حكاية المنديل والمخدة والهلال في حياة أم كلثوم.. وسر جلوس كوكب الشرق ربع ساعة قبل كل حفلة (فيديوجراف)
منديل ومخدة نوم ملازمينها في كل مكان.. ونص ساعة قافلة على نفسها أوضتها وبعدها ربع ساعة قاعدة على المسرح قبل كل حفلة.. كواليس وأسرار كتيرة من حياة الست أم كلثوم.. هنعرفها معاكم
مولد أم كلثوم
كوكب الشرق والست وثومة.. قول زي ما تقول هي في الآخر هرم من أهرامات الفن مش بس في مصر لا في الوطن العربي كله.. هي الست أم كلثوم اللي كتبت اسمها بحروف من نور فى تاريخ الفن العربي
اسمها الحقيقي فاطمة إبراهيم السيد البلتاجي واللي اتولدت فى 31 ديسمبر 1898 بالسنبلاوين بمحافظة الدقهلية وبدأت الغنا من باب الإنشاد وهي طفلة صغيرة مع والدها وأخوها الكبير في الموالد والأفراح وفي عام 1922
وبعد كدا انتقلت للقاهرة وكونت أول تخت موسيقي لها سنة 1926 ودي كانت نقطة انطلاقها لما تعرفت على الشاعر أحمد رامي ومن بعده الملحن محمد القصبجي
التاريخ الفني والإنساني في حياة الست يحتاج حلقات وحلقات علشان بس تقدر تتكلم عنها لكن هناخد جزء بسيط من أكتر الحاجات الغريبة اللي كانت دايما بتلازمها سواء في حياتها يا ترى إيه ؟!
كشف الموسيقار هاني مهنا في تصريحات تليفزيونية إن من بين طقوس الست قبل صعود المسرح كانت قراءة القرآن لمدة نص ساعة في غرفتها الشخصية وكانت بتخرج اللبيسة بتاعتها عشان تندمج
وفي نفس اللقاء حكى مهنا عن موقف يدين به بالفضل لأم كلثوم حينما اشترى أورج كهربائي من أمريكا للعزف وتم الحجز عليه في الجمارك وتطلب الأمر استخراج تصاريح من 7 جهات رسمية منها (وزارة الاتصالات- المخابرات العامة- المخابرات الحربية - الإلكترونيات في بنها).. وقال: "كنت محتاج ولا 10 سنين عشان أخرجه من الجمارك ولما لجأتلها خرجتهولي بمكالمة تليفون”.
حفلات أم كلثوم
من بين الإشاعات ونقدر نقول التهم اللي كانت محاصرة أم كلثوم هي انها كانت بتتعامل بتكبر وتعالي مع المحيطين بيها.. ودا اللي نفاه هاني مهنا
ووضح سبب الاشاعة دي عنها بإن الكل كان بيستغرب ليه ثومة كانت بتقعد ع الكرسي في مطلع الأغنية وكانوا فاكرينها بتتعالى على فرقتها الموسيقية والجمهور
وكمل: "أم كلثوم فسرتلي بنفسها السبب قالت لي: أنا بقعد لأن ماليش دور في المشهد العازفين هم الأبطال الحقيقيين فببقى عايزة سوكسية الجمهور كله يروحلهم لحد ما يجي الدور عليا في الغنا
وتخيل أن أم كلثوم بكل شهرتها تقول لهاني مهنا: “هقولك على سر أنا كنت بتعمد أقعد ربع ساعة في الأول عقبال ما أتمالك أعصابي قدام الجمهور لأني كنت بحترم جمهوري لدرجة الخوف الخوف منه وعلى تاريخي ومع ذلك كانوا بينتقدوا طول مدة مطالع أغانيا عشان مايعرفوش السبب وفاكرني بملأ وقت الحفل”.
منديل أم كلثوم
علاوة إلى طقس آخر كان ملازمًا للست طوال مسيرتها وهو المنديل.. الذي حاول كثيرون معرفة سره إلى كشفت بنفسها عنه في لقاء صحفي وقالت: “كل ما الفنان يكبر خوفه من الجمهور بيزيد واحترامه له ورهبته منه.. وانا كنت بمجرد طلوعي المسرح واوجه الجمهور كنت بتوتر لدرجة ان ايدي بتعرق فكنت بمسك المنديل منه انشف عرق ايدي ومنه بالضغط عليه احاول اهرب من التوتر واتغلب على خوفي من الجمهور”.
وعادة أخرى وليست أخيرة كانت تحرص عليها كوكب الشرق عند السفر خاصة إذا كانت ستؤدي أغنية جديدة وهي حملها لـ هلال خاص بها مصمم من الألماس كانت تتفاءل به
مخدة نوم أم كلثوم
ومن بين الأسرار الطريفة في حياة كوكب الشرق اللي مكنش كتير يعرفها واللي كشفه الدكتور محمد حسن الحفناوي نجل زوجها الراحل الدكتور حسن الحفناوي في لقاء نادر له لما قال ان من أغرب وأهم العادات اللي كانت بتحرص عليها سيدة الغناء العربي في حياتها اليومية خاصة وقت السفر اصطحابها لـ مخدة النوم الخاصة بيها
وعن المخدة قال: «كانت الست بتاخد مخدة النوم معاها في كل رحلاتها وكانت بتخصص ليها شنطة صغيرة عشان تحس إن نومها مستقر»
أكلات كوكب الشرق
ومن بين العادات الخاصة بأكلات أم كلثوم انها كانت بتتجنب الأكلات الدسمة وبتفضل الوجبات الخفيفة فكانت تحب أوي الأكل البسيط وكانت بتعشق أكل الجبن القريش والسريس
