محمد رمضان: ندمان على فيلم "عبده موتة"، ولو عاد بي الزمن مش هعمله

قال الفنان محمد رمضان: "عملت فيلم عبده موته، وأنا عندي 24 سنة، ولو اتعرض عليَّ الفيلم دلوقتِ مستحيل أعمله زي ما اتعرض ولكن هعمله بنضج عقلي ورؤية أشمل وتفاصيل أكتر".

توقعات فيلم عبده موتة

وأوضح خلال لقائه ببرنامج “معكم” الذي تقدمه الإعلامية منى الشاذلي بقناة “سي بي سي”: "وأنا بعمل فيلم عبده موتة، ما كنتش متوقع إن هيشوفه كم الناس الكبير دا ويكسر السينما والسينمات كانت رافضة الفيلم في الأول ولما حقق نجاح كبير بعد يومين أصرت عليه".

حسن النية لدى محمد رمضان في عبده موتة

ولفت: "أنا بدخل بيوت ناس وبشكل عقل جيل علشان كدا ندمان على الفيلم، ولكن من حسن النية في عبده موته إن في نهاية الفيلم هو اتعدم وهو صغير أنا مطلعتهوش بطل".

رؤية محمد رمضان

وأشار: "رؤيتي اتغيرت وما كنتش أعرف أنا هبقى واصل لفين عند الجمهور، وقت الفيلم كنت ماضي فيلم الألماني واتعرض عليَّ فيلم ساعة ونص ووافقت وفيلم حصل خير وعملت الـ3 مشاريع علشان أقدمهم للجمهور، وأقول لهم إني ممثل مصري طالع من وسطكم".

مسلسل ابن حلال

وتابع: "الناس عندها حق في الهجوم وانتقاد فيلم "عبده موته" والنقد اللي وصلني في الفيلم بناءً عليه عملت مسلسل "ابن حلال".

محمد رمضان: نادم على أزمتي مع الطيار أشرف أبو اليسر ودفعت لأسرته مبلغا ماليا (فيديو)

محمد رمضان يقلد عادل أدهم ومحمود المليجي وكمال الشناوي ويكشف رأيه في الزعيم (فيديو)

وقال الفنان محمد رمضان: "دلوقتِ بحتفل برأس السنة زمان كنت بتفرج على اللي بيحتفلوا برأس السنة، كان فيه قصر في البحر الأعظم وبيعموا حفلات ونقعد أنا وصحابي بعيد نتفرج على اللى بيحتفلوا ونحس إننا قاعدين معاهم، والإحساسين حلوين زمان كان فيه شعور جميل ودلوقتِ جميل جدًّا، وأنا بحب البلطي والجمبري".
 

سر ملابس محمد رمضان الغريبة

وعن لبسه الغريب، علق محمد رمضان: "مش في الحقيقة بلبس كده والحفلات بتتطلب جزء من الشو ويبقى فيه بهرجة إنما في الحقيقة بلبس بسيط جدًّا، ولبسي شبه لبس كل الشباب، ومعايا إستايلست بيلبسوني في الحفلات ومعايا إستايلست نيجيري لما يكون عندي حفلة في أفريقيا، وإستايلست مغربي لما يكون عندي حفلة في المغرب، وفي افتتاح فورمولا 1 كنت لابس لبس السباق، وفي حفلة أمريكا بلبس لبس الموضة عندهم علشان ما يبانش إن فيه فجوة".
 

أغرب بدلة لمحمد رمضان

وعن أغرب بدلة ارتداها، أشار: "كان عندي مؤتمر مع ميتر جينس فقلت للإستايلست النيجيري جابلي بدلة بتاعت تجار الألماظ السنغاليين فمحمود أخويا قال لي لو لبست البدلة لا أنت أخويا ولا أعرفك، ولكن أنا أخدت المخاطرة ولبست البدلة علشان أكسب 2 مليون سنغالي، بيكون فيه إستراتيجية ممكن الجمهور ما بيقدرهاش".

مشكلة أغنية نمبر وان

ولفت: "لما انتقدوا أغنية نمبر وان عذرتهم وحطيت نفسي مكانهم وقلت لو أنا مكانهم وحد تاني بيغني نفس الأغنية هقول مين ابن الذين دا وهتضايق منه طبعًا".
 

قصة محمد رمضان منذ الصغر

وأشار: "حبيت التمثيل من وأنا صغير ومش عارف أخدته منين لأن مفيش حد في عيلتنا ممثل ولا له في التمثيل، وأمي لمست من وأنا صغير إني بلقط حاجات كتير وبخزنها وبمثلها قدام المراية وقدام أصحابي، أمي كانت شغلها في تفصيل الملابس للسيدات فكان بيجي لها ستات كتير والستات بطبعهم بيحبوا الكلام فكنت بسمع كلام يضحك ويبكي، وكنت ببقى قاعد بذاكر وألاقي نفسي عيطت على واحدة عملت كل حاجة مع زوجها وبعدين يسيبها ويطلقها وياخد اللي حيلتها".
 

وأكمل محمد رمضان: "المنطقة اللي اتولدت فيها شكلت حاجات كتير فيَّ، وكنت كل يوم بروح عند قهوة بعرة، ولما أخدت أفضل موهوب في المسرح المدرسي على المستوى الجمهورية في أولى ثانوي، رحت للمخرج وقلت له يا أستاذ أنا عايز أقابل المخرجين اللي بجد بتوع التليفزيون والسينما فقال لي انزل وسط البلد فأخدت منه الكلمة فروحت محطة الأتوبيس وكنت متخيل إني هنزل هلاقي حسين فهمي ماشي والوسط الفني كله متجمع، فبقيت أدخل عمارة عمارة علشان أشوف المخرجين ودخلت وسط البلد عمارة عمارة علشان أوصل لمخرج يخليني أمثل، وأول عمارة كانت فيها مخرج شرائط كاسيت وقال لي عمارة التوفيقية وفيها المخرج السيد راضي، كنت أمسك كوز الذرة وأتخيل إنه أوسكار، وكان عندي حلم وعايز أوصل له بأي طريقة، وبسعي وراء شيء جميل بحبه".

وتابع: "كنت بقول لكل مخرج شغلني وظفني وكل اللي أنت عايزه أنا هعملهولك لإني كنت مؤمن بموهبتي وعارف حقيقة إمكانياتي".

وأشار: "ما كنتش بحب أشوف القصص الحزينة، وكنت أشتري كتب السير الذاتية ومنها قصة بيليه وإزاي قدر ينجح ويوصل لما وصله وهو ما كانش معاه يشتري جزمة".

ونقدم لكم من خلال موقع (فيتو)، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.