عصام الحضري: ندمت على انضمامي إلى الزمالك وكان نفسي أختم حياتي في الأهلي
قال الكابتن عصام الحضري حارس مرمى منتخب مصر والنادي الأهلي السابق: "قعدت أتنافس على رقم 1 لمدة 25 سنة، ونادر السيد أكتر حارس مرمى خلاني أغل على أي حد وأموِّت نفسي في التمرين، والفترة اللي جاء فيها في النادي الأهلي كنت مركز في التدريب بس وما بكلمش حد، وقلت لأحمد نادر السيد مشكلتي مع أبوك كانت المنافسة بس، وأحمد أحسن من نادر مليون مرة".
كواليس مشاركة الحضري في أمم أفريقيا 2017
وأشار خلال لقائه ببرنامج “اللعيب” الذي يقدمه الإعلامي مهيب عبد الهادي بقناة “إم بي سي مصر”: "قبل بطولة أمم أفريقيا 2017 الكابتن أحمد ناجي قال لي أنت الحارس التالت موافق، وقتها عينيَّ دمعت لإني حسيت بالظلم، لإني كنت أحسن واحد، قلت له مفيش مشاكل واللي ربنا عايزه ليَّ هيكون بس أنا هحسبن وطلعت الأوضة بعيط بهستيريا، وتاني يوم الصبح قلت له أنا معاكم ولو عايزيني أشيل الجزم هشيلها، بعدها اتصاب شريف إكرامي في التمرين.
وتابع: "وفي أول ماتش اتصاب أحمد الشناوي، وافتكر واحنا بنسخن الكابتن ناجي قال لي فك وشك فقلت له اللي ليك عندي التمرين مفيش كلام، لقيته بيقول لي فك وشك ما تعرفش إيه اللى ممكن يحصل بعد ربع ساعة، وفعلا الشناوي اتصاب فلقيته بيقول لي سخن علشان تنزل، وربنا وفقني وكرمني طول البطولة".
قوة محمد الشناوي في ضربات الجزاء
ولفت عصام الحضري: "محمد الشناوي بيذاكر ضربات الجزاء وأبو جبل بيأكد المعلومة عن طريق الكتابة على زجاجة المياه".
ندم الحضري على الرحيل عن الأهلي والانضمام للزمالك
وأكد: لعبت في الأهلي 14 سنة حققت كل حاجة وحصلت على كل الألقاب، وأخطأت في قرار رحيلي عن الأهلي بس ما لقتش حد ينصحني، الأهلي بيتي وبدخله على طول وكان نفسي أختم حياتي في الأهلي بس الموضوع كان صعب بسبب قرارات الإدارة اللي بحترمها، وندمت إني رُحت لنادي الزمالك بسبب هجوم الجماهير عليَّ وعدم توفيقي في الفترة دي، أنا كنت بتحارب من جمهور الزمالك".
نقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوداث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
