غراب البين يكتب: فزلكة البنى آدمين
بعد يوم طويل من اللف والدوران والمرازيه فى خلق الله وقفت فوق سور بلكونة الحاج عرابى علشان أريح جتتى حبتين
انكمشت بين أجنحتى وقبل أن تغط عيناى فى النوم سمعت حوارا قادما من خلف شيش البلكونة:
البنت نجلاء بنت عم عرابى بتعيط وعايزه شبكة زى الشبكة بتاعت بنت خالتها "مرام".. خصوصا إن مرام يادوب معها دبلوم تمريض ونجلاء خريجة معهد الخدمة الإجتماعية العالى.. وطبعا الست أم نجلاء بتقول أنا بنتى مش أقل من بنت خالتها اللى جابولها 100 جرام دهب.. صوت العريس يأتى من بعيد على استحياء قائلا: أنا مقدرش أجيب الكمية دى من الذهب ولو أبويا عرف ممكن يقولى فركش الجوازه.. إيه يا عم عرابى متقول حاجه لبنتك وللست أم نجلاء!
وهنا لم أستطع أن أكمل الحوار فوقفت على قدمى ونفشت ريشى وأخذت أنعق بأعلى صوتى "قاق قاق" فراحت نجلاء وأمها يفتحن شيش البلكونة ويهشوننى ويقولون لى: غور من هنا يا غراب البين جبتلنا النكد والفقر.. فهربت مسرعا قبل أن يحدفوننى بمشابك الغسيل ولسان حالى يقول: بقا أنا اللى جبتلكم النكد والفقر يا شوية بنى آدمين.. أم أفعالكم هى التى تنكد عليكم وعلينا وعلى كافة خلق الله فى الأرض.
يعنى إيه فى عز هذا الإرتفاع فى أسعار الذهب تيجى حتت مفعوصه تطلب شبكة 100 جرام دهب فى ظل أن جرام الذهب وصل سعره لـ 1700 جنيه حتى كتابة هذه السطور.. والله أعلم هيبقى بكام عند قرائتكم لهذه السطور
ياريت يا شوية بنى آدمين ترحموا بعض وبلاش فزلكه عالفاضى والمليان.. وأنا كغراب لو كنت مكان والد العريس برضو كنت هفركش الزواجة اللى الشبكة فيها فقط ستكلف إبنى 150 ألف جنيه بحجة إن الست نجلاء معاها خدمة اجتماعية بينما بنت خالتها معاها دبلوم تمريض
ياخى جاتها ستين ألف نيله اللى عايزه تخلف بنى آدمين زيكم ميعرفوش إن دبلوم التمريض بيتوظف وبكالريوس الخدمه مالوش أى ستين لازمه واللى أخدوه قاعدين فى البيوت يهشوا الغربان ويحدفونا بمشابك الغسيل!
