المتهمة بقتل زوجها بأطفيح: عشيقي راجل معايا لكن جوزي كان طيب وغلبان
![جريمة أطفيح، فيتو](images/no.jpg)
جريمة أطفيح، أدلت المتهمة بقتل زوجها بمساعدة عشيقها، وإلقائه في أحد المصارف بمنطقة أطفيح التابعة لمحافظة الجيزة، باعترافات تفصيلية عن جريمتها أمام النيابة العامة.
وقالت المتهمة إنها تعرفت على عشيقها ويدعى “محمد. أ” منذ عام ونصف، أثناء عملهما في إحدى المزارع، وأضافت: “لأني مكنتش بحب جوزي وتعلقت بعشيقي لأنه كان راجل معايا وكان بيقف في ضهري، وبيجبلي حقي بعكس جوزي اللي كان طيب وغلبان، وكان بياخدني في حضنه زي بنته”.
وتابعت المتهمة بقتل زوجها بمساعدة عشيقها: “وقعت خلافات أسرية بيني وبين زوجي وطلبت الطلاق منه، لكن هو رفض، وأخدت رأي محمد إني أرفع قضية خلع، لكن هو رفض ونصحني إني كدة هجيب العار لأولادي، وأقنعني إننا نخلص منه ونقتله، ودبر الخطة للتخلص منه وقالي أنتي هتبعتيه لحد كأنه هيجيب منه فلوس بجوار أحد المصارف في أطفيح، وأنا هقابله هناك ونقتله ونرميه في المصرف، ولا من شاف ولا من دري، وبعدها اتكلمت مع جوزي وقلتله هتروح لواحد كان شغال معانا في المزارع هتجيب فلوس ليا عنده”.
وقالت المتهمة أمام النيابة العامة: “كلمت محمد عشيقي وظبطت معاه علشان يقابلني في الطريق، زي ما اتفقت أنا وهو وفعلا جوزي مشي من البيت وراح المكان، وقمت كلمت عشيقي في التليفون وقلتله إن جوزي طلع من البيت ورايح المكان اللي اتفقنا عليه، وعشيقي أجر عربية وراح على المكان في بنزينة، رجعت كلمت جوزي وقلتله إنه يقابل حد في البنزينة علشان هو اللى عارف مكان الراجل اللي ليا عنده فلوس، وبعدها بساعة اتصل عليا عشيقي وقالي إنه قابل جوزي وهياخده ويخلص عليه”.
وأضافت المتهمة: “عشيقي بعد كده ركب معاه العربية اللي كان مأجرها، وطلع بيه على مكان الواقعة في مكان مفيش حد بيعدي منه كتير، وعمل إن العربية عطلانة، ونزل فتح الكبوت وجوزي نزل معاه وأول ما جوزي ادى لعشيقي ضهره راح عشيقي خانقه بالتلفيحة اللي كانت معاه، ولفها حوالين رقبته وكتم نفسه، ورماه في الترعة، وبعد ما عمل كده كلمني في التليفون، وقالي أنا خلصت عليه ورميته في الترعة، وحكالي على اللي حصل وجالي البيت حكالي على اللي حصل بالتفصيل، ومشي وتاني يوم كلمني وقالي روحي اعملي محضر غياب لجوزك، علشان محدش يشك فينا، وأنا بعدها بخمسة أيام رحت عملت محضر، وقلت إن جوزي غايب عن البيت علشان محدش يشك فينا أنا وعشيقي، وامبارح حوالى الساعة 10:30 بالليل قبضوا عليا وعلى عشيقي، وأنا قولتلهم على كل اللى حصل واعترفت، وحبيبي اعترف وهو ده كل اللي حصل”.
وكانت الأجهزة الأمنية بمديرية أمن الجيزة بإشراف اللواء محمد الشرقاوي مدير الإدارة العامة لمباحث الجيزة نجحت فى حل لغز بلاغ تغيب زوج عن منزله بمنطقة أطفيح، وتبين أن الزوجة المحررة للبلاغ قامت بقتل زوجها خنقا بمساعدة عشيقها.
اختفاء زوج بأطفيح
وكان مركز شرطة أطفيح تلقى بلاغا من ربة منزل أفادت باختفاء زوجها عن المنزل أكثر من يومين فى ظروف غامضة، وتم تشكيل فريق بحث وتحرى من صحة البلاغ.
جريمة أطفيح اليوم
وبإجراء التحريات، تبين عدم صحة البلاغ وأن ربة المنزل وراء ارتكاب الواقعة بمساعدة عشيقها، وتخلصهما من الجثة، وأن المتهمة اتفقت مع عشيقها على التخلص من زوجها حتى يخلو لهما الجو.
وعقب تقنين الإجراءات تمكن رجال المباحث من ضبط المتهمة وعشيقها، وبمواجهتهما اعترفوا بارتكاب الواقعة، وأرشدا عن جثة المجنى عليه.
وتحرر محضر بالواقعة وتولت النيابة العامة التحقيق.
ونقدم لكم من خلال موقع (فيتو)، تغطية ورصد مستمر علي مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.