غراب البين يكتب: المونديال على الطريقة الإسلامية

بعد يوم طويل من اللف والدوران والمرازيه فى خلق الله قررت أريح جتتى ساعتين قبل طلوع النهار.. فوقفت على جزع شجرة وانكمشت بين اجنحتى ويادوب عينى هتروح فى النوم وإذا بى أسمع صوت حوار قادم من المقهى أسفل الشجرة
 

يقول أحدهم: كفاية كدا انا عايز أروح انام علشان أصحى فايق لماتشات كأس العالم

فيرد عليه الآخر قائلا: أيوه فعلا لازم كلنا كمسلمين نتابع كأس العالم بتاع قطر

فيقول الأول: طب إيه علاقة الإسلام بكرة القدم وكأس العالم يا عم المفتى

فيرد الثانى: إزاى يا جدع.. دى قطر صارفة أكتر من 200 مليار دولار.. هو انت فاكرها صارفه كل ده علشان الكوره؟!

فيرد الأول: صارفه كل ده علشان تقول للعالم انا هنا وفى نفس الوقت تنشط السياحة عندها وكمان توجه انظار العالم كله لدولة قطر كراعى للرياضة العالمية.. دا بالإضافة إلى المكاسب المادية اللى هتجنيها من وراء البث والإعلانات وخلافه

فيضحك الثانى ويقول: دا انت ساذج يا جدع.. دى قطر جايبه الداعية العالمى "زاكر نايك" اللى أسلم على يديه الملايين علشان يدعوا للإسلام فى المدرجات.. دا فيه 500 واحد أسلموا قبل انطلاق المونديال لمجرد سماع صوت الآذان يصدح فى شوارع قطر
 

وهنا لم استطع استكمال الحوار الهابط وأدركت إن الليلة مافيهاش نوم بسبب جوز المعاتيه اللى سهرانين بالمقهى فوقفت على قدماى ونفشت ريشى وأخذت أنعق بأعلى صوتى "قاق قاق" فراح الشابان يهشوننى ويقولون لى: غور من هنا يا غراب البين جبتلنا النكد والفقر.. فهربت مسرعا قبل ان يحدفوننى بالطوب كعادتهم ولسان حالى يقول: بقا انا اللى جبتلكم النكد والفقر يا شوية بنى آدمين أم أنكم من تنكدون على أنفسكم وعلى العالم أجمع
 

يعنى هو فيه حاجه اسمها قطر بتنظم كأس العالم علشان تدعوا للإسلام على أرضها؟!.. طب فيه حاجه اسمها إن الفيفا تنظم المونديال تحت راية الإسلام؟!.. طب فيه حاجه اسمها كورة قدم إسلامية وكرة قدم بوزيه؟!.. طب هل لاعبى المونديال يعنى هينزلوا الملاعب بتيشرتات وشورتات شرعية؟!.. فعلا جاتها ستين ألف نيله اللى عايزه تخلف بنى آدمين زيكم مش وراهم غير الهرى والمكايده!