آخر تطورات الحالة الصحية للفنانة علا غانم بعد إصابتها بارتجاج في المخ

علا غانم، كشفت ابنة الفنانة علا غانم آخر تطورات الحالة الصحية لوالدتها بعد نقلها المستشفى بعد إصابتها بارتجاج في المخ.

وقالت ابنة علا غانم في تصريح خاص لفيتو: "إنهما ما زالا في انتظار رأي الأطباء في الحالة الصحية لوالدتها وذلك بعد نقلها إلى المستشفى بعد تعرضها للارتجاج في المخ.

واتهمت ابنة علا غانم زوج والدتها بأنه سبب في دخولها المستشفى. 

وكانت كشفت ابنة علا غانم تفاصيل جديدة بشأن دخول والدتها إلى المستشفى بعد تدهور حالتها الصحية، عقب الأزمة التي مرت بها مؤخرًا.

وقالت ابنة علا غانم في تصريح خاص لـ"فيتو": "أمي كانت مرتبكة خلال الأيام القليلة وأعراض التعب بدأت تظهر عليها منذ يومين، وأصيبت بارتجاج في المخ ونزيف داخلي وكسر بالعظام، كانت فاكرة إن اللي حصلها دا من الزعل.

أزمة علا غانم وزوجها

وتحدثت النجمة علا غانم من جديد عن أزمتها مع زوجها التي تصدرت السوشيال ميديا خلال الساعات القليلة الماضية.

وقالت الفنانة علا غانم في  تصريح  خاص لـ فيتو:  أنا نفسيتي الحمد الله  وهو  بيقول إنى اعتديت عليه الإدعاء دا غير صحيح أولًا عشان أنا معايا في البيت اتنين عمال فقط  وأمي اللي فوق الـ ٧٠ سنة بس، إزاي هنعتدي عليه وعلى الناس اللي معاه اللي اقتحموا البيت.

وأضافت علا غانم: وهو  لو كان بيته زي ما بيقول ليه يجيب كل الناس دي ويجي يقتحمه وليه يشيل تسجيل الكاميرات اللي هو دليل براءتي الوحيد،  إزاي بيته لا ده بيتي أنا ملكي أنا، مش بيته وهو لما بيقول إني حدفته بإزازة دا اتهام ليَّ ودا ما حصلش دول الناس اللي معاه كانوا بينطوا من شباك العمال وأنا والاتنين اللي معايا العمال كنا بنحاول نحمي البوابة وأول ما نزلت لاقيت دم على وشه أصلًا يبقي إزاي اعتديت عليه.

أنا بقالي 3 أيام  في الشارع وهو قاعد هناك في البيت اللي بيدعي إنه بيته وهو بيتي أنا، لو كان بيته كان هيجيب كل الناس دي معاه ليه ويجيب المحامي بتاعه في البيت ليه.

صرخات علا غانم بعد الهجوم على منزلها

وقالت الفنانة علا غانم باكية، خلال مداخلة هاتفية ببرنامج “الحكاية” الذي يقدمه الإعلامي عمرو أديب بقناة “mbc مصر”: "يوم الجمعة بعد الصلاة فجأة لقيت أحد الخفر بينده لي وبيقول لي فيه ناس كتير بيقولوا أنهم تبعك، طلعت بسرعة أشوف مين الناس دي طلعت على البلكونة لقيت ناس كتير وعربيات كتير وستات، وقالوا لي افتحي عندنا حفلة وعندنا تنضيف، ابتديت أقول لهم هطلب البوليس لأنهم بدأوا يدفعوا البوابة، فجأة لقيت واحد اسمه محمد حسين كان بيشتغل مع جوزي زمان وبيقول إيه يا علا افتحي الباب وبيكلمني بطريقة حقيرة فقلت له اتكلم بأدب وأنا بطلب البوليس وبدأت أصرخ وفجأة لقيت ناس غريبة دخلت، فلقيت زوجي ومعاه الشخص دا وحاولوا يفتحوا البوابة علشان يدخلوا الناس وضربوا الخفر بتوعوا وبقيت أصرخ ومنهم واحد مسكني من الروب وبيحدفني زي الكورة، فجأة البيت كله دخله حوالي 20 شخص ستات ورجالة، أنا ساكنة في المريوطية، وبعدين مش ملاحقة الناس واقتحموا البيت".
 

الاعتداء على علا غانم

وأكملت: "الستات حاولوا يكتفوني وبعدين جريت على أمي، وجوزي اللي رافعة عليه قضية خلع، كانوا بيحاولوا يمكنوه من البيت والستات خدوا مني موبايلي وكتفوني وهو مسح الفيديوهات الخاصة بالكاميرات، البيت دا بيتي من سنة 99 من قبل ما أشوفه وأتجوزه، أمي اتضربت بالشوم قدامي من جوزي، وجاء البوليس بعد فترة واحنا كنا في الجنينة وهو جوا البيت، وحكيت لهم القصة كلها وبعد نص ساعة روحنا على قسم الشرطة وفجأة لقيت كل الناس اللي اتهجموا عليَّ مشيوا، ولما طلعنا على القسم قالوا لي انتى صاحبة الشوم دا فقلت له لأ دا هما اللي اقتحموا بيتي".
 

محضر علا غانم ضد زوجها

وأضافت علا غانم: "عملت محضر فيه وقالوا لي لو ما اتصالحتوش أنتِ وأمك هتقعدوا لتاني يوم، وهو بيقول إن بيتك كبير ممكن يعيش في جزء منه علشان زوجك، فقلت لهم ده مش زوج وأنا رافعة عليه قضية خلع، فرفضت التصالح وبعدين فتحوا التحقيق وفضلت في النيابة لحد تاني يوم الصبح، وأنا مروحة مشيت 10 متر من القسم لقيت اللي شغالين في البيت بيصرخوا وبيقولوا إن فيه ناس ملثمين اقتحموا البيت وخرجوهم منه وضربوهم، فرجعت تاني على القسم ونزلوا معايا قوة وهو كان جوا ومعاه ناس مسلحة وبيقول للناس اللي معاه ما حدش يضرب نار، أنا دلوقتِ مشكلتي مش البيت أنا خايفة علي نفسي وأمي، هو دلوقتِ في بيتي، وأنا في حتة تانية، هو احتل البيت مع الناس اللي رموا عليَّ مولوتوف، أنا رُحت لكل الناس والموضوع حاليًّا عند المحامي العام وأنا منتظرة الرد ومحكمة الأسرة كانت المفترض تحكم من شهر بس هو رد المحكمة، أنا بقى لي في القضاء من 2018 عايزة أنفصل عنه مش عارفة".
 

منشور علا غانم

علا غانم، قالت الفنانة علا غانم بأنها تتعرض للعنف والقهر ومهددة بالطرد من منزلها وطلبت الاستغاثة من المركز القومي للمرأة.

وقالت الفنانة علا غانم من خلال موقع إنستجرام: استغاثة  للمركز  القومي للمرأة  الدكتورة مايا مرسي، أنا الفنانة علا غانم  أتعرض للعنف والقهر والطرد من منزلي وأتعرض للمؤامرة وبلطجة وتهديد لي ولأسرتي بالكامل أغيثوني.

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.