المصيلحي: "أزمة الأرز مفتعلة.. ومضارب القطاع الخاص والمزارعين عايزين يلوا إيد الدولة"
![وزير التموين الدكتور](images/no.jpg)
قال الدكتور علي المصيلحي، وزير التموين: "كنا بنتعلم أيام زمان أن مصر بتصدر الأرز.. إذن فلا توجد لدينا أزمة في مخزون الأرز".
محصول الأرز هذا الموسم
وأضاف خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "المساحة المنزرعة بالأرز هذا الموسم وصلت لـ1.5 مليون فدان بالأرز بإنتاجية تصل إلى 3.5 مليون طن أرز أبيض، وأقصى استهلاك للمصريين 3 ملايين طن سنويًّا، لذلك فإن أزمة الأرز مفتعلة من الداخل".
المضاربة في أسعار الأرز
ولفت: "طول عمرنا فيه اكتفاء ذاتي من الأرز، ووزارة التموين بتعمل مناقصات شراء بشكل طبيعي، واللي حصل السنة اللي فاتت مهزلة بحجب الأرز لدرجة إننا في وزارة التموين في شهور 6 و7 و8 و9 مكنش عندنا أرز، فاستوردنا أرز من الهند بحوالي 55 ألف طن، إذن أين ذهب الأرز؟ وأي بني آدم معاه فلوس بيضارب في الأرز زي الذهب، أطباء بتضارب في الأرز والسنة اللي فاتت سعر الطن كان 3400 جنيه ولما استوردت كانوا وصلوا السعر لـ7000 جنيه".
وأكمل: "سعرنا الأرز اللي هنشتريه من الفلاح بـ6700 و6850 فإزاي إننا مش بنعطي الفلاح حقه، وده أكتر من سعر الصيني والهندي، وسبب أزمة الأرز من السنة اللي فاتت أن الناس بتضارب في الأسعار لتحقيق أعلى ربح ومكسب".
مخزون الأرز المحلي
وأشار: "مع شح الدولار إزاي أستورد أرز وأنا عندي اكتفاء ذاتي منه، عندنا دلوقتي 250 ألف طن من اللي تم توريده السنة دي في موسم الأرز ودول يكفونا 5 شهور، ولكن إحنا عايزين ناخد الكمية اللي تم زراعتها".
تحذير وزير التموين للمزارعين
وتابع: "إذا كان الفلاحين مش عايزين يوردوا الأرز فأنا مستعد أصدر قرارا بإلغائه من بطاقات التموين وتاخده بالسعر الحر، إزاي إنت مش عايز تورد وإنت في النهاية بتستفيد منه على بطاقات التموين؟!.. وبعدين هي مضارب القطاع الخاص والمزارعين عايزين يلوا إيد الدولة ويجبرونا نشتري منهم بـ8000 جنيه الطن وأكتر؟! إزاي وإحنا بنبيعه في بطاقة التموين بـ10.5 جنيه فقط، إحنا مش بنحقق مكسب ولا ربح.. إحنا بنحافظ على المواطن البسيط وبنمنع المضاربة على سعره".
سعر كيلو الأرز الفاخر
وأكد: "أعظم نوع أرز في مصر لن يزيد سعره عن 16.5 جنيه خلال أسبوع، وسيتم ضخ كميات كبيرة في كل السلاسل الغذائية، وأي مضرب عايز يتعاقد معانا الباب مفتوح حتى الخميس المقبل، ولكن كل اللي أنا عايزه ميبقاش فيه مضاربات، وأي حد هيخزن الأرز في مكان غير معتمد سيكون سلعة مجهولة المصدر، وسيتم مصادرتها، والعقوبة جريمة مش جنحة، اللي إحنا عايزينه من كل الناس ننزل الكميات السوق ونمنع المضاربات في الأسعار".