كنباوي وكنباوية.. حلقه رقم (105).. جمعة تفويض السيسي للقضاء على الإرهاب
كنباوي وكنباوية وسط الجموع والحشود الهائلة بميدان التحرير يهللون ويهتفون تحيا مصر والجيش والشرطة والشعب ايد واحدة وعاش السيسي عاش لولاه كنا رحنا بلاش عاش السيسي عاش ثم ينزويان بعد الجهد المبذول في الهتاف ويجلسان على مقهى قريب من ميدان التحرير يلتقطان أنفاسهما ويرتاحان من الإرهاق قليلا..
كنباوي: تشربي إيه يا قمر أنا طاوعتك ونزلتك معايا علشان الواد لما يتولد نقوله إننا نزلنا بيه وهو في بطنك ميدان التحرير علشان نفوض السيسي للقضاء على الإرهاب.
كنباوية: ما كانش ينفع ما انزلش في يوم زي ده، ده واجب وفرض على كل مصري أنه ينزل يدافع عن مصر ضد إرهاب الإخوان.
كنباوي: عندك حق على الله الإخوان يتعظوا ويبطلوا كدب وما يقولوش أن الأعداد دي فوتو شوب ومفبركة زي ما قالوا على أعدادنا يوم 30 يونيو.
كنباوية: يقولوا اللي يقولوه ما حدش راح يصدقهم تاني خلاص الإخوان انتهوا وراحت أيامهم ربنا لا يرجعهم.
كنباوي: دول كانوا حيدمروا البلد سي "حسن مالك" عمال يصرف عليهم وعلى قعدتهم في رابعة عجول وخرفان وفلوس حيمشوا ليه بقي ماهمه بياكلوا في أته محلولة ومعطلين مصالح البلد.
كنباوية: أكيد فيه ناس تانية غير مالك بتصرف هي كمان مش بعيد تكون أمريكا لأن أمريكا زعلانة عليهم.
كنباوي: وأي زعل كأن الإخوان دول ولاد عم أوباما يلا أهه أوباما نقبه طلع على شونه وخد فيهم خازوق تسلم إيدك ودماغك يا سيسي يا اللي مابتخافشي من حد .
كنباوية: ده لازم تتعمل له محطة مترو أنفاق باسمه زيه زي جمال عبد الناصر ومحمد نجيب والسادات.
كنباوي: ده أقل واجب وميدان كمان باسمه.
كنباوية: هو يستاهل كل خير يستاهل أنه يبقي مشير.
كنباوي: يا كنباوية ده لولا حكاية حكم العسكر كان يستاهل يكون رئيسنا رئيس كل المصريين بس ساعتها كلام الغرب مش حيخلص وكلام المنافقين اللي حيقعدوا يقولوا أنه شال مرسي علشان يمسك البلد.
كنباوية: بس هو أكفأ واحد يصلح أنه يحكم مصر لأنه رجل دولة مش بيخاف وسياسي محنك.
كنباوي: كلامك صح والناس دي كلها حتكون وراه بس المعونة الأمريكية بتاعة الجيش حتتقطع.
كنباوية: ملعون أبوها المعونة همه حيشترونا علشان المعونة ويخلونا نعمل اللي عكس إرادتنا.
كنباوي: خليها تعدي على خير وهو كبيرنا برضه حتي لو جه 100 رئيس.
كنباوية: على قولك هو رئيسنا اللي حنفضل نسمع كلامه ونطيعه طول العمر هو اللي نصفنا وخلصنا من مرسي وأعوانه والأضيشة.
كنباوي: ده لولاه كان الإخوان باعوا واشتروا فينا وما كانوش طلعوا من الحكم ولا بالطبل البلدي.
كنباوية: ربنا يسهل ويخلصنا كمان من إرهابهم.
كنباوي: حيحصل كلها أيام ويلمهم ويعلمهم الأدب ويطلع البلا على جتتهم ويحاسبهم على كل الغلط اللي غلطوه في مصر والمصريين وفي الجيش اللي استحلوا دم جنوده وظباطه.
كنباوية: أنا كل ما بشوف أهالي الظباط والجنود اللي ماتوا على إيدين الإخوان وأنصارهم في سينا قلبي بيتقطع عليهم ماتوا في عز شبابهم ربنا يصبر أهاليهم.
كنباوي: دول كانوا زي الورد ربنا ينتقم من اللي استباح دمهم.
كنباوية: آمين يارب.
كنباوي: مش يلا نرجع البيت علشان البت لوحدها وأدينا عملنا الواجب اللي علينا علشان أنا كمان عندي شغل بكره بدري .
كنباوية: يلا ياكنباوي أدينا فرحنا مع الناس تعالي نرجع بفرحتنا.
كنباوي: ربنا يفرحك كمان وكمان.
كنباوية: ويفرحك يا كنباوي ويفرح كل المصريين.
كنباوي: آمين يا رب آمين !
