عمرو أديب: فلوسي بتضيع على لحمة ملهاش طعم ومش بتستوي وفيه مشكلة بالسلع
قال الإعلامي عمرو أديب: "همسة عتاب للتجار انتوا غليتوا الأسعار ليه مستوى الأشياء والسلع بدأ يتدهور في سلع كتير وحجم السلع صغر، انتوا رفعتوا الأسعار ليه السلعة حجمها صغر وطعمها اختلف والجودة بقت مش كويسة، وليه بقى فيه متاجر تاريخ الصلاحية يكاد يكون منتهي".
مشكلة ساندوتشات الفول والطعمية
وتابع خلال برنامج "الحكاية" المذاع علي قناة "ام بي سي مصر":"انا بحب اكل فول وطعمية ساندوتشات من يومين بعت أجيب من المحل اللي متعود اجيب منه فمكنش متوفر فجيبت من المحل اللى جنبه فول وطعمية ومخلل، لقيت علبة المخلل بفلوس ومتقطع فيها ربع جزرة وثمن جزرتين وقرن فلل صغنن قد عقلة الصباع، افتح ساندوتشين الفول والطعمية تمشي كتير جوا الساندوتش لحد لما توصل للحشو، الحشو متراجع جدا، فين الطعمية؟ الطعمياية صغرت جدا، الساندوتش مفيهوش حاجة والسعر غالي".
تراجع جودة المنتجات والسلع
وتابع: "من امتى الفول والطعمية بقى فيهم حجم صغير وحجم كبير؟ ناس الفكرة في خضار وفاكهة كتير الأسعار رفعت جامد، وناس كتير بتعاني ان كرتونة البيض فيها بيض كتير بايظ، زمان كنا نجيب البيض زي الفل وكله حجم واحد، انا مقولتش اديني بيض فرز تاني ولا بايظ انا دافع بسعرها العالي واخدت مني فلوس زيادة وفي الاَخر تديني حاجة بايظة".
وأضاف عمرو أديب: "الناس بتشتكي من الأرز نسبة الكسر معروفة، الكسر كتير والطعم مختلف وبيعجن منهم، انت رفعت السعر 3 مرات اديني بقى رز كويس".
ولفت:"النفط اسعار بتنزل لتباطؤ النمو في العالم، طيب ده الفيل أبو زلومة في العالم، ده بينزل؟ طيب انت مش خايف من يوم زي ده؟ ليه بتعلى أسعار سلعك؟ الدنيا هتقف وحدش هيشتري، الجبنة اللى باكلها من 4 سنين ومتعود عليها طعمها اليومين دول اتغير فجأة، ماذا يحدث في السلع؟".
وأشار:"ناس كتير بقت تقلل من استهلاكها من اللحوم والدواجن، الغريب والمر المرير في الموضوع ان اللحمة بقت سيئة جدا، طعمها ميتكلش، طيب ما انت زودت الأسعار وقلت لك تحت أمرك وبتاعك، ليه اكل اللحمة ملهاش طعم ومش بتستوي؟ ايه اللي حصل؟ وليه الطماطم والخيار مش قد كده؟".
ولفت: "فيه محلات كبرى قررت أن حجم كل حاجة عندها بقى النصف، مع ان الفاتورة زيادة، ولم يعد طعم الأشياء جيد حتى البرتقال واليوسفي طعمهم مش حلو".
رسالة قوية من عمرو أديب للتجار
وتابع: "أنا لا اطلب من الدولة التدخل وان تحكم الرقابة، ولكن الدولة في ايدها ادوات اخرى تستطيع وببساطة لجعل التجار يرحموا الناس، هي الأرباح لو بقت 20% هيجرى ايه بس اعطيني جودة كويسة".
مشكلة اللحمة مع عمرو أديب
واستطرد: "أنا أشتري بفلوسي لحمة وفي الاَخر تطلع مبتتسويش وطعمها وحش،لازم يبقى فيه عقاب شعبي وياخد حقه من التجار الجشعين بالعزوف عن الشراء ".
ارتفاع أسعار الحديد
وأكمل: "محدش مرتاح حتى المطورين العقاريين والنهاردة سعر طن الحديد وصل لـ25 ألف جنيه، والأسمنت والتشطيات رفعت جامد، بقول للتجار لا تكسروا السوق متبوظوش السوق انتوا ياما كسبتم، اخسر شوية من أرباحك وتعالى معايا لحد لما الدنيا تتنفس في العالم على نص السنة اللى جاية وساعدنا شوية".
