مكالمة تليفون انتهت بعقد جواز واتنين شهود.. قصة حب نجلاء فتحي وحمدي قنديل وزواج استمر أكثر من ربع قرن (فيديوجراف)
نجلاء فتحي، الملامح أوروبية لكن الطبع والأصل مصري 100%.. واحدة من أيقونات الجمال والأنوثة في تاريخ الفن المصري.
الفنانة الجميلة نجلاء فتحي اللي اتولدت في 21 ديسمبر سنة 1951 بمحافظة الفيوم لوالدين مصريين.. نجلاء فتحي مكنش اسمها الحقيقي وقت ولادتها لكنه مجرد اسم فني اختاره لها العندليب الأسمر عبد الحليم حافظ.
هي فاطمة الزهراء حسين فتحي اللي اكتشفها المنتج والكاتب عدلي المولد والفنان عبد الحليم حافظ وتم إسناد ليها دور في فيلم الأصدقاء الثلاثة سنة 1966 أما رمسيس نجيب فقدمها كبطلة في فيلم أفراح للمخرج أحمد بدرخان سنة 1968.
زيجات نجلاء فتحي
اتجوزت نجلاء فتحي 3 مرات الأولى كانت من المهندس أحمد عبد القدوس ابن الأديب الراحل إحسان عبد القدوس لكن الجوازة مستمرتش كتير، لأنها كانت في السر واللي تمت وهي بنت 18 سنة خوفا من رفض أهلها.
وبعدها اتجوزت من سيف أبو النجا اللي أنجبت منه بنتها الوحيدة ياسمين وهو كمان الأخ الأكبر للفنان خالد أبو النجا واللي ظهر في فيلم إمبراطورية ميم في دور الابن الأكبر للفنانة فاتن حمامة.
والزيجة الأخيرة والأطول في حياتها كانت من الإعلامي الراحل حمدي قنديل واللي استمرت معاه أكتر من 25 سنة حتى وفاته في 2018.
للوهلة الأولى لما تعرف طول مدة زيجتها من حمدي قنديل تفتكر انها نتيجة قصة حب عنيفة استمرت لسنين لكن اللي ميعرفهوش كتير انها جوازة تمت بمكالمة تليفون وبناء على طلبها هي.. طيب إيه حكاية وقصة الجوازة دي؟!
قصة حب نجلاء فتحي وحمدي قنديل
نشأت قصة حب بين الثنائي لما كان حمدي قنديل بيشتغل صحفي في إحدى المؤسسات الكبرى وطلب من الفنانة نجلاء فتحي ميعاد في أوائل التسعينيات لإجراء حوار صحفي معاها.
وكان الميعاد في منزل شقيقة نجلاء فتحي وقتها فوجئ حمدي قنديل بأنه على معرفة شخصية بزوج شقيقتها وفوجئ هناك بأنهم ينادونها في المنزل باسم زهرة ودي كانت المرة الأولى اللي عرف فيها اسمها الحقيقي فاطمة الزهراء.
وتوطدت العلاقة الشخصية بين نجلاء فتحي وحمدي قنديل وتحولت لصداقة كبيرة.
مكنش يخطر ببال حمدي قنديل ان الصداقة دي ممكن في يوم من الأيام توصله لعش زوجية يجمعه من جميلة جميلات عصرها نجلاء فتحي في بيت واحد.. لحد ما وصلته مكالمة قلبت حياته
«أنا هتجوزك النهارده، هات جواز سفرك وتعالى على البيت».. جملة غريبة أصابت الإعلامي حمدي قنديل بصدمة وتوتر وكان رده عليها أكثر غرابة: «عظيم عظيم» وبالفعل انتهت بالجواز اللي استمر 26 سنة حتى وفاته
زواج نجلاء فتحي وحمدي قنديل
وعن قصة الحب والزواج قال الكاتب الراحل في مذكراته: «مرت الأيام وصداقتي بنجلاء كل يوم بتقوى وفي يوم لقيتها بتتصل بيا وتقولي (أنا هتجوزك النهارده).. ومن كتر الصدمة والتوتر رديت عليها: (عظيم عظيم) مكنتش عارف أقول ايه او أعمل ايه وقتها لكن المكالمة انتهت بأننا اتفقنا اني اروح على بيتها ومعايا جواز سفري وبالفعل اتجوزنا».
مذكرات حمدي قنديل
وفي لقاء تليفزيوني قال حمدي قنديل إنه أُعجب بالفنانة نجلاء فتحي بسبب شخصيتها القوية فقال عنها: «أحب المرأة التي تمتلك الجرأة لتقول الصراحة دائما وتعبر عن حبها تجاه الشخص الذي يقف أمامها».
اعتزال نجلاء فتحي الفن
وعن قرارها اعتزال الفن قال إن اعتزال التمثيل تم بمحض إرادتها رغم انه كان رافض لقرار ابتعادها عن الفن لكنه في الوقت نفسه ترك لها حرية الاختيار واتخاذ القرار اللي يرضيها.
