سهير رمزي تكشف حقيقة زواجها من عمر الشريف (فيديو)

قالت الفنانة سهير رمزي: "ما أثير وتردد عن زواجي من النجم العالمي عمر الشريف مجرد شائعة لا أساس لها من الصحة، مع أنه كان فتى أحلامي وأنا صغيرة وهو حكاية كبيرة لكل البنات اللي كانوا في عمري".
 

قصة سهرة عمر الشريف مع سهير رمزي

وأضافت خلال لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "عمر الشريف لما رجع مصر كنت بقيت نجمة كبيرة هو اتفرج علي فيلم ليا فطلب إنه يشوفني فكلموني وقلت لهم ياريت فعملت له عشاء عندي في البيت وعزمته وعزمت أصدقاءه واحتفلت بيه فأخدوها إنها جوازة أو خطوبة بس ما كانش فيه حاجة من كده".

أسرع زيجة في مصر

ولفتت: "كتبوا كتير إنها أسرع جوازة وإني اتجوزت من عمر الشريف ليلة وبعدها رجع تاني على باريس وقتها طلعت في التليفزيون وكذبت وهو كمان كذب الشائعة". 

شائعات زواج سهير رمزي 

وأشارت: "طلع عليا حاجات كتير كنت بصحى ساعات الصبح متطلقة وزوجي جنبي، أنا ما أحبش راجل الأول لازم هو يحبني الأول ويجري وبتعب ويطلع عينه علشان أنا أوافق، وكتير جريوا ورايا علشان يتجوزوني وأنا رفضت".
 

حقيقة تعرض سهير رمزي لضغوطات سعاد حسني

ولفتت: "ما اتعرضتش لضغوطات من شخص معين زي سعاد حسني وأنا ما أقبلش إني حد يملي إرادته عليَّ أو يجبرني على حاجة معينة لازم القرار يكون من جوايا".

سهير رمزي: كنت هسمم أمي ورفضت استلام نصيبي بميراث والدي لهذا السبب (فيديو)

سهير رمزي عن شخصيتها في مسلسل أم البنات: سيدة شريرة وحنونة (فيديو)

فجرت الفنانة سهير رمزي مفاجأة حول أنها كادت تتسبب في إصابة والدتها بالتسمم عن طريق الخطأ، بعدما أعطتها مادة كيماوية بدلًا من الدواء.

خطأ سهير رمزي مع والدتها

وأضافت سهير رمزي: "كنت هسمم أمي بالغلط وكانت حكاية غريبة، أنا كنت بحب أمي بجنون ومن وقت وفاتها قبل 20 سنة لحد اللحظة اللي أنا فيها بحس إني ضايعة من غيرها وهي كانت بالنسبة لي كل حاجة في حياتي".

مرض والدة سهير رمزي 

وأضافت خلال لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "أمي جت تعبت في يوم وقالت لي تعبانة وعندي مغص فأنا كان عندي دواء الدكتور كان كاتبه لي يريح المعدة ودخلت جري وأخدت إزازة من الحمام وحطيت لها معلقة فشربت معلقة من زجاجة منظفات بها مادة سامة محطوطة جنب زجاجة الدواء اللي المفترض كنت أديلها منها".

إنقاذ سهير رمزي والدتها من المادة السامة

وتابعت: "لما عرفت إني اديت لها المادة السامة ندهت للناس اللي كانوا بيساعدوني في البيت وقلت لهم انزلوا للصيدلية اللي تحت وعرفوا الصيدلي اللي حصل فجابوا لي شربة ملح لازم تشربها علشان تخف ونزيل آثار المادة السامة".
 

موقف صعب لسهير رمزي مع والدتها

وأكملت سهير رمزي: "دخلت أعطي لأمي شربة الملح قالت لي ده مريحني جدًّا المهم قلت لها لازم تاخدي ده، وبعدين اديتهولها في الآخر وشربته ورجعت فقالت لي كنتِ هتموتيني بالسم، وكان يوم مش ممكن وبقيت أقول يا نهار أسود لو كان جرى لها حاجة كنت هروح فيها".

حياة سهير رمزي بعد وفاة والدتها

وتابعت: "أنا مفتقدة الفرحة والضحكة وطعم الأكل والحياة واللبس والقعدة الحلوة بعد وفاة أمي".

سبب رفض سهير رمزي استلام ميراث والدها

وعن سبب رفضها تسلم ميراث والدها، أوضحت سهير رمزي:"أنا بحب آخد الحاجة اللي من حقي شرع ربنا بس أنا وقتها ما كنتش محتاجة وما كنتش عايشة معاه خالص ولا أعرفه ولا يعرفني ولا شفته خالص، إخواتي أحق بالميراث ولما اتنازلت اتنازلت لإخواتي علشان هو اللى مربيهم وقاعدين معاه، واتنازلت لأصغر أخت ليَّ كمساعدة ليها في تجهيزها الخاص بالزاوج، أنا شوفت أبويا مرة واحدة وأنا عندي 13سنة وقتها حضنني وباسني بس اللي كان مربيني المخرج سيد زيادة وكنت بحس إنه قرب لي من أبويا والعشرة والتربية مهمة جدًّا، ولكن ريحة الصوف بتاعت أبويا لسه لحد دلوقتِ في مناخيري".

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.