ساخرون.. غراب البين يكتب: شوية بني آدمين لا عندهم حياء ولا عندهم دم
زي كل يوم كنت واقف بتشمس على سور بلكونة الست أم نسمة اللي مش بتتفتح إلا أثناء نشر الغسيل.. جلست وانكمشت بين أجنحتي وأنا أستمتع بصوت العندليب الأسمر قادما من المقهى أسفل البلكونة وهو يردد "يا شط كان مفروش هنا وحب وأماني.. إذاي تسلم مركبي لحد تاني"
وإذ فجأة أسمع صوت أبو نسمة قادما من داخل الحجرة وهو يقول: مش معنى إني بصورك بنفسي إن أنا مش بغير عليكي.. دا أنا بشجعك وعايزك تعملي أحلى أداء يجذب الجماهير.. دا انتي بقيتي أسطورة يا غالية.
فقالت له أم نسمة: يا راجل وطي صوتك أحسن حد يسمعك ويعرفوا إني أنا الأسطورة بتاعت الروتين اليومي.. فقال لها: احنا خلاص ربنا كرمنا ومعانا فلوس ونقدر نسكن في أي حتة في مصر تعالي بقا نسيب الحتة البلدي دي ونمشي
وهنا لم أستطع أن أكمل باقي الحوار فوقفت على قدمي ونفشت ريشي وأخذت أنعق بأعلى صوتي "قاق قاق" فخرج أبو نسمة للبلكونة وأخذ يهشني ويقول لي: غور من هنا يا غراب البين جبتلنا النكد والفقر.. فقلت يا فكيك وهربت مسرعا ولسان حالي يقول:
هما البني آدمين جرالهم إيه.. هي نخوة الرجالة بتاعت زمان راحت فين.. بقا معقول راجل يصور مراته وهي بتتمايل للناس وتستعرض جسمها مقابل شوية دولارات من اليوتيوب أو الفيس بوك؟.. دا أنا كغراب أتكسف أعمل كدا حتى لو هاخد ملايين.. ياخي جاتها ستين ألف نيلة اللي عايزة تخلف بني آدمين زيكم لا عندهم حياء ولا عندهم دم.. قال روتين يومي قال!
