آسر ياسين يرثي مساعده الخاص بكلمات مؤثرة

طالب الفنان آسر ياسين جمهوره بالدعاء لـ “عم مجدي" المساعد الخاص الذي عمل معه لأكثر من 14 عامًا، وتوفي قبل 3 أسابيع.

ونشر آسر ياسين صورة له برفقته عبر صفحته على فيس بوك وكتب قائلًا: إهداء لـ مجدي.. كان المساعد بتاعي لأكثر من ١٤ سنة، قصته فيها كمية عِبر حياتية غير طبيعية.. اشتغل كهربائي لمدة 30 سنة وبعد كده حصلت له حادثة موت اتكتب له فيها عمر جديد، ومن هنا ابتدا يشتغل مساعد ليَّ بناءً على نصيحة أبويَ اللي رشحه لي عشان إخلاصه وأمانته".

وأضاف: عمره ما كان يتخيل إنه يشتغل في السينما ويقابل روبي ومنى زكي ومحمود حميدة!! ومش بس كدا، دا كمان وقف قدام الكاميرا كذا مرة في أدوار شرفية، كل الناس حبته لأنه يخش القلب على طول لطيبته وبساطته، كان يخاف عليَّ جدًّا بالذات في مشاهد الأكشن، وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام.

وتابع آسر ياسين: اللذيذ في الموضوع إنه كان ييجي يسألني عن نصيحتي في حاجات شخصية على الرغم من فارق السن.. مفيش طفل يشوفه غير ولازم يبتسم لا إراديًّا بسبب وشه البشوش والطفولي.
 

واختتم: مجدي رحل عن عالمنا من ٣ أسابيع، ولحد النهارده أنا ما اتكلمتش عنه، يمكن لأني بتجنب دا أو إني معتبره ما حصلش، مش عارف.. بس اللي عارفه كويس أوي إنه حقيقي واحشني، سلام يا ميجو.. الفاتحة".