غراب البين يكتب: ياريت تستحملوا ظروف بعض (ساخرون)
بعد يوم طويل من اللف والدوران والمرازية فى خلق الله قررت أريح جتتى ساعتين قبل طلوع النهار فوقفت فوق سور بلكونة الست منيرة مرات الأستاذ محمد اللى شغال فى مجلس المدينة
وقبل ان تغط عيناى فى النوم سمعت صوت الاستاذ محمد يأتى من داخل حجرة النوم وهو يقول لزوجته: يا وليه إتخمدى وارحمينى الفجر قرب ياذن
فقالت له الست منيره: طب العيال ذنبها إيه يعنى.. كل حاجه سعرها زاد ولازم تزود لهم المصروف حبتين
فقال لها: كفاية عليهم السندوتشات اللى بياخدوها معاهم المدرسة.. مش لازم الشيبسى ومش لازم العصير.. وكفاية عليهم فلوس المواصلات.. الفلوس الزياده هيعملوا بيها إيه
فقالت له: العيال بتغير من بعضها ولازم يكون معاهم فلوس زياده وكمان لازم ميبقوش اقل من زملائهم
وهنا علمت أن الليه دى مافيهاش نوم فوقفت على قدمى ونفشت ريشى وأخذت انعق باعلى صوتى "قاق قاق" فراحت الست منيرة تخبط على شيش البلكونة وتقول لى: غور من هنا يا غراب البين يا فقرى جبتلنا النكد والفقر
فهربت مسرعا قبل أن تخرج للبلكونة وتحدفنى بمشابك الغسيل كعادتها ولسان حالى يقول:
بقا انا اللى جبتلكم النكد والفقر أم أنتم من تنكدون على أنفسكم وأزواجكم يا ست منيرة؟!
ياريت الستات ترحم ازواجها فى هذه الظروف الصعبة على العالم كله.. الأسعار تضاعفت فلازم طلباتكم تنقص للنصف علشان تعرفوا تعبروا المرحلة المنيلة بستين نيله دى.. جاتها ستين ألف نيلة اللى عايزة تخلف بنى آدمين زيكم مش عارفين يستحملوا ظروف بعض!!
