رأس السنة 2023، اللي فات بلطي واللي جاي جمبري، أبرز تصريحات محمد رمضان مع منى الشاذلي
رأس السنة 2023، تحدث النجم محمد رمضان عن العديد من الأسرار في حياته الشخصية والفنية وعن كواليس أزمته مع الطيار الراحل أشرف أبو اليسر وذلك في سهرة خاصة مع الإعلامية منى الشاذلي احتفالًا بالعام الجديد.
ومن خلال السطور التالية ترصد “فيتو” أبرز تصريحات محمد رمضان في سهرته مع منى الشاذلي.
وودع الفنان محمد رمضان عام 2022، على طريقته الخاصة خلال لقائه مع الإعلامية منى الشاذلي ببرنامج “معكم” المذاع على قناة “cbc”.
رسالة محمد رمضان لعام 2022
وقال محمد رمضان: "بقول لعام 2022 اللي فات بلطي واللي جاي جمبري".
قال الفنان محمد رمضان:"دلوقتِ بحتفل برأس السنة زمان كنت بتفرج على اللي بيحتفلوا برأس السنة، كان فيه قصر في البحر الأعظم وبيعملوا حفلات ونقعد أنا وصحابي بعيد نتفرج على اللي بيحتفلوا ونحس إننا قاعدين معاهم، والإحساسين حلوين زمان كان فيه شعور جميل ودلوقتِ جميل جدًّا، وأنا بحب البلطي والجمبري".
سر ملابس محمد رمضان الغريبة
وعن لبسه الغريب، علق محمد رمضان: "مش في الحقيقة بلبس كده والحفلات بتتطلب جزء من الشو ويبقى فيه بهرجة إنما في الحقيقة بلبس بسيط جدًّا، ولبسي شبه لبس كل الشباب، ومعايا إستايلست بيلبسوني في الحفلات ومعايا إستايلست نيجيري لما يكون عندي حفلة في أفريقيا، وإستايلست مغربي لما يكون عندي حفلة في المغرب، وفي افتتاح فورمولا 1 كنت لابس لبس السباق، وفي حفلة أمريكا بلبس لبس الموضة عندهم علشان ما يبانش إن فيه فجوة".
أغرب بدلة لمحمد رمضان
وعن أغرب بدلة ارتداها، أشار: "كان عندي مؤتمر مع ميتر جينس فقلت للإستايلست النيجيري.. لقيته جاب لي بدلة بتاعة تجار الألماظ السنغاليين، فمحمود أخويا قال لي لو لبست البدلة لا أنت أخويا ولا أعرفك، ولكن أنا أخدت المخاطرة ولبست البدلة علشان أكسب 2 مليون سنغالي، بيكون فيه إستراتيجية ممكن الجمهور ما بيقدرهاش".
وعلق الفنان محمد رمضان على صورته مع المطرب الإسرائيلي التي أثارت الجدل ودفعها ثمنها غاليًا، قائلًا: "أنا بقابل الناس بكل الحب والود، وما أعرفش إذا كنت بصافح أو اتصور مع شخص إسرائيلي من عدمه، وما أقدرش أحرج قطاع كبير من جمهوري بقابله بود وبحب وأتصور معاه، ويجوز أتصور مع شخص قاتل دخل حضني وباسني أو شخص ينتمي لشيء أنا ضده، بس أنا معرفِش".
قصة صورة محمد رمضان مع المطرب الإسرائيلي
وأوضح: "كنت في عشاء في مطعم واتصورت مع ناس كتير ومن ضمنهم الشخص الإسرائيلي وما أعرفش إنه إسرائيلي، والموضوع بقى قضية رأي عام واتوقفت من نقابة المهن التمثيلية، بس أنا فعلًا ما كنتش أعرف إن الشخص دا إسرائيلي".
موقف محمد رمضان من التطبيع مع الكيان الصهيوني
وتابع محمد رمضان: “أنا لا أتحدى قرار منع التطبيع مع الكيان الصهيوني، وتقبلت تحقيق النقابة بصدر رحب وسألوني وقلت لهم الإجابات الحقيقية، وفي نفس السنة عملت مسلسل ”البرنس" أو "موسى"، وضحكت وقلت لهم لو كل شخص بتصور معاه مستحيل هقول له أنت دينك إيه أو بلدك إيه، الآلاف اللي بيتصوروا معايا مستحيل أعرف دياناتهم وجنسياتهم".
أعرب الفنان محمد رمضان، عن ندمه على المشكلة التي تسبب فيها للطيار الراحل أشرف أبو اليسر، قائلا: "أنا زعلان إني تسببت في شيء قاسي على الراحل الطيار أشرف أبو اليسر، وأتمنى الناس كلها تترحم عليه".
قرار إيقاف الطيار أشرف أبو اليسر
وتابع: "أعترف بشيء؛ إني بتعلم من إدارة أزماتنا وساعات ما بنحسنش إدارة الأزمة، تفاجأت بقرار إيقاف موظف مدى الحياة علشان ممثل أو شخص اتصور جوة الطيارة، وعرفت فيما بعد إنه شيء قانوني مظبوط، وكنت بتمنى إن القرار يكون أخف لو كان جزاء، وكنت جاهز وحاولت بقدر الإمكان وبكل الطرق أحل الموضوع قبل ما يتصعد ويبقى قضية رأي عام، ولكن محصلش نصيب في الحل، واتطلب شيء وحاولنا بشيء، والموضوع وصل للقضاء، ولو رجع الزمن للوراء، واللي زعلني شخصيًّا إن الموضوع قدم في الإعلام اني سبب في شيء صعب زي ده، والأعمار بيد الله والوفاة حصلت بعد لما هو كسب القضية والقضاء أنصفه، وبكل الحب والرضا المبلغ اللى القضاء حكم به بكل التسامح والرضا وصل للمحكمة ولأسرة الطيار الراحل اشرف أبو اليسر".
وأكمل: "دفعت المبلغ بكل الحب والرضا والتسامح، ولكن المبلغ ما عوضوش أيضا إنه يتوقف مدى الحياة عن شغله، ومش بإيدي أعمل أكتر من كدا، ولو ينفع أروح للجهة اللي فصلته مدى الحياة أعمل شيء، إنه يرجع لوظيفته كنت عملت".
واستطرد محمد رمضان: "طالما القضاء حكم ضدي، إذن فأنا أخطأت، أنا مش دارس قانون والموضوع راح للمحكمة، والمحكمة نظرت الموضوع ورأت أن الخطأ عندي، وأنا راضٍ وواثق في قضاء بلدي، وأنا غلطت ومفيش حد مبيغلطش، والمبلغ اللى المحكمة حكمت به أنا دفعته".
وقال الفنان محمد رمضان: "أول فنانين قلدتهم من المشاهير كان الزعيم عادل إمام والفنان أحمد زكي، وكنت بحس أن أداءهم مميز وكنت أحب طريقة الفنان كمال الشناوي".
وقلد محمد رمضان، كل من كمال الشناوي وعادل أدهم ومحمود المليجي".
موقف طريف لمحمد رمضان
ولفت: "اتفقت مع نفسي إن مفيش حاجة هتوقفني أو تعطلني عن التمثيل، وما كنتش بستهتر بأي حاجة وأستخدم كل الأساليب علشان أوصل، ومرة رُحت صوت القاهرة، وفضلت من 10 الصبح لـ1 الظهر ولما دوري قرب طلع واحد وقال اللي مش طالب في معهد فنون مسرحية يروح فرُحت، وفضلت مستني أحد المخرجين اللي كانوا بيمتحنوا وفضلت أتتبعه لحد لما لقيت الوقت المناسب وعرفت بيحب إيه وبيكره إيه، ورُحت تاني يوم ودخلت أمتحن في صوت القاهرة، قلت له أنا عارف إني مختلف عن أي حد بس اسمعني وقلت كل حاجة هو بيحبها ومنها إنه زملكاوي وبيحب فردوس محمد في دور الأم وحبه لأحمد أبو مسلم مع الأهلي وكل شيء عرفته عن اللي بيحبه، وفي الآخر قال لي اقعد وشغلني معاه".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
