تشييع جثمان شاب تنبأ بوفاته بأزمة قلبية في بني سويف
شّيع أهالي قرية الفنت الشرقية التابعة لمركز الفشن جنوب محافظة بني سويف، جثمان الشاب محمد مسلم، 22 عامًا، الذي توفي إثر أزمة قلبية مفاجئة، وسط حالة من الحُزن التي أصابت أهالي القرية
وفاة شاب ببني سويف
وقال أحد أهالي قرية الفنت الشرقية: إن الشاب المتوفي محمد مسلم في بداية العقد الثالث من العمر، توفي والده منذ سنوات وهو الابن الوحيد لوالدته على فتاتين هو أكبرهم، وأصيب بأزمة قلبية مفاجئه توفي على إثرها، وسادت حالة من الحُزن الشديد لدى أهالي القرية حزنًا على وفاته حيث إنه كان قريبًا من الكبير والصغير.
وأضاف: "إنا لله وانا إليه راجعون محمد عليه رحمة الله كان مثالًا يحتذى به في الأدب والأخلاق، وكانت جنازته خير شاهد على ذلك حيث صلى عليه وشارك في تشييعه عددًا كبيرًا فكانت جنازته حاشده بالمئات وسط دعوات المشاركين له بالرحمه والمغفره، كما نعاه العديد مستخدموا مواقع التواصل الإجتماعي فيسبوك".
شاب يتنبأ بوفاته
وكان الشاب المتوفي كتب منشورا على صفحته الشخصية بالفيسبوك قبل وفاته جاء فيه: الحقيقة إللى كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأنى محتاج حاجات معينه تتعمل وحاجات خايف تتعمل وأنا مش عايز حد يعملها لمجرد إنها معروفه، ووقتها طبعًا مش هعرف أقولها لحد.
ودي وصيتي
١) صلاة الجنازة أهم من العزا وهى اللى كل ما العدد زاد كل ما ثوابى ما كان أكتر، فأرجوكم تصلوا عليا.
٢) مش شرط تيجى العزا وياريت لو اتعمل فى البيت أو مكان بسيط بفلوسه تطلعولى صدقة جارية أفضل.
٣) من فضلكم لم يثبت أو يتفق عليه عمل ختمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولى الوقت اللى هتقروا فيه جزء فضوا نفسكم واقعدوا ادعوا فيه.
٤) بلاش صدقة جارية تقليدية وسهله ومش مستفاد بيها يعنى المصاحف كتير فى مصر اوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة.
٥) دى نقطة مهمة اوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجه بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم".
٦) أهم حاجة تانى هى الدعاء وبس والصدقة.
٧) من فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبرى روضه من رياض الجنه ويثبتنى عند السؤال لأن دة أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى.
٨) الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى.
٩) اللي بيحبوني يدعولى كتير عشان لو مفيش حد يدعيلى.
١٠) ودى مهمة أوى أوى أوى كمان وهى إسألوا على حبايبي علطول وودوهم وخليكوا قريبين منهم وشيروا بوستات دينيه كتير من صفحتي.
"اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي فإني أحب أن ارحل في هدوء وسكينة وطمأنينه، ولا تقبض روحي إلا وانت راضٍ عني لكي اكون عبدًا مقبولًا لك وعِندك حتي أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء وأعفو عني وأمحو لي كل ما يعرقل طريقي إليك وردّني إليك ردًّا جميلًا يارب العالمين.
