد الرسول بسبب المايوه

وتابعت: "لما نزلت صورة المايوه وكتبت لقيت الطبطبة، لقيتهم بيقولوا ليَّ يا ولية يا عجوزة اتلمي، وواحد بيقول لي أنتِ مش مكسوفة على دمك وأنتِ لابسة البكيني، أنت شوفت البكيني فين يا عم؟! مفيش بكيني أصلًا، فكان موضوع غريب، وقعدوا ينصحوني أشيل الصورة، فأنا كتبت منشور توضيحي أوضح بس ما مسحتهاش".

تربية ونشأة عارفة عبد الرسول

وأكملت عارفة عبد الرسول: "ما كنتش متوقعة الرد العنيف على صورة المايوه، وأنا أصلًا جاية من جيل مايوهات تصغر علينا، أبويا ينزل يجيب لنا مايوهات أكبر، وكنا نضحك على أي حد نازل البحر بجلابية أو تي شيريت وبنطلون، البحر يعني مايوه".

قصة المايوه مع عارفة عبد الرسول

ولفتت: "وأنا صغيرة كنت بلبس بيكيني، ولما كبرت شوية بقيت ألبس قطعة واحدة، ودلوقتِ بلبس زي البيبي دول، وبراعي السن وممكن ألبس البوركيني، ولكل مقام مقال".

غيرة زوج عارفة عبد الرسول وقصة القبلات

وعن علاقتها بزوجها، قالت: "أنا متجوزة من 44 سنة وطول فترة زواجنا كان فيه مشاكل وصعوبات وكفاح، واتجوزنا عن حب وبنحب التمثيل، ولما اتخرجنا اشتغلنا في المسرح، وكان فيه بيننا خناقات، ولكن في النهاية بنتصالح بفنجان قهوة، ومفيش ما بيننا غيرة، ولو شاف واحدة حلوة بقول له فعلًا حلوة وجميلة، وبعدين احنا في مجال فني؛ نسلم ونبوس بعض عادي، ولكن ما ينفعش نطول في النظرة ولا السلام لإني بحس ساعتها إن فيه حاجة غلط".

ونقدم لكم من خلال موقع “فيتو”، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل: الدوري الإنجليزي، الدوري الإيطالي، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.